دۋلات يسابەكوۆتىڭ جەكەلەگەن تۋىندىلارى ۆەنگر، نەمىس، پولياك، چەح تىلدەرىندە جاريالاندى.
اسىرەسە جازۋشىنىڭ «رەكتوردىڭ قابىلداۋ كۇندەرى»، «اپكە»، «ەرتەڭدى كۇتۋ»، «مۇراگەرلەر»، «الىستان كەلگەن اناناس»، «كىشكەنتاي اۋىل»، «اناسىن اڭساعان قىز»، «ەسكەرتكىش وپەراتسياسى»، «ەسكى ۇيدەگى ەكى كەزدەسۋ»، «بوناپارتتىڭ ۇيلەنۋى»، «مۇڭلىق- زارلىق»، «امال مەن ايلا» ت. ب. پەسالارى رەسپۋبليكالىق، وبلىستىق تەاتر ساحنالارىندا قويىلعانىن ايرىقشا اتاپ ايتۋعا بولادى. ونىڭ «جەتى جەلكەن» دەگەن اتپەن تاڭداۋلى پەسالار جيناعى 1987 -جىلى جارىق كوردى. جەكەلەگەن تۋىندىلارى بويىنشا «گاۋھار تاس»، «دەرمەنە»، «تاۋقىمەت» كوركەم فيلمدەرى ءتۇسىرىلدى.
ول ەكىنىڭ ءبىرى ات ءىزىن سالا بەرمەيتىن، دۇرىسى تالانتى جەتىپ بارا المايتىن دراماتۋرگيادا جەمىستى قالام تەربەگەن جازۋشى. دۋلات يسابەكوۆ ادەبيەتتىڭ ءارتۇرلى جانرىنان ءوزىن تانىتا بىلگەن تالانت يەسى. سونىمەن قاتار دۋلات اعامىزدى كوپشىل، دارقان مىنەزدى، ۇلتجاندى تۇلعا دەپ اتاۋعا بولادى. وعان دالەل رەتىندە، وتكەن جىلعى زيالى قاۋىم وكىلدەرىنىڭ ەلباسىمەن كەزدەسۋى كەزىندە، اتاجۇرتىنا ورالىپ، اراداعى جەمقورلاردىڭ كەسىرىنەن قايتادان شەگارا اسىپ كەتىپ جاتقان ورالمان اعايىنداردىڭ ماسەلەسەسىن پرەزيدەنتكە تىكەلەي ايتقانىن اتاپ كورسەتۋگە بولادى.
بۇگىن ءبىز جازۋشىنىڭ ازاماتتىعىن دالەلدەيتىن تاعى ءبىر دارقاندىعى تۋرالى ايتقالى وتىرمىز.
الەۋمەتتىك جەلىدەن اكتەر، قازاق ك س ر-ىنىڭ حالىق ءارتيسى، وزبەكستان رەسپۋبليكاسىنىڭ ەڭبەك سىڭىرگەن ءارتيسى ءسابيت ورازبايەۆتىڭ «شەت ەلدەن كەلگەن قانداسقا ساياجايىن تەگىن بەرگەن» دەگەن جازۋشى دۋلات تۋرالى جازباسىن كوزىمىز شالىپ قالدى.
ءسابيت ورازبايەۆ: شەت ەلدەن كەلگەن قانداسقا ساياجايىن تەگىن بەرگەن
شەت ەلدەن كوشىپ كەلگەن ءبىر قانداسىمىز باسپانا ىزدەپ ءجۇرىپ دۋلات يسابەكوۆكە كەزدەسپەي مە. مۇڭ- مۇقتاجىن تىڭداپ، كوپ بالالى وتباسى ەكەنىن ءبىلىپ، الاتاۋدىڭ باۋرايىنداعى ءوز ساياجايىن ۋاقىتشا تۇرۋعا بەرەدى. ەرتەڭىنە قالاي ورنالاسقانىن كورۋگە بالاسى ەكەۋى بارسا، شيەتتەي جەتى بالاسى بار وتباسى ەكەن. دۋلات ويلانىپ قالادى. ونداعىسى ءۇبىرلى- ءشۇبىرلى وتباسىدان اي سايىنعى ساياجاي اقىسىن الۋدىڭ ءوزى ىڭعايسىز بوپ كورىنەدى. تۇپكى ماقساتى - شيەتتەي بالا- شاعاسى بار وتباسىنا ساياجايىن باسى ءبۇتىن بەرگىسى كەلەدى. جولدا كەلە جاتىپ «ءوزىڭ كوردىڭ عوي، جاعدايلارى تىم ناشار ەكەن» دەپ بالاسىن كوندىرەدى.
ۇيدەگى سۇيىكتى جارى نۇرعايشاعا جاعدايدى ايتقاندا قوجاناسىردىڭ تىرلىگىندەي ەكەن دەپ كۇلگەن عوي. دەگەنمەن، ءۇش كۇندىگىن ويلاماعان ايەلدەن بەز دەگەندەي، نۇرعايشا: «سول ساياجايدىڭ ءوزىن الۋ وڭايعا تۇسكەن جوق. اق تەر-كوك تەر بوپ قينالىپ ءجۇرىپ باسىنا 4 بولمەلى ءۇي سالدىق، ەككەن ورىك، الما جەمىسىن ەندى بەرە باستاعاندا... ءۇش بالاڭ ءوسىپ، ەندى جەتىلىپ كەلە جاتقاندا... بۇل قانداي مىرزالىق سوندا»، - دەپ ءبىر توقتادى.
- ونىڭ 7 بالاسى بار عوي، - دەيدى دۋلات.
- سوندا ءجاي- اشەيىن، تەگىن بەرەمىز بە؟ - دەيدى نۇرعايشا.
- ازىن- اۋلاق جيناعان- تەرگەن بىردەڭەسى بار شىعار، ءبىراق، ول جىرتىققا جاماۋ بولماس...
سونىمەن نە كەرەك، زايىبى نۇرعايشا كۇيەۋىنىڭ شەت ەلدەن كوشىپ كەلگەن شەرمەندەگە جانىنىڭ قاتتى اشىپ تۇرعانىن سەزىپ، كەلىسىمىن بەرەدى. بۇنى دۋلات وتباسىنىڭ پاراساتتىلىعى، ادامدىق قاسيەتتەرىنىڭ بيىك دەڭگەيى دەسەك، ارتىق ماقتاعاندىق بولماس. «قيىندىقتى كوپ كورگەن ادام، باسقانىڭ جاعدايىن تەز تۇسىنەدى» دەگەن وسى شىعار.
بەيسەن سۇلتان ۇلى