اق ءۇيدىڭ كادر جونىندەگى ديرەكتورى سەرحيو گور وزبەكستاندا دۇنيەگە كەلگەن

استانا. Kazinform - اق ءۇيدىڭ كادر جونىندەگى ديرەكتورى 38 جاستاعى سەرحيو گور وزبەكستاندا تۋعانى انىقتالدى. بۇل تۋرالى Times of Malta جانە OCCRP حابارلادى.

گور ءوزىنىڭ قاي جەردە تۋعانىن ايتپاعان. The Washington Post گازەتىندە شەنەۋنىك تۋرالى ماقالادا ونىڭ مالتالىق يمميگرانت ەكەنى ايتىلعان. New York Post گازەتى دە ماۋسىم ايىنداعى ماقالاسىندا دونالد ترامپ اكىمشىلىگى شەنەۋنىگىنىڭ مالتالىق ەكەنىن حابارلادى. سونداي-اق، گور قۇپيا اقپاراتتى الۋ كەزىندە ءومىرباياندىق قۇجاتتاردى ۇسىنباعانى اتاپ ءوتىلدى.

شەنەۋنىك «تەك رەسەيدە ەمەس» دەپ ءوزىنىڭ تۋعان جەرىن گازەتكە ايتۋدان باس تارتتى. The Dispatch باسىلىمىنا گوردىڭ تانىستارى بەرگەن اقپاراتقا سايكەس، ول ك س ر و-دا تۋعان. ءبىراق وسى ۋاقىتقا دەيىن مۇنى دالەلدەيتىن باسقا قۇجات بولمادى.

Times of Malta جانە OCCRP اق ءۇيدىڭ كادر جونىندەگى ديرەكتورى سەرحيو گوروچوۆسكي 1986 -جىلى 30-قاراشادا تاشكەنتتە دۇنيەگە كەلگەنىن انىقتادى. بۇل تۋرالى اقپارات گوردىڭ مالتاداعى جىلجىمايتىن مۇلكىنە قاتىستى قۇجاتتاردا بار - بۇل قۇجاتتاردى جۋرناليستەر العان. شەنەۋنىكتىڭ ادۆوكاتى روبەرت گارسون دا قورعاۋىنداعى ازاماتتىڭ تاشكەنتتە تۋعانىن راستادى.

تەرگەۋ دەرەكتەرىنە سايكەس، گور بالا كەزىندە مالتادا كەم دەگەندە 5 جىل تۇرعان. اتاپ ايتقاندا، 1996 -جىلدان 1999 -جىلعا دەيىن ول ۆيتتوريوزاداعى ۇلدارعا ارنالعان كاتوليك مەكتەبىندە وقىدى. كەيىنىرەك (ناقتى قاشان ەكەنى بەلگىسىز) گوردىڭ وتباسى امەريكا قۇراما شتاتتارىنا قونىس اۋدارىپ، ول ەلدىڭ ازاماتتىعىن الدى.

جۋرناليستەردىڭ ايتۋىنشا، گور ترامپ اكىمشىلىگىندەگى جۇمىستى باستاماس بۇرىن رەسەيگە ەكى رەت كەلگەن. 2017 -جىلى ۆاشينگتوننان ماسكەۋگە ۇشىپ، رەسەي استاناسىندا ءبىر كۇن بولىپ، كەلەسى كۇنى ريمگە ۇشقان. 2018 -جىلى رەسپۋبليكاشىل سەناتور رەند پولمەن بىرگە جۇمىس ىستەگەن گور ماسكەۋگە امەريكاندىق ليبەرتارياندىق تالداۋ ورتالىعى كاتون ينستيتۋتى قارجىلاندىراتىن شارا اياسىندا باردى. بۇل ساپار «رەسەي مەن ا ق ش-قا قاتىستى ماسەلەلەردى زەرتتەۋگە، تالقىلاۋعا جانە تالداۋعا ارنالعان فاكتىلەردى انىقتاۋ ساپارى» دەپ اتالدى.
گوردىڭ ادۆوكاتى ماسكەۋگە ساپارىن ونىڭ شەنەۋنىك - «ناعىز ساياحاتشى» ەكەنىمەن ءتۇسىندىردى. ول گوردىڭ 2017 -جىلى رەسەي استاناسىنا ساپارىن «ترانزيتتىك رەيس» دەپ اتادى.

Axios باسىلىمى سەرحيو گوردى ترامپتىڭ اق ۇيدەگى ەڭ ىقپالدى كەڭەسشىلەرىنىڭ ءبىرى رەتىندە سيپاتتادى. گور ترامپتىڭ ۇلىمەن بىرگە Winning Team Publishing كومپانياسىن قۇردى. 2020 -جىلى گور ترامپتىڭ سايلاۋ ناۋقانى ءۇشىن قاراجات جيناۋعا جاۋاپتى بولدى، ال 2024 -جىلى ول ا ق ش-تىڭ قازىرگى پرەزيدەنتىنىڭ ناۋقانىنا شامامەن 72 ميلليون دوللار جۇمساعان ساياسي ارەكەت جونىندەگى كوميتەت قۇردى. اق ۇيدە قىزمەتكە كىرىسكەننەن كەيىن گور ترامپ اكىمشىلىگى قىزمەتكەرلەرىنىڭ ادالدىعىن تەكسەردى.

بەگابات ۇزاقوۆ