85 جىل بۇرىن (1931-1999) قوعام جانە مەملەكەت قايراتكەرى، عالىم، تەحنيكا عىلىمدارىنىڭ دوكتورى، پروفەسسور، قازاقستان عىلىم اكادەمياسىنىڭ اكادەميگى، قازاقستاننىڭ ەڭبەك سىڭىرگەن عىلىم قايراتكەرى، س. كيروۆ اتىنداعى قازاق مەملەكەتتىك ۋنيۆەرسيتەتىنىڭ (قازىرگى ءال- فارابي اتىنداعى قازاق ۇلتتىق ۋنيۆەرسيتەتى) قۇرمەتتى پروفەسسورى، قازاقستان مەملەكەتتىك سىيلىعىنىڭ لاۋرەاتى جولداسبەكوۆ ومىربەك ارىسلان ۇلى دۇنيەگە كەلدى.
اكادەميك وڭتۇستىك قازاقستان وبلىسى سايرام اۋدانىندا تۋعان. م. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن بىتىرگەن. 1954-1958 - جىلدارى - قازاق حيميا- تەحنولوگيا ينستيتۋتىنىڭ وقىتۋشىسى، اعا وقىتۋشىسى، مەحانيكا فاكۋلتەتىنىڭ دەكانى. 1958-1962 - جىلدارى - ماسكەۋ توقىما ينستيتۋتىنىڭ اسپيرانتى، اسسيستەنتى. 1962-1970 -جىلدارى - قازاق پوليتەحنيكا ينستيتۋتىنىڭ (قازىرگى قانىش ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتى) اعا وقىتۋشىسى، دوتسەنتى، كافەدرا مەڭگەرۋشىسى، دەكانى، پرورەكتورى. 1970-1986 -جىلدارى - قازاق مەملەكەتتىك ۋنيۆەرسيتەتىنىڭ (قازىرگى ءال- فارابي اتىنداعى قازاق ۇلتتىق ۋنيۆەرسيتەتى) رەكتورى.
قازاق مەملەكەتتىك ۋنيۆەرسيتەتى قالاشىعىنىڭ سالىنۋىنا ۇيىتقى بولىپ، كوپتەگەن جاڭا كافەدرالاردىڭ اشىلۋىنا باسشىلىق جاسادى.
1986-1988 -جىلدارى - قازاق مەملەكەتتىك ۋنيۆەرسيتەتىنىڭ قولدانبالى ماتەماتيكا كافەدراسىنىڭ مەڭگەرۋشىسى. 1988-1994 -جىلدارى - قازاقستان عىلىم اكادەمياسىنىڭ مەحانيكا جانە ماشيناتانۋ ينستيتۋتى زەرتحاناسىنىڭ مەڭگەرۋشىسى، ديرەكتورى، قۇرمەتتى ديرەكتورى. 1994-1995 -جىلدارى - قازاقستان رەسپۋبليكاسى جوعارعى كەڭەسىنىڭ دەپۋتاتى، عىلىم، ءبلىم جانە جاڭا تەحنولوگيالار جونىندەگى كوميتەتىنىڭ ءتوراعاسى. 1995-1996 -جىلدارى - قازاقستان رەسپۋبليكاسى پارلامەنتى سەناتىنىڭ دەپۋتاتى. 1996 -جىلدان ءومىرىنىڭ سوڭىنا دەيىن پارلامەنت ءماجىلىسىنىڭ دەپۋتاتى، الەۋمەتتىك- مادەني دامۋ جونىندەگى كوميتەتىنىڭ ءتوراعاسى قىزمەتتەرىن اتقارعان.
ول 1991 -جىلى حالىقارالىق ينجەنەرلىك اكادەميانىڭ ۆيتسە- پرەزيدەنتى، 1993 -جىلى يسلام ەلدەرى ينجەنەرلىك اكادەمياسىنىڭ ۆيتسە- پرەزيدەنتى، 1997 -جىلى امەريكا ينجەنەر- مەحانيكتەر قوعامىنىڭ مۇشەسى بولىپ سايلانعان. قازاقستان رەسپۋبليكاسى ينجەنەرلىك اكادەمياسىنىڭ نەگىزىن قالاپ، ونىڭ تۇڭعىش پرەزيدەنتى بولدى. ول جازىق رىچاگتى جوعارعى كلاستى مەحانيزمدەر كينەماتيكاسى، كينەتوستاتيكاسى، سەرپىندى بۋىندى مەحانيزمدەر ديناميكاسى سالالارىندا عىلىمي زەرتتەۋلەر جۇرگىزىپ، جازىق جانە كەڭىستىكتىك جوعارعى كلاستى مەحانيزمدەر مەن مانيپۋلياتسيالاۋىش قۇرىلعىلاردىڭ گرافيكتىك- اناليتيكالىق جانە اناليتيكالىق تەورياسىن نەگىزدەدى. سونىڭ ناتيجەسىندە ونىڭ باسشىلىعىمەن الەمدىك تاجىريبەدە تەڭدەسى جوق جاڭا جۇك كوتەرگىش، جۇك تيەگىش- تۇسىرگىش، گرەيدەرلىك، جۇك قارماۋىش جانە مانيپۋلياتسيالاۋىش قۇرىلعىلار جاسالىپ، وندىرىسكە ەنگىزىلدى.
ول قازاق عالىمدارى اراسىندا ءبىرىنشى بولىپ قازاق تىلىندە ماشيناتانۋدىڭ تەرمينولوگيالىق سوزدىگىن جاساپ، ماشينالار مەن مەحانيزمدەر تەورياسى تۋرالى وقۋلىقتار جازدى. اتالعان عىلىم سالالارى بويىنشا عالىمنىڭ 400-دەن اسا عىلىمي ەڭبەكتەرى، 12 مونوگرافياسى جارىق كورگەن. 30-دان اسا وقۋلىقتارى مەن وقۋ قۇرالدارىنىڭ، 126 اۆتورلىق كۋالىك پەن شەتەلدىك پاتەنتتەردىڭ اۆتورى. لەنين، 2 رەت ەڭبەك قىزىل تۋ وردەندەرىمەن، بىرنەشە مەدالمەن، ونىڭ ىشىندە حالىقارالىق جانە رەسەيلىك عىلىمي- ينجەنەرلىك بىرلەستىكتەردىڭ گ. ۆ. شۋحوۆ اتىنداعى التىن مەدالىمەن، ءال- حورەزمي اتىنداعى حالىقارالىق فەستيۆالدىڭ التىن مەدالىمەن، حالىقارالىق ينجەنەرلىك اكادەميانىڭ كۇمىس مەدالىمەن ماراپاتتالعان. ومىربەك جولداسبەكوۆتىڭ ەسىمى مەحانيكا جانە ماشيناتانۋ ينستيتۋتىنا، ءال- فارابي اتىنداعى قازاق ۇلتتىق ۋنيۆەرسيتەتىنىڭ قالاشىعىنداعى ستۋدەنتتەر سارايىنا، ۋنيۆەرسيتەت مۇراجايىنا، سونداي- اق، الماتى جانە شىمكەنت قالالارىنداعى كوشەلەرگە بەرىلگەن.