پاۆلودار وبلىسى كەيبىر ازىق-تۇلىكتىڭ ارزاندىعى بويىنشا ەلىمىزدەگى بەستىككە كىرەدى

پاۆلودار. KAZINFORM - پاۆلودار وبلىسىندا «پاۆلودار» الەۋمەتتىك-كاسىپكەرلىك كورپوراتسياسى نەگىزىندە قۇرىلعان ءبىر تۇراقتاندىرۋ قورى جۇمىس ىستەيدى. وندا بۇگىندە جالپى كولەمى 13,8 مىڭ توننا ازىق تۇلىك ونىمدەرى ساقتالىپ تۇر.

ازىق-تۇلىكتىڭ 12 اتاۋلى ءتۇرى وبلىس بويىنشا 201 الەۋمەتتىك دۇكەن مەن الەۋمەتتىك ساۋدا نۇكتەلەرىندە ساتىلادى.

«پاۆلودار» الەۋمەتتىك- كاسىپكەرلىك كورپوراتسياسى» اق تۇراقتاندىرۋ قورىنىڭ ديرەكتورى ازامات داندىبايەۆتىڭ ايتۋىنشا، قازىرگى كۇزگى كەزەڭدە كوپتەگەن ازىق تۇرلەرىنە تۇتىنۋشىلار تاراپىنان سۇرانىستىڭ جوقتىعىنا نەمەسە كۇرت ازايىپ كەتكەنىنە بايلانىستى قوردا ارنايى تىزىمگە ەنەتىن ونىمدەردىڭ كەيبىرى جوق.

مىسالى كۇنباعىس مايى مەن كارتوپقا قازىر مۇلدە سۇرانىس جوق.

ءوڭىردىڭ تۇراقتاندىرۋ قورىنان ونىمدەر مىنا باعادا بوساتىلىپ جاتىر:

1. قاراقۇمىق (ك گ) - 130 تەڭگە؛
2. ءبىرىنشى سورتتى ۇن (ك گ) - 145 تەڭگە؛
3. تۇز (ك گ) - 55 تەڭگە؛
4. كۇنباعىس مايى - (ليترى) - 630 تەڭگە (قازىر بۇل ءونىم قوردا جوق، وندىرۋشىلەر سىعىمداپ الىپ جاتىر، جاقىن ارادا تۇسەدى)؛
5. كۇرىش (ك گ) - 350 تەڭگە؛
6. ماكارون (روجكي، ك گ) - 250 تەڭگە؛
7. قىرىققابات (ك گ) - 95 تەڭگە؛
8. قانت (ك گ) - 410 تەڭگە؛
9. كارتوپ (ك گ) - 110 تەڭگە؛
10. ءسابىز - (ك گ) 110 تەڭگە؛
11. پياز (ك گ) - 102 تەڭگە؛
12. تاۋىق جۇمىرتقاسى (وندىعى) - 426 تەڭگە.

- بىزدە كەيبىر ازىق-تۇلىك ونىمدەرى، سونىڭ ىشىندە كوكونىس پەن كارتوپ قويماعا ارنايى سالىنبايدى. ولار شارۋا قوجالىقتارىنىڭ كوكونىس قويمالارىندا ساقتالىپ تۇرادى، قاجەت كەزىندە الدىرتامىز. وبلىستا كۇرىش باعاسىن ىرىقتاندىرۋ ءارى كولەمىن كوبەيتۋ ماقساتىندا جۋىقتا كورپوراتسيا قورعا 204 توننا كۇرىش ساتىپ الدى. الداعى ۋاقىتتا تاۋىق جۇمىرتقاسىن دا قاجەت كولەمدە ساتىپ الۋ جوسپاردا تۇر. قىسقى ۋاقىتقا قاجەت كوكونىس تۇرلەرى بويىنشا دا قوسىمشا ساتىپ الۋلار جۇرگىزىلۋى مۇمكىن. ءبىراق ءبىزدىڭ وڭىردە كوكونىس ونىمدەرى مول جينالاتىنىن ەسكەرسەك، كارتوپ جانە كەيبىر كوكونىستەر بويىنشا قورعا ناقتى ساتىپ الۋلار جۇرگىزىلمەيدى. سەبەبى ءونىمدى جەرگىلىكتى نارىقتا ارزان باعادا وتكىزۋگە قىزىعۋشىلىق تانىتاتىن شارۋاشىلىقتار جەتكىلىكتى، - دەپ جاۋاپ بەردى ا. داندىبايەۆ Kazinform ءتىلشىسىنىڭ ساۋالىنا.

جوعارىدا اتالعان 204 الەۋمەتتىك ساۋدا نۇكتەلەرىنەن بولەك، پاۆلودار قالاسىندا «Jailau» فەرمەرلىك بازارى جۇمىس ىستەيدى. وندا ساتىلاتىن ازىق-تۇلىك تاۋارلارى تىكەلەي جەرگىلىكتى وندىرۋشىلەردەن جەتكىزىلەتىندىكتەن نارىقتاعى باعادان -20 عا ارزان.

بيىل ەكىباستۇز بەن اقسۋ قالالارىندا دا وسىنداي بازارلاردىڭ قۇرىلىسى قولعا الىنىپ جاتىر.

قازىرگى ۋاقىتتا پاۆلودار وبلىسى ازىق تۇلىك باعاسىنىڭ ارزاندىعى جونىنەن 7 پوزيتسيا بويىنشا رەسپۋبليكاداعى وڭىرلەر اراسىندا توپ-5-كە كىرەدى. اتاپ ايتقاندا، ءبىرىنشى سورتتى ۇن، قاراقۇمىق جارماسى، سارى ماي، ءسۇت (%2,5)، ايران (%2,5)، كارتوپ، ءسابىز.

اۆتور
مۇرات اياعان