اباي وبلىسى سارجال اۋىلىندا قىمىز ءوندىرىسى دامىپ كەلەدى
سەمەي. KAZINFORM - اباي وبلىسى اباي اۋدانىنداعى سارجال اۋىلىندا قىمىز ءوندىرىسى دامىپ كەلەدى.
بۇگىندە وبلىستاعى ەلدى مەكەندەردى دامىتۋ ستراتەگياسى شەڭبەرىندە جول كارتاسى ازىرلەنىپ، جۇزەگە اسىرىلىپ جاتىر. بۇعان اقمولا وبلىسى سەلينوگراد اۋدانىنا قاراستى رودينا اۋىلىنىڭ تابىستى تاجىريبەسى نەگىز بولىپ وتىر.
«رودينا اۋىلىنا بارعان بىلتىرعى ساپارىمىز جاقسى اسەر قالدىردى. ءبىز جەرگىلىكتى وندىرىستىك كاسىپورىنداردىڭ جۇمىسىمەن جان-جاقتى تانىستىق. ەندى سودان كورگەنىمىزدى اباي اۋدانىن دامىتۋ ءۇشىن قولدانامىز. الداعى ۋاقىتتا دا وسىلاي ۇزدىك تاجىريبەلەردى ەسكەرە وتىرىپ، اۋدان تۇرعىندارىنىڭ جايلى ءومىر ءسۇرۋى ءۇشىن جاعداي جاسايمىز»، - دەدى اباي اۋدانى اكىمىنىڭ ورىنباسارى ەربولات اكىمبايەۆ.
اباي اۋدانىنىڭ سارجال اۋىلدىق وكرۋگىندە قىمىز ءوندىرىسى قارقىندى دامىپ كەلەدى. «جارىلعاسىن» شارۋا قوجالىعى 2021 -جىلدان بەرى كۇنىنە 100 ليترگە دەيىن قىمىز وندىرەدى.
قازىرگى ۋاقىتتا كۇن سايىن اۋىل تۇرعىندارى ءۇشىن قىمىز قابىلداپ، ونى ءوندىرۋ جانە ارنايى بوتەلكەلەرگە قۇيۋ بويىنشا جوبا ازىرلەنۋدە. ءوندىرىستى تاۋلىگىنە 5 تونناعا دەيىن ۇلعايتۋمەن بىرگە ءونىمدى رەسپۋبليكالىق نارىققا شىعارۋ جانە قوسىمشا جابدىقتار ساتىپ الۋ كوزدەلۋدە. بۇل ءوز كەزەگىندە جاڭا جۇمىس ورىندارىنىڭ اشىلۋىنا سەپ بولماق. الداعى جوسپار بويىنشا قىمىز قۇيۋعا ارنالعان بوتەلكە شىعاراتىن قۇرىلعىدان باسقا قاجەتتى بىرنەشە جابدىق ساتىپ الۋ مىندەتى تۇر. سونداي-اق قىمىزدىڭ ۇنتاق ءتۇرى مەن ساۋمالدان بالمۇزداق شىعارۋ كوزدەلىپ وتىر.
ايتا كەتەيىك، اباي وبلىسىنىڭ دەلەگاتسياسى رودينا اۋىلىنا تاجىريبە الماسۋ جانە تانىسۋ ماقساتىندا بارىپ قايتقان ەدى. دەلەگاتسيا قۇرامىندا 10 اۋىلدىق وكرۋگ اكىمدەرى مەن ءىرى كاسىپكەرلەر بولعان.
اۆتور
تالعاتجان مۇحامەتبەك ۇلى