مەملەكەت باسشىسى قازاقستان حالىق كەڭەسىنىڭ ءبىرىنشى سەسسياسىندا ەل بىرلىگىن بەكەمدەيتىن ەڭ ماڭىزدى فاكتور -مەملەكەتتىك ءتىل ەكەنىن ناقتى ايتقان ەدى.
- دەگەنمەن مىنا نارسەنى ەستە ۇستاعان ابزال: قازاق ءتىلىن دامىتۋ - ەلىمىزدەگى وزگە تىلدەردىڭ دامۋىنا كەدەرگى كەلتىرۋ ەمەس. باسقاشا ايتقاندا، انا ءتىلىمىزدى باسقا تىلدەرگە قارسى قويۋعا مۇلدەم بولمايدى،-دەدى قاسىم-جومارت توقايەۆ.
پرەزيدەنتتىڭ ايتۋىنشا، تىلدەردى پايدالانىپ، قوعامدىق جانتالاس، جانجال جاساعىسى كەلەتىن ارانداتۋشىلار وتە قاۋىپتى ىستەرمەن اينالىسىپ ءجۇر. سوندىقتان ولاردى «زاڭ مەن ءتارتىپ» قاعيداسىنا سايكەس جاۋاپكەرشىلىككە تارتۋ كەرەك.
- وسى جەردە تاعى دا قايتالاپ ايتقىم كەلەدى: كەز كەلگەن تىلگە قارسى شىعۋ - جاراتقاننىڭ ادامعا بەرگەن نىعمەتىنە قارسى شىعۋمەن بىردەي. ءبىر ءتىلدى باسقا تىلگە قارسى قويۋعا بولمايدى. بۇل - ۇلكەن كۇنا. ونىڭ سالدارىن ءوز كوزىمىزبەن كورىپ جاتىرمىز. ءبىز قازاق ءتىلىن ەڭ الدىمەن بىرلىك پەن ىنتىماق ءتىلى رەتىندە دامىتۋىمىز كەرەك. انا ءتىلىمىز جاھان جۇرتشىلىعىنا تارتىمدى ءتىل بولۋى كەرەك، - دەدى ول.
ق. توقايەۆ ءبىرتۇتاس حالقىمىزدى ءبولىپ-جارۋعا بولمايتىنىن، ءوز تۇتاستىعىن ساقتاي الماعان حالىق باسقالارعا ۇلگى-ونەگە كورسەتە المايتىنىن، باسقا ەلدەردىڭ قۇرمەتىنە ەشقاشان يە بولمايتىنىن جەتكىزدى.
- «بىرلىك بار جەردە تىرلىك بار»، بۇل - ءومىردىڭ تالاي سىناعىنان وتكەن اقيقات. ءبىز ءبىر- بىرىمىزگە قۇرمەت كورسەتىپ، ءوزارا سىيلاستىقپەن قاراپ، ىنتىماعىمىزدى نىعايتا بەرۋىمىز قاجەت»،- دەدى پرەزيدەنت.
پرەزيدەنت قازاق ءتىلىنىڭ ابىروي-بەدەلىن ارتتىرۋ ءۇشىن تاباندى جۇمىس ىستەۋ كەرەكتىگىن ايتۋدا.