اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇل دەرەك «ميگرانت» جەدەل پروفيلاكتيكالىق ءىس- شاراسى كەزىندە انىقتالعان.
«بۇل ءىس-شارانى وتكىزۋدەگى باستى ماقسات - كوشى-قون زاڭدىلىعىن بۇزعان، قازاقستان رەسپۋبليكاسىنىڭ اۋماعىنان ءوز ەركىمەن شىعىپ كەتۋ تۋرالى سوت قاۋلىلارىن ورىنداماعان شەتەلدىكتەردى انىقتاۋ. مەملەكەت زاڭدىلىعىنىڭ تالابىن ورىنداماعان شەتەلدىكتەردى ءماجبۇرلى تۇردە ەلدەن شىعارۋ. وبلىس پوليتسەيلەرى ءىس-شارا كەزىندە كوشى-قون زاڭناماسىن بۇزعان 900 دەن استام شەتەلدىكتى انىقتادى»، - دەپ حابارلادى دەپارتامەنتتىڭ باسپا ءسوز قىزمەتى.
ماسەلەن، 583 شەتەلدىك ەلىمىزدىڭ كوشى-قون زاڭناماسىن بۇزعانى ءۇشىن ق ر اكىمشىلىك قۇقىق بۇزۋشىلىق تۋرالى كودەكسىنىڭ 517-بابىنىڭ 3، 4، 5، 6 جانە 7-بولىگىمەن اكىمشىلىك جاۋاپقا تارتىلعان. ال، شەتەلدىڭ 31 ازاماتىنا اتالعان قۇجاتتىڭ 519-بابىمەن، 372 زاڭسىز «قوناققا» 518-بابىمەن اكىمشىلىك حاتتاما تولتىرىلعان.
سونداي-اق، اكىمشىلىك قۇقىق بۇزعان 31 شەتەلدىك ازاماتتىق ءىس جۇرگىزۋ جانە اكىمشىلىك تارتىبىمەن ەل اۋماعىنان شىعارىلعان. ال، جەكە باسىن انىقتايتىن قۇجاتتاردىڭ بولماۋىنا بايلانىستى وزبەكستان رەسپۋبليكاسىنىڭ 91 ازاماتى قابىلداۋ-تاراتۋ ورنىنا ورنالاستىرىلعان.
ەسكە سالا كەتەلىك، بۇدان بۇرىن وزبەكستاندىق قاريا اتىراۋدا 21 جىل بويى قۇجاتسىز جۇرگەنىن جازعان ەدىك. وزبەكستان رەسپۋبليكاسىنىڭ 72 جاستاعى ازاماتى قازاقستانعا 2000 -جىلدارى كەلگەن. قازاقستاندىق ايەلمەن وتباسىن قۇرعان. ەرلى-زايىپتىلاردىڭ ورتاق بەس بالاسى بار. پوليتسەيلەر شەتەلدىكتىڭ جەكە باسىن انىقتاپ، ەلىنە قايتارۋ ءۇشىن ءتيىستى قۇجاتتار تىزبەسىن وزبەكستان رەسپۋبليكاسىنىڭ اقتاۋ قالاسىنداعى باس كونسۋلدىعىنا جولدادى.
كەيىن اتىراۋ وبلىسىندا 13 جىلدان بەرى قۇجاتسىز جۇرگەن وزبەكستاندىق انىقتالدى.
شەتەلدىك ايەلدىڭ قازاقستان رەسپۋبليكاسىنىڭ اۋماعىنا 2010 -جىلدارى كىرگەنىن انىقتادى. سودان بەرى قۇجاتىنىڭ ەلدە بولۋ مەرزىمى بىتكەنىن بىلە تۇرا، قازاقستان اۋماعىنان شىعىپ كەتپەگەن. قازاقستان ازاماتىنا كۇيەۋگە ءتيىپ، ەكى بالانى دۇنيەگە اكەلگەن. جيناقتالعان ءىس- قۇجاتتارى قىزىلقوعا اۋداندىق سوتىنا جىبەرىلدى.