الماتى تاۋلارىندا قونجىقتارىمەن بىرگە سەرۋەندەپ شىققان قوڭىر ايۋ ۆيدەوعا ءتۇسىپ قالدى
08:56, 29 - ءساۋىر 2025
استانا. KAZINFORM - م ۇ ت پ «كولساي كولدەرى» اۋماعىندا تيان-شان قوڭىر ايۋلارى بەينەجازباعا ءتۇسىپ قالعان.
- جابايى جانۋارلار سانىن ەسەپكە الۋ بارىسىندا «كولساي كولدەرى» م ۇ ت پ ينسپەكتورلارى تيان-شان قوڭىر ايۋىن ەكى قونجىعىمەن بەينەگە ءتۇسىرىپ الدى. تيان-شان قوڭىر ايۋلارى پاركتىڭ ورماندى تاۋ باۋرايلارىندا مەكەندەيدى، - دەلىنگەن كولساي كولدەرى ۇلتتىق پاركى حابارلاماسىندا.
پارك اكىمشىلىگى ەگەر قوڭىر ايۋدى بايقاپ قالساڭىز، قاۋىپسىز قاشىقتىقتى ساقتاپ، جانۋارلاردى مازالاماۋ ماڭىزدى ەكەنىن ەسكەرتەدى.
- قازاقستان رەسپۋبليكاسىنىڭ قىزىل كىتابىنا ەنگەن بارلىق جانۋارلار تۇرلەرى مەملەكەت تاراپىنان قورعالادى، - دەلىنگەن كولساي كولدەرى ۇلتتىق پاركى حابارلاماسىندا.
ايتا كەتەلىك سايرام-وگەم ۇلتتىق پاركىندە قار بارىسى فوتوتۇزاققا ءتۇسىپ قالعان ەدى