ءتىپتى، ادام پايعامباردان (وعان اللانىڭ سالەمى بولسىن) باستاپ بۇكىل تۇندەر بىرىكسە دە بۇل قادىر ءتۇنىنىڭ قادىرى مەن بەدەلىنە جەتە المايدى.
بۇل ءتۇن اللا تاعالانىڭ ۇلى ءسوزى قۇرانعا ارنالعان ءتۇن. وسىنداي زور ساۋاپتارعا كەنەلتەتىن مىڭ ايدان دا حايىرلى بولعان قادىر تۇنىندە قانداي امال جاساعان ابزال دەگەن ساۋال ءاربىر مۇسىلماننىڭ ويىنا كەلەرى اقيقات، دەپ جازادى azan.kz.
سول ءۇشىن دە تومەندەگى ءبىرقاتار امالداردى نازارلارىڭىزعا ۇسىنىپ وتىرمىز.
بىرىنشىدەن، ءوزىڭىزدىڭ بارلىق كۇش-جىگەرىڭىزدى سالىپ اللا تاعالادان دۇنيە جانە اقىرەتىڭىزدى قامتىعان قاجەتتىلىكتەرىڭىزدى سۇرايتىن دۇعا جاساڭىز. سەبەبى، راببىمىز بۇل ءتۇنى بارلىق دۇعالاردى قابىل ەتەدى. ەڭ ماڭىزدىسى بۇل ءتۇنى ءوز وتباسىڭىزدىڭ اماندىعى، ەلىمىزدىڭ تىنىشتىعى، مەملەكەتىمىزدىڭ وركەندەۋى، ءدىنىمىزدىڭ ەلىمىزدە كەڭ قانات جايىپ، دامۋىن سۇراپ دۇعا ەتۋدى ەستەن شىعارماڭىز. ەلدىڭ اماندىعى مەن تىنىشتىعى ول - ءبىز بەن ءسىزدىڭ اماندىعىمىز بەن تىنىشتىعىمىز.
ايشا انامىزدان (وعان اللا رازى بولسىن) پايعامبارىمىزدان (اللانىڭ وعان سالاۋاتى مەن سالەمى بولسىن) بىلاي دەپ سۇراعانى باياندالادى: «ۋا، اللانىڭ ەلشىسى، ەگەر مەن قادىر ءتۇنىنىڭ باستالعانى تۋرالى بىلسەم، نە ايتۋىم كەرەك؟»
ول: «اللاھۋمما ينناكا عافۋۋن، كارييمۋن. تۋحيببۋل- عافۋا فاعفۋ عاننيي»
«ۋا، اللا، راسىندا، سەن - كەشىرىمدىسىڭ، كەشىرۋدى جاقسى كورەسىڭ. مەنى كەشىرە گور!»، - دەپ ايت»، - دەدى.
ەكىنشىدەن، اللا تاعالانىڭ وزىڭىزگە بەرگەن كۇللى نىعمەتتەرىن ەسىڭىزگە الىپ، وعان شۇكىرلىك ماقساتىندا ءوزىڭىز بىلەتىن بارلىق پاكتەۋ سوزدەردى ايتىپ اللانى دارىپتەڭىز. (ماسەلەن، ءالھامدۋلليللاھ، سۋبحاناللاھ، اللاھۋ اكبار، ءلاا ءيلااھا يللاللاھ ت. ب.)
ۇشىنشىدەن، وسى كۇنگە دەيىنگى بارلىق كۇنالارىڭىز بەن قاتەلىكتەرىڭىزدى ەسىڭىزگە ءتۇسىرىپ، اللا تاعالانىڭ كەشىرۋىن سۇراپ دۇعا جاساڭىز. سەبەبى، بارلىق كۇنالاردى كەشىرۋشى جالعىز اللا عانا. سونداي-اق، بارشا جاقسىلىقتار مەن باقىتتىڭ كىلتى بولعان «استاعفيرۋللاھ» ءسوزىن شاماڭىز كەلگەنشە كوپ قايتالاڭىز. سانى ماڭىزدى ەمەس.
تورتىنشىدەن، 2 راكات بولسا داناپىل نامازىن وقىپ، نامازىڭىزدىڭ قابىل بولۋىن سۇراڭىز. سول ءتۇنى كىم ءناپىل نامازداردى كوبەيتسە 83 جىل 4 اي ۇزدىكسىز ءناپىل نامازدا بولعان ادام بولاسىز.
بەسىنشىدەن، شاماڭىز كەلەتىن كولەمدە ساداقا بەرىڭىز جانە ساداقاڭىزدىڭ قابىل بولۋىن سۇراپ اللاعا جالبارىنىپ دۇعا ەتىڭىز. وسى كۇنى ەگەر كىم ساداقا بەرگەن بولسا 83 جىل 4 اي ۇزدىكسىز ساداقا بەرگەن بولادى.
التىنشىدان، ارداقتى اللا ەلشىسىنىڭ (وعان اللانىڭ يگىلىگى مەن سالەمى بولسىن): «قيامەت كۇنى ماعان ەڭ جاقىن بولاتىندارىڭ مىنەزدەرى ەڭ كوركەم بولعاندارى»، - دەگەن ءسۇيىنشى حاديستى ەسىڭىزگە الىپ، مىنەزىڭىزدى جاقسى جاققا قاراي وزگەرتۋگە كۇش سالىڭىز. سول كۇنى ءسىز ەشكىمگە ايقايلاپ سويلەمەي، سابىرلى بولىپ جۇرسەڭىز 83 جىل 4 اي سابىرلى بولعان ادام بولاسىز.
جەتىنشىدەن، پايعامبارىمىزدىڭ (وعان اللانىڭ يگىلىگى مەن سالەمى بولسىن): «ءبىر-بىرلەرىڭە سىيلىق بەرىڭدەر، سوندا سۇيىسپەنشىلىكتەرىڭ ارتادى»، - دەگەن ءسوزىن ەسىڭىزگە الىپ، جانىڭىزعا جاقىن ادامعا سىيلىق ۇسىنىڭىز. ونىڭ كولەمى ماڭىزدى ەمەس. سول كۇنى كىم بىرەۋگە سىيلىق بەرىپ، مەيىرىمدىلىك تانىتسا 83 جىل 4 اي مەيىرىمدىلىك تانىتىپ، جاقىن جۇرگەن ادام بولاسىز.
قۇرمەتتى جاماعات، دەنساۋلىق ساقتاۋ ۇيىمى وكىلدەرىنىڭ ايتۋىنشا قالامىزداعى مەنينگيت ينفەكتسياسىنىڭ ازايعاندىعى، مينينگوكوكك ۆيرۋسىنىڭ ءورشۋى توقتاپ، ءبىر قالىپقا تۇسكەندىگى بەلگىلى. سوندىقتان دا، بۇگىندە قورقىنىش سەيىلدى، الاڭداۋشىلىققا جول جوق. دەسەك تە، دەنساۋلىق اللا تاعالانىڭ اماناتى بولعاندىقتان وعان نەمقۇرايلى قاراۋدى شاريعات قۇپتامايدى. ەگەر سول ءتۇنى مەشىتتەردە بولعان بىرەۋدىڭ دەنساۋلىعى سىر بەرىپ، السىزدىك بايقالسا دەرەۋ ۇيىنە قايتىپ، جەدەل جاردەم شاقىرىپ دارىگەرلەرگە قارالۋى قاجەت. قادىر ءتۇنى قۇلشىلىعىن تەك مەشىتتە عانا ەمەس، ۇيدە جاساۋعا دا بولادى. دۇعانىڭ قابىل بولۋى ءۇشىن قاي جەردە بولعانىڭىز ەمەس، ىقىلاستى بولۋ ماڭىزدى.