اقتوبەدە سۋ تاسقىنى كەزىندە زارداپ شەككەن ۇيلەردى يەلەرىنىڭ بۇزىپ الۋىنا ۋاقىت بەرىلدى

اقتوبە. KAZINFORM - تاسقىن كەزىندە بۇزىلعان ۇيلەردىڭ يەسى مۇلىكتى ءوز قارجىسىنا ەسەپتەن شىعارۋى ءتيىس. بۇزىپ الۋعا دا ۋاقىت بەرىلدى.

اقتوبە وبلىسى ىرعىز اۋدانىنىڭ نۇرا اۋىلى بىلتىر تۇگەل سۋعا كەتىپ، ۇيلەرى جارامسىز بولىپ قالدى. اۋىل وزگە جەرگە كوشىرىلىپ، جاڭا ءۇي سالىندى. ەندىگى مىندەت ءۇيدى ەسەپتەن شىعارۋ، جاڭاسىنا قۇجات راسىمدەۋ. تۇرعىندار بۇل جۇمىستارعا 50-100 مىڭ تەڭگە قاجەت دەپ وتىر.

- «جىلجىمايتىن مۇلىككە قۇقىقتاردى مەملەكەتتىك تىركەۋ تۋرالى» زاڭىنىڭ 22-بابىنا سايكەس جاڭا ۇيلەردىڭ قۇجاتىن الۋ ءۇشىن تاسقىنىنان زارداپ شەككەن ەسكى ۇيلەردىڭ قۇجاتىن تاپسىرۋى قاجەت. جالپى اۋدان بويىنشا 161 تۇرعىن ءۇي زارداپ شەكتى. قازىرگى ۋاقىتتا 45 تۇرعىن ءۇي يەسى ەسكى ۇيلەرىن ەسەپتەن شىعاردى. اتالعان قىزمەت كورسەتۋ جۇمىستارى «ازاماتتارعا ارنالعان ۇكىمەت» م ك ك ارقىلى ىسكە اسىرىلادى. ءسويتىپ تۇرعىن ءۇيدىڭ جەر ۋچاسكەسىن بەلگىلەيتىن اكتىسىن مەملەكەت مەنشىگىنە تاپسىرۋى قاجەت. وسى جۇمىستار تولىعىمەن اياقتالعاننان كەيىن جاڭادان سالىنىپ، بەرىلگەن ۇيلەردىڭ قۇجاتتارى تابىستالادى. بۇل ماسەلە بويىنشا اۋىل تۇرعىندارىمەن بىرنەشە رەت كەزدەسۋ ۇيىمداستىرىلىپ، ءتۇسىندىرىلدى. جالپى تۇرعىن ءۇيدى مەملەكەتتىك ەسەپتەن شىعارۋ ءۇشىن جۇمسالاتىن قارجى كولەمى 30-40 مىڭ تەڭگە كولەمىندە. بۇل قارجى مەملەكەتتىك قىزمەت كورسەتۋشى تاراپقا تولەنەدى، - دەپ حابارلادى ىرعىز اۋدانى اكىمدىگى.

اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، اۋىلعا تۇرعىن ۇيلەردى بۇزىپ، ماتەريالدارىن وزدەرى الۋعا ۋاقىت بەرىلگەن. سوندىقتان دا سۇرۋگە قارجى قاراستىرىلمادى.

ەسكە سالساق، اقتوبە قالاسىندا دا بىلتىرعى سۋ تاسقىنى كەزىندە بۇزىلعان، جارامسىز بولعان ۇيلەر بيىل ءسۇرىلۋى ءتيىس. مەردىگەر انىقتالعانىمەن، ولار ءبىر-بىرىنە شاعىم ءتۇسىرىپ، جۇمىس ۇزاققا سوزىلىپ كەتتى.