بۇل تۋرالى بۇگىن قازاقستانعا رەسمي ساپارمەن كەلگەن ءۇندىستان رەسپۋبليكاسىنىڭ پرەمەر-ءمينيسترى نارەندرا مودي ءمالىم ەتتى.
«ءبىز بۇل وڭىرمەن تەرەڭ ينتەگراتسيالانۋ ءۇشىن ەۋرازيالىق ەكونوميكالىق وداقپەن ەركىن ساۋدا تۋرالى كەلىسىم ماسەلەسىن قاراستىرۋدى باستادىق. ءبىز ساۋدا جانە ەنەرگەتيكا ترانزيتى ارقىلى ناقتى بايلانىستارىمىزدى جانداندىرا الامىز. ال «سولتۇستىك-وڭتۇستىك حالىقارالىق كولىك ءدالىزى باسەكەلەستىكتى ارتتىرىپ، ءۇندىستاننان ەۋرازياعا دەيىنگى شۇعىل باعدار اشۋعا مۇمكىندىك بەرەدى. الداعى ۋاقىتتا بارشا ورتالىق ازيانىڭ بۇل باعدارعا قوسىلاتىندىعىنا سەنىمىم زور»، - دەدى ن. مودي نازاربايەۆ ۋنيۆەرسيتەتىندە وقىعان ءدارىسى بارىسىندا.
ءۇندىستان پرەمەر-ءمينيسترى ەلدەر اراسىنداعى ىنتىماقتاستىقتى جولعا قويۋعا مۇمكىندىك بەرەتىن ورتالىق ازيا وڭىرىندەگى باستى جوبالاردى دا اتاپ ءوتتى.
«ءبىز ساۋدا جانە ترانزيت جونىندەگى اشحاباد كەلىسىمىنە قوسىلۋعا ۇمىتتەنەمىز. ءۇندىستاننىڭ يرانداعى چاحبەحار ايلاعىنا ينۆەستيتسيا قۇيۋى ورتالىق ازياعا جاقىنداي تۇسۋگە سەپتىگىن تيگىزەدى. سونىمەن قاتار، مەن، بىزدەردىڭ پاكىستان مەن اۋعانستان ارقىلى ورتالىق ازياعا ءداستۇرلى باعدارىمىزدى قالپىنا كەلتىرە الاتىندىعىمىزعا ءۇمىت ارتامىن. ءبىز گاز قۇبىرى بويىنشا تۇركىمەنستانمەن، اۋعانستانمەن، پاكىستانمەن جانە ۇندىستانمەن كەلىسىمگە كەلەتىندىگىمىزگە سەنىمدى ەكەندىگىمىزدى اتاپ وتە الامىز»، - دەدى ن. مودي.
سونىمەن قاتار ول ازيا حالىقتارىنىڭ ادامزات دامۋىنا قوسقان تاريحى مۇراسى بار ەكەندىگىن دە ەسكە سالىپ ءوتتى.
«ورتالىق ازيا ءوڭىرى بىزدەر تۇتاسىپ جاتقان كەزەڭدە ءوزىنىڭ ەڭ جوعارى دامۋ ساتىسىندا بولدى. بىزدەردىڭ ازيالىق عاسىر جايىنداعى ءۇمىتىمىز قازىرگىدەي وڭتۇستىك، شىعىس، ورتالىق جانە باتىس ازياعا بولىنبەي، ازيانىڭ تۇتاس بولعان كەزىندە عانا ورىن الاتىندىعى ءسوزسىز. ءبىزدىڭ بارلىعىمىز گۇلدەنەر بولساق، ازيا ورلەيدى. ال ول ءۇشىن بىزدەر ازيانىڭ ءتۇرلى بولىكتەرىن توپتاستىرۋىمىز قاجەت»، - دەدى مارتەبەلى مەيمان.
اۆتور: مارلان جيەمباي