اباي وبلىسىندا حالىق ءارتىسى بيبىگۇل تولەگەنوۆاعا قۇرمەت كورسەتىلدى

سەمەي. KAZINFORM - اباي وبلىسىندا قازاقستاننىڭ حالىق ءارتىسى، ك س ر و حالىق ءارتىسى، اباي وبلىسىنىڭ قۇرمەتتى ازاماتى، ءانشى بيبىگۇل تولەگەنوۆانىڭ 95 جىلدىعىنا ارنالعان «قازاقتىڭ بيبىگۇلى - حالىقتىڭ بۇلبۇل ءۇنى» اتتى كونسەرت ءوتتى.

بۇل تۋرالى وبلىستىق اكىمدىكتىڭ باسپا ءسوز قىزمەتى ءمالىم ەتتى.

ءان كەشىندە وتاندىق جانە شەتەلدىك كومپوزيتورلاردىڭ وپەرالارىنان اريالار، حالىق اندەرى، رومانستار، وركەسترلىك شىعارمالار ورىندالدى.

كونسەرتتە امىرە قاشاۋبايەۆ اتىنداعى مەملەكەتتىك فيلارمونيا جانىنداعى «بيبىگۇل» قازاق حالىق اسپاپتار وركەسترى، مادەنيەت سالاسىنىڭ ۇزدىگى نۇربەك ومىربەكوۆ، رەسپۋبليكالىق كونكۋرستاردىڭ لاۋرەاتى، امىرە قاشاۋبايەۆ اتىنداعى مەملەكەتتىك فيلارمونيانىڭ ءانشىسى ايگەرىم توقتىبايەۆا، رەسپۋبليكالىق كونكۋرستاردىڭ لاۋرەاتى، اباي وبلىسى اكىمىنىڭ ەسترادالىق-سيمفونيالىق وركەسترىنىڭ سوليسى ايگەرىم ءاشىروۆا ونەر كورسەتتى.

سونداي-اق، كەش قوناقتارىنىڭ قاتارىندا قازاقستاننىڭ ەڭبەك سىڭىرگەن ءارتىسى مايرا يلياسوۆا، قازاقستاننىڭ ەڭبەك سىڭىرگەن قايراتكەرى تولقىن زابيروۆا، قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ، جۇپار عابدۋللينا، بيبىگۇل تولەگەنوۆانىڭ حالىقارالىق ۆوكاليستەر بايقاۋىنىڭ جەڭىمپازى نۇرجان باجەكەنوۆ سىندى ونەر ساڭلاقتارى بولدى.

«بۇگىن رۋحانياتتىڭ ورداسى سەمەي قالاسىندا ەرەكشە كۇن. قازاقتىڭ شوق جۇلدىزى، الەمگە ايگىلى سوپرانو داۋىسىنىڭ يەسى بيبىگۇل احمەت قىزى تولەگەنوۆانىڭ مەرەيتويىنا ارنالعان مەرەكەلىك كونسەرتكە جينالىپ وتىرمىز. اسا قادىرلى بيبىگۇل احمەت قىزى عاجايىپ داۋسىڭىزبەن قازاق ءان ونەرىن بيىككە كوتەرىپ، ۇلتتىق مادەنيەتىمىزدىڭ اسىل مۇراسىن الەمگە تانىتۋدا قوسقان ۇلەسىڭىز ەلدەن ەرەن. سىزگە مىقتى دەنساۋلىق، باياندى عۇمىر تىلەيمىز. الداعى ۋاقىتتا دا ونەرىڭىزدەن ءنار الىپ، جاستارىمىز ءسىزدىڭ ەڭبەك جولىڭىزدى ۇلگى ەتەدى دەپ سەنەمىز»، - دەدى ءوز قۇتتىقتاۋىندا وبلىس اكىمى نۇرلان ۇرانحايەۆ.

قازاق دالاسىن ءوز اندەرىمەن تەربەتكەن بيبىگۇل احمەت قىزى - حالىقتىڭ ناعىز سۇيىكتىسى. يۋنەسكو ۇيىمى جەرلەسىمىزدى ⅩⅩ عاسىردىڭ كورنەكتى ايەلدەرىنىڭ تىزىمىنە ەنگىزدى. تانىمال تالانت يەسى 1929 -جىلى 16-جەلتوقساندا سەمەي قالاسىندا دۇنيەگە كەلگەن. الماتى مەملەكەتتىك كونسەرۆاتورياسىن (قۇرمانعازى اتىنداعى قازاق ۇلتتىق كونسەرۆاتورياسىن) بىتىرگەن.

كەش بارىسىندا مەرەيتوي يەسى جايلى ەستەلىكتەر ايتىلدى. تۋعان جەرىنىڭ شەكسىز ماحابباتى مەن ىستىق ىقىلاسىنا بولەنگەن بيبىگۇل احمەت قىزى جۇرەكجاردى العىسىن ءبىلدىرىپ، انالىق باتاسىن بەردى.

اۆتور

باقىتگۇل اباي قىزى