قازىرگى تاڭدا ارىس قالاسى 17 سەكتورعا ءبولىنىپ، ونداعى جوندەۋ جۇمىستارىنا رەسپۋبليكانىڭ 16 وبلىسىنان جانە نۇر-سۇلتان، الماتى، شىمكەنت قالالارىنان 170 ارنايى بريگادا تارتىلىپ وتىر. 1194 قۇرىلىسشى جوندەۋ جۇمىستارىن باستاپ كەتتى. ولار تۇرعىن ۇيلەردى باعالاۋ جۇمىستارىن جۇرگىزىپ، 435 ءۇيدى قايتا قالپىنا كەلتىرۋدە.
«شىمكەنت قالاسىنا 10- سەكتور بولىنگەن، وندا 694 ءۇي بار. ولاردىڭ سمەتاسى تولىق جاسالىپ، جوندەۋ جۇمىستارى باستالىپ كەتتى. قۇرىلىس جۇمىستارى مەنىڭ تۇراقتى باقىلاۋىمدا، ول الداعى ءبىر ايدا تولىق اياقتالاتىن بولادى»، - دەدى عابيدوللا ءابدىراحىموۆ.
ەسكە سالساق، ارىس قالاسى مەن قالا ماڭىندا 8867 ءۇي بار. سونىڭ 6127 ءۇيى جارىلىستان زارداپ شەككەن. 27 ءۇي تولىقتاي قايتادان سالىنادى. بۇگىندە جارامسىز كۇيگە تۇسكەن جانە زاقىم كەلگەن ۇيلەردى تىركەۋ، شىعىنىن ەسەپتەۋ شارالارى جۇيەلەنۋدە. ءاربىر وبلىس، ءاربىر اۋدان، قالام اكىمدىكتەرى وزدەرىنە بولىنگەن اۋماقتا جۇمىستى باستادى.