الاكول جاعاسىنىڭ لاستىعى مەن قاۋىپسىزدىكتىڭ سىلبىرلىعى ماسەلەسى قالاي شەشىلمەك
سەمەي. KAZINFORM - پرەزيدەنت قاسىم-جومارت توقايەۆتىڭ الاكول ماڭىنداعى ايگىلى تۋريستىك ايماقتىڭ دەمالۋشىلاردى قارسى الۋعا دايىندىعى تومەندىگى جايلى ايتقان سىنىنان كەيىن اباي وبلىسى اكىمىنىڭ ورىنباسارى سەرىك تۇلەنبەرگەنوۆ ماقانشى اۋدانىنا باردى.
دەمالىس ۇيلەرىنە ايىپپۇل سالىنادى
بۇگىن كول باسىندا شۇعىل جيىن وتكىزىلدى. وندا دەمالۋشىلارعا قولايلى جاعداي جاساۋ، سانيتارلىق تازالىق پەن قاۋىپسىزدىك ماسەلەلەرى تالقىلاندى.
ەندى كول جاعاسىنا قۇقىق قورعاۋ ورگاندارىمەن بىرگە رەيد جۇرگىزىلىپ، تارتىپتىك شارالار كۇشەيتىلمەك. سونىڭ ىشىندە موتورلى قايىق يەلەرىنىڭ قىزمەت كورسەتۋلەرى قاتاڭ تەكسەرىلەدى. تازالىق ماسەلەسى قاراستىرىلىپ، قوقىس تاستاعان ساۋدا ورىندارى مەن دەمالىس ۇيلەرىنە ايىپپۇل سالىنادى.
- الاكولدىڭ اباي وبلىسىنداعى جاعالاۋىنا بيىل ەرەكشە كوڭىل ءبولىنىپ جاتىر. بۇعان دەيىن ناۋرىز ايىنان باستاپ وبلىس اكىمى بەرىك ءۋالي تۋريستىك ورىنعا 3 رەت بارىپ، كوشپەلى جيىندار وتكىزگەن. الاكول جاعالاۋىنا 2018-جىلدان بەرى جوندەۋ جۇمىستارى جۇرگىزىلمەگەن. وسىنى ەسكەرە وتىرىپ، وبلىستىق بيۋجەتتەن 658 ميلليون تەڭگە قارجى ءبولىندى. بۇل قارجىدان اربات الاڭىن جوندەۋگە 108,9 ميلليون تەڭگە، جاڭا قوعامدىق كەڭىستىك قۇرۋعا 171,6 ميلليون تەڭگە، جاعالاۋدى اباتتاندىرۋعا 107,5 ميلليون تەڭگە باعىتتالدى. 25 كيىم اۋىستىراتىن ورىن، 50 كونتەينەر، 2 بيوتۋالەت ورناتىلدى. 7 پيرستىڭ 3 ەۋى ورناتىلىپ، قۇتقارۋ مۇنارالارى مەن جاعاجايدى جارىقتاندىرۋ جۇمىستارى جۇرگىزىلدى، - دەپ حابارلادى اباي وبلىسى اكىمىنىڭ باسپا ءسوز قىزمەتى.
سونىمەن قاتار جاعالاۋدا قۇتقارۋ ستانتسياسىنىڭ قۇرىلىسى باستالدى. اتالعان ستانسيا الاكول اۋماعىندا توتەنشە جاعدايلاردىڭ الدىن الۋ، سالدارىن جويۋ، العاشقى مەديتسينالىق كومەك كورسەتۋگە مۇمكىندىك جاساۋ، ادام ءومىرىن ساقتاۋ مەن جالپى قاۋىپسىزدىك دەڭگەيىن ارتتىرۋعا باعىتتالعان.
سونداي-اق قابانباي اۋىلىندا ءورت ءسوندىرۋ دەپوسى سالىنىپ جاتىر. ەكى ءورت ءسوندىرۋ اۆتوكولىگىنە ارنالعان بەكەت الاكول ماڭى مەن اۋماعىنداعى ءورت قاۋىپسىزدىگىن قامتاماسىز ەتۋگە ارنالعان. تازالىق ساقتاۋ جانە تۇرمىستىق قالدىقتاردى شىعارۋ ماسەلەسىنە قاتىستى قوسىمشا 100 قوقىس كونتەينەرى مەن 75 ۋرنا ورناتىلعان. بۇگىندە جالپى 110 كونتەينەر بار. اربات اۋماعىندا تازالىق جۇمىستارى ءار 30 مينۋت سايىن، ال جاعالاۋدا كۇنىنە ءۇش رەت جۇرگىزىلەدى. قالدىقتاردى وڭدەۋگە ارنالعان پوليگون قۇرىلىسىنا جوبالىق-سمەتالىق قۇجاتتاما ازىرلەنىپ جاتىر، - دەلىنگەن اقپاراتتا.
ەلەكتر ەنەرگياسى تاپشىلىعى شەشىلە مە؟
بيىل جاعالاۋداعى سانيتارلىق توراپتار سانى 8 دەن 18 گە دەيىن كوبەيتىلەدى. قازىردىڭ وزىندە 10 ى ورناتىلدى.
- ەلەكتر ەنەرگياسى تاپشىلىعىن شەشۋ ءۇشىن جاڭا «الاكول» قوسالقى ستانساسى مەن جوعارى كەرنەۋلى جەلىلەر قۇرىلىسىنا جوبالار دايىندالدى. قۇرىلىس جۇمىستارى 2026-جىلدىڭ قازان ايىندا اياقتالادى. قاۋىپسىزدىكتى كۇشەيتۋ ماقساتىندا قۇتقارۋشىلار مەن ينسترۋكتورلار كۇندەلىكتى كەزەكشىلىك جۇرگىزىپ جاتىر. 5 قۇتقارۋ مۇناراسى، 6 ادامنان تۇراتىن ارنايى توپ جۇمىس ىستەپ تۇر. توتەنشە جاعدايلار مينيسترلىگى جانە كولىك ينسپەكتسياسى جاعاجاي ايماعىندا سۋ كولىكتەرىنە تۇراقتى رەيدتەر جۇرگىزۋدە. ءقازىردىڭ وزىندە 30 سۋ كولىگى تەكسەرىلىپ، 12 اكىمشىلىك حاتتاما تولتىرىلعان. اباي وبلىسىنىڭ اكىمدىگى پرەزيدەنت تاپسىرماسىنا سايكەس بارلىق شارالاردى جەدەل قولعا الىپ، الاكول جاعالاۋىنداعى احۋالدى جاقسارتۋ بويىنشا كەشەندى جۇمىستاردى جالعاستىرا بەرەدى، - دەلىنگەن مالىمەتتە.
ەسكە سالساق، وسىعان دەيىن مەملەكەت باسشىسىنىڭ حالىقتان كەلىپ تۇسكەن كوپتەگەن شاعىمعا بايلانىستى الاكول ماڭىنداعى ايگىلى تۋريستىك ايماقتىڭ دەمالۋشىلاردى قارسى الۋعا دايىندىعى تومەن ەكەنىنە ۇكىمەتتىڭ نازارىن اۋدارعانى حابارلانعان.