اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتىنىڭ حابارلاۋىنشا، وقيعا 2010 -جىلدىڭ قاڭتار ايىندا بولعان. تاراز قالاسىنىڭ تۇرعىنى اسىلبەك كۋجانازاروۆ ءوزى بۇرىننان جاقسى كورەتىن تانىسى ايدانى (اتى وزگەرتىلگەن) اتىراۋ قالاسىنا ىزدەپ كەلەدى. ەكەۋى كەزدەسىپ، بىرنەشە كۇننەن كەيىن ا. كۋجانازاروۆ تانىسىنا وزىمەن بىرگە الماتى قالاسىنا بارىپ تۇرۋدى ۇسىنادى. الايدا جۇبايى مەن ءۇش قىزى بار ايدا ونىڭ بۇل ۇسىنىسىنان باس تارتادى.
ءسويتىپ ا. كۋجانازاروۆ كەرى تارازعا كەتۋدى شەشەدى. ايدا ا. كۋجانازاروۆتى شىعارىپ سالۋ نيەتىمەن تەمىرجول ۆوكزالىنا كەلىپ، ول ءوتىنىش ەتكەسىن اراق الىپ بەرەدى. كەيىن پويىز كەلگەنشە سول ماڭداعى كونتەينەر كوشەسى بويىندا سويلەسىپ وتىرىپ، اراققا ماسايعان ا. كۋجانازاروۆ تانىسىنا رەنىشىن بىلدىرە باستايدى. ءبىر ساتتە اشۋعا بۋلىعىپ، ءوزىنىڭ جول سومكەسىندە جاتقان اسحانا پىشاعىن الىپ، ايدانىڭ دەنەسىنە 19 رەت سۇعىپ، اجال قۇشتىرادى. ونىڭ ەس-ءتۇسسىز كۇيىن كورگەننەن كەيىن، دەرەۋ پويىزعا ءمىنىپ كەتىپ قالادى.
تارازعا جەتكەسىن اراق الىپ، اۋىلىنا قاراي جاياۋ جول تارتادى. جول-جونەكەي ءوز-وزىنە قول جۇمساماق ويمەن قولىنىڭ تامىرىن كەسەدى. الايدا قىس ورتاسىندا دالادا ۇيىقتاپ قالىپ، ەكى اياعىن ءۇسىرىپ الادى. كەيىن اياقتارى امپۋتاتسياعا ۇشىرايدى.
مۇگەدەك بولىپ قالعان ا. كۋجانازاروۆ سەگىز جىلدان كەيىن ءوز ەركىمەن كەلىپ، جاساعان قىلمىسىن مويىندايدى.
«اتالعان قىلمىستىق ءىستى اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سۋديا زارەما حاميدۋللينا قارادى. سوت جازا تاعايىنداۋ كەزىندە ونىڭ شىن وكىنىپ كەلگەنىن جانە ەكى اياق جوق مۇگەدەك ەكەنىن ەسكەرىپ، ونى قىلمىستىق كودەكستىڭ 96-بابىنىڭ 1-بولىگىمەن 8 جىل مەرزىمگە باس بوستاندىعىنان ايىرۋ جازاسىنا كەستى. ا. كۋجانازاروۆتىڭ ەندىگى 8 جىل ۋاقىتى قاتاڭ رەجىمدەگى تۇزەۋ كولونياسىندا وتەتىن بولادى. سوت ۇكىمى زاڭدى كۇشىنە ەندى»، دەپ حابارلادى اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.