وندا ساۋدا-ەكونوميكالىق قاتىناستاردى نىعايتۋ، پارلامەنتارالىق ءوزارا بايلانىستى تەرەڭدەتۋ، سونداي-اق ەكى ەلدىڭ كەلىسىمشارتتىق- زاڭنامالىق بازالارىن جەتىلدىرۋ ماسەلەلەرى تالقىلاندى. بۇل تۋرالى ءماجىلىستىڭ باسپا ءسوز قىزمەتىنەن حابارلاندى.
جۇزدەسۋ بارىسىندا تاراپتار قىرعىز ەلىنىڭ ەۋرازيالىق ەكونوميكالىق وداققا قوسىلۋ تۋرالى شارتتى راتيفيكاتسيالاۋدىڭ ماڭىزدىلىعىن اتاپ ءوتتى. سونىمەن قاتار، قازاقستان مەن قىرعىز ەلى اراسىنداعى ىنتىماقتاستىقتىڭ ستراتەگيالىق ماڭىزدىلىعىنا نازار اۋدارعان ءماجىلىس سپيكەرى قابيبوللا جاقىپوۆ اڭگىمە بارىسىندا مەملەكەت باسشىسىنىڭ باستاماسىمەن جۇزەگە اسىپ جاتقان بەس ينستيتۋتسيونالدىق رەفورما تۋرالى ايتىپ بەردى.
ءوز كەزەگىندە جوگوركۋ كەنەش ءتوراعاسى اسىلبەك جەەنبەكوۆ قازاق حالقىنىڭ جەتكەن جەتىستىكتەرىنە توقتالا كەلە، «قازاقستاننىڭ-2050» ستراتەگياسىندا قامتىلعان مىندەتتەر دەر كەزىندە ورىندالاتىنىنا سەنىم ءبىلدىردى. «قازاقستان - بۇل بۇكىل ءوڭىر ءۇشىن دامۋدىڭ، بەيبىتشىلىك پەن تۇراقتىلىقتى قامتاماسىز ەتۋدىڭ جارقىن ۇلگىسى»، - دەدى ا. جەەنبەكوۆ.
بۇدان بولەك، استانادا وتەتىن «ەكسپو-2017» حالىقارالىق كورمەسىنە توقتالا كەلە، جوگوركۋ كەنەش ءتوراعاسى اتالعان شارانى قازاقستاننىڭ مۇمكىندىكتەرىن الەمگە پاش ەتەتىن تاعى ءبىر وقيعا رەتىندە اتاپ ءوتتى. «استانادا وتەتىن حالىقارالىق كورمەگە قىرعىز تاراپى بەلسەندى تۇردە قاتىسۋدى جوسپارلاپ وتىر»، - دەدى ا. جەەنبەكوۆ.
اۆتور: قانات مامەتقازى ۇلى