مارات يرمەنوۆ ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالدى

استانا. KAZINFORM - مەملەكەت باسشىسىنىڭ جارلىعىمەن مارات يرمەنوۆ ق ر ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالدى، دەپ حابارلادى اقوردا.

Фото: wkau.edu.kz

- مەملەكەت باسشىسىنىڭ جارلىعىمەن مارات عاتاۇللا ۇلى يرمەنوۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى، - دەلىنگەن اقپاراتتا.

مارات يرمەنوۆ 1993 -جىلى باتىس قازاقستان اۋىل شارۋاشىلىعى ينستيتۋتىن، 1996 -جىلى ق ر ۇلتتىق قاۋىپسىزدىك كوميتەتىنىڭ ينستيتۋتىن، 2000 -جىلى حالىقارالىق قۇقىق جانە نارىق اكادەمياسىن ءتامامداعان.

1996-2000 -جىلدارى ۇلتتىق قاۋىپسىزدىك ورگاندارىندا جەدەل قىزمەت لاۋازىمدارىندا، ال 2000-2025 -جىلدارى باسشىلىق قىزمەتتەردە جۇمىس ىستەگەن.

2025 -جىلدىڭ قازان ايىنان باستاپ ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى قىزمەتىن اتقاردى.

2019 -جىلى پرەزيدەنت جارلىعىمەن وعان ۇلتتىق قاۋىپسىزدىك گەنەرال-مايورى ارناۋلى اتاعى بەرىلگەن.

Ⅱ دارەجەلى «داڭق» وردەنىمەن، مەملەكەتتىك، ۆەدومستۆولىق جانە مەرەيتويلىق مەدالدارمەن ماراپاتتالعان. ق ر ۇلتتىق قاۋىپسىزدىك كوميتەتىنىڭ قۇرمەتتى قىزمەتكەرى.

ايتا كەتەيىك، بۇعان دەيىن ەرمەك ساعىمبايەۆ ۇلتتىق قاۋىپسىزدىك كوميتەتىنىڭ ءتوراعاسى لاۋازىمىنان بوساتىلعانى حابارلاندى.