اباي وبلىسىندا مەكتەپ وقۋشىلارىنا ارنالعان جازعى كاسىبي باعدارلاۋ لاگەرلەرى اشىلدى

سەمەي. KAZINFORM - وڭىردە كوللەدجدەر بازاسىندا 10 جازعى لاگەر ىسكە قوسىلدى. وندا وقۋشىلار ءتۇرلى كاسىبي باعىت بويىنشا العاشقى پراكتيكالىق تاجىريبە الىپ جاتىر.

وقۋ-اعارتۋ مينيسترلىگى مالىمەتىنشە، بيىل شامامەن 600 بالانى قامتۋ جوسپارلانعان. جاڭا فورماتتاعى لاگەرلەردىڭ ءبىرى - بەسقاراعاي كوللەدجىنىڭ بازاسىنداعى ەكولوگيالىق- اگرارلىق «ЭКОorman» لاگەرى. مۇندا بالالار لاندشافتتىق ديزاين، جىلىجاي شارۋاشىلىعى، فلوريستيكا، اۋىل شارۋاشىلىعىن مەحانيزاتسيالاۋ نەگىزدەرىمەن تانىسادى.

«SmartKriS» سيفرلىق لاگەرى IT جانە جاڭا تەحنولوگيالار جوعارى كوللەدجىنىڭ بازاسىندا جۇمىس ىستەيدى. ول ەكى اۋىسىمدا ۇيىمداستىرىلعان. وقۋشىلار روبوتوتەحنيكا، باعدارلامالاۋ، ۆەب-ديزاين، CAD- گرافيكا باعىتتارىن مەڭگەرىپ جاتىر. وقىتۋ WorldSkills ستاندارتتارىنا ساي پراكتيكالىق تاپسىرمالار مەن ويىن كەيستەرى ارقىلى وتەدى.

پوليتەحنيكالىق كوللەدجدە شىعارماشىلىق باعىتتاعى «Summer Camp» لاگەرى اشىلدى. باعدارلاما ەكى جاس ساناتىنا بولىنگەن. بالالار تىگىنشىلىكپەن، اسپازدىقپەن اينالىسىپ، فەتر مەن مونشاقتان بۇيىمدار جاسايدى، شەبەرلىك ساعاتتارىنا جانە سپورتتىق جارىستارعا قاتىسادى.

بيىل العاش رەت ءۇرجار كوللەدجىندە «ءۇرجار-ايىم» لاگەرى اشىلدى. مۇندا اۋىلدىق مەكتەپ وقۋشىلارى ۇستازدارىمەن بىرگە اگرارلىق ءىس، ۆەتەريناريا، اسپازدىق، دانەكەرلەۋ جانە باسقا دا قولدانبالى باعىتتار بويىنشا تاجىريبە مەن شەبەرلىك ساباقتارىنان ءوتىپ جاتىر.

ر. بايسەيىتوۆ اتىنداعى سەمەي قارجى-ەكونوميكالىق كوللەدجىندە SFEK Summer Camp لاگەرى جۇمىس ىستەيدى. مۇندا وقۋشىلار گرافيكالىق ديزاين، ۆەب- ازىرلەۋ، بۋحالتەرلىك ەسەپتىڭ نەگىزدەرى جانە موبيلوگرافيانى مەڭگەرەدى. سونداي-اق كوشباسشىلىق، كوماندادا جۇمىس ىستەۋ جانە تايم-مەنەدجمەنت بويىنشا ترەنينگتەر قاراستىرىلعان.

شاكارىم اتىنداعى سەمەي جوعارى كوللەدجى «تولاعاي» لاگەرىن ىسكە قوستى. وندا ۇلتتىق مادەنيەت، ەكولوگيا جانە دەنساۋلىق تاقىرىپتارىنا باسا نازار اۋدارىلعان. باعدارلامادا قولدانبالى ونەر، مۋزىكا، ۆيكتورينالار، لوگيكالىق ويىندار قامتىلعان.

ەلەكتروتەحنيكالىق كوللەدج پراكتيكالىق باعىتتاعى IT لاگەرىن اشتى. وقۋشىلار ستارتاپ- جوبالارعا، حاكاتوندارعا قاتىسىپ، سيفرلىق سالاداعى وندىرىستىك پروتسەستەردى مەڭگەرىپ جاتىر.

- كاسىبي باعدارلاۋ لاگەرلەرى - وقۋشىلاردىڭ ءوز قابىلەت- قارىمىن ءىس جۇزىندە بايقاپ كورۋى جانە ماماندىقتار تۋرالى تۇسىنىك قالىپتاستىرۋى ءۇشىن ماڭىزدى الاڭعا اينالدى. بۇعان اسىرەسە، جۇمىسشى ماماندىقتارى جىلى اياسىندا باسىمدىق بەرىلىپ وتىر. وسىلايشا، كوللەدجدەر جاستاردىڭ الەۋەتىن اشۋعا ءوز ۇلەسىن قوسىپ جاتىر، - دەيدى وبلىستىق ءبىلىم باسقارماسىنىڭ باسشىسى باۋىرجان تۋلەنوۆ.

ايتا كەتەيىك، جازعى كەزەڭدە ەلىمىز بويىنشا جالپى 10 مىڭنان استام لاگەر جۇمىس ىستەپ، 3,2 ميلليون بالا دەمالىسپەن قامتىلدى.

تۇركىستان وبلىسىندا العاشقى مودۋلدى لاگەر جاتاقحاناسى پايدالانۋعا بەرىلدى.

اۆتور

ەلميرا ورالبايەۆا