پاۆلودار وبلىسىندا داۋىلدان ءبىر ادام قازا تاۋىپ، ونداعان نىسان زاقىمداندى
پاۆلودار. KAZINFORM - پاۆلودار وبلىسىنداعى داۋىلدى جەلدىڭ سالدارىنان ءبىر ادام قازا تاپتى، 16 ادام جاراقات الدى. بۇل تۋرالى پاۆلودار وبلىسى اكىمىنىڭ باسپا ءسوز قىزمەتى حابارلادى.
19-ماۋسىم كۇنى پاۆلودار وبلىسىندا جىلدامدىعى سەكۋندىنا 43 مەترگە دەيىن جەتەتىن داۋىلدى جەل تىركەلدى. داۋىلدى جەل ينفراقۇرىلىمعا ايتارلىقتاي زيان كەلتىرىپ، سالدارىنان ەلەكتر قۋاتى ءسونىپ قالدى. ءبىر ادام قازا تاۋىپ، بىرنەشە ادام زارداپ شەكتى.
توتەنشە جاعدايلار قىزمەتىنىڭ مالىمەتى بويىنشا، 16 ادام زارداپ شەككەن، ونىڭ ىشىندە ءۇش بالا. اقسۋدا 1968-جىلى تۋعان تۇرعىنى كوز جۇمدى.
- وبلىس ورتالىعىندا 47 نىساننىڭ، ونىڭ ىشىندە 6 الەۋمەتتىك مەكەمەنىڭ شاتىرىنا زاقىم كەلدى. اقسۋ مەن ەكىباستۇزدا 23 نىسان، باياناۋىل اۋدانىندا - 7 نىسان زاقىمدانعان، سونداي-اق ماي جانە پاۆلودار اۋداندارىندا عيماراتتاردىڭ زاقىمدانۋى تىركەلدى.
وبلىستىڭ قالالارى مەن اۋداندارىنىڭ ەلەكترمەن جابدىقتاۋ جەلىلەرىندە اقاۋلار بايقالادى. قازىرگى ۋاقىتتا اقسۋ قالاسىندا جانە باياناۋىل اۋدانىندا ەلەكتر قۋاتىنىڭ ءوشۋى تىركەلىپ وتىر.
قازىرگى ۋاقىتتا بولعان اپاتتىڭ سالدارىن جويۋ بويىنشا جۇمىس ىستەلىپ جاتىر. بايلانىس جانە ەلەكترمەن جابدىقتاۋ جەلىلەرىنىڭ 16 باعاناسى قالپىنا كەلتىرىلىپ جاتىر. 300 دەن استام ادام جانە 103 ارنايى تەحنيكا جۇمىلدىرىلعان، - دەلىنگەن حابارلامادا.
بارلىق شۇعىل ارەكەت ەتۋ قىزمەتتەرى كۇشەيتىلگەن رەجيمدە جۇمىس ىستەپ جاتىر.