الماتى وبلىسىندا كوشى-قون زاڭناماسىن بۇزعان 100 دەن استام شەتەلدىك ۇستالدى
قونايەۆ. KAZINFORM - الماتى وبلىسىنىڭ پوليتسيا قىزمەتكەرلەرى كوشى-قون زاڭناماسىن بۇزۋ فاكتىلەرىن انىقتاۋعا باعىتتالعان رەيدتىك ءىس-شارا جۇرگىزدى.
- قاراساي اۋدانىنىڭ اۋماعىندا ورنالاسقان ءۇش كىرپىش زاۋىتى مەن «التىن وردا» ساۋدا-لوگيستيكالىق ورتالىعى تەكسەرىلدى. ناتيجەسىندە ق ر كوشى-قون سالاسىنداعى زاڭنامانى بۇزعانى ءۇشىن 175 شەتەل ازاماتى جاۋاپكەرشىلىككە تارتىلىپ، ونىڭ ىشىندە جەكە باسىن كۋالاندىراتىن قۇجاتتارى جوق بولعاندىقتان 95 ادام قابىلداۋ- تاراتۋ ورنىنا جەتكىزىلدى، - دەدى وبلىستىق كوشى-قون قىزمەتى باسقارماسىنىڭ باستىعى رۇستەم جارىكباسوۆ.
پوليتسيا مالىمەتىنە سايكەس، شەتەلدىك ازاماتتاردىڭ كوپشىلىگى قازاقستانعا جۇمىس ىستەۋ ءۇشىن كەلەدى. ءبىراق باسىم كوپشىلىگى كوشى-قون زاڭناماسىنىڭ تالاپتارىن ساقتاي بەرمەيدى.
- وتانداستارىمىزدىڭ تاراپىنان قابىلداۋشى تۇلعالار كوشى-قون قىزمەتىنە شەتەلدىكتىڭ كەلگەنى تۋرالى حابارلاۋعا مىندەتتى ەكەنىن ەسكە سالامىز. بۇل حابارلاما مىندەتتى تۇردە شەتەل ازاماتى كەلگەن كۇننەن باستاپ ءۇش جۇمىس كۇنى ىشىندە بەرىلەدى. كورسەتىلگەن مەرزىمدى وتكىزىپ العان جانە يمميگرانتتىڭ بولۋى تۋرالى ىشكى ىستەر ورگاندارىنا حابارلاماعان جاعدايدا، قازاقستاندا قابىلداۋشى جەكە جانە زاڭدى تۇلعا 518-باپ بويىنشا، ال زاڭدى بۇزعان شەتەلدىكتەر قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 517-بابى بويىنشا جاۋاپقا تارتىلاتىنىن ەسكەرتەمىن. جەكە جانە زاڭدى تۇلعالار يمميگرانتتىڭ كەلگەنى تۋرالى تىكەلەي «e-Qonaq» ەلەكتروندىق ۆيزالىق- كوشى-قون پورتالى ارقىلى حابارلاي الادى، - دەدى رۇستەم جارىكباسوۆ.
ەسكە سالايىق، بۇعان دەيىن الماتىدا زاڭسىز كۋرەر بولىپ جۇرگەن ءبىر توپ شەتەلدىك ەلىنە قايتارىلعانىن جازعان ەدىك.