كەي وقيعالار جادىمىزدا تەرەڭ ساقتالىپ، جىلدار بويى ۇمىتىلمايدى. ءتىپتى، ءبىرتۇرلى نارسەلەر ەستە قالىپ قويادى: جاپقىش ارتىنان سىعالاپ تۇرعان كۇن ساۋلەسى، ارعى بولمەدەن شىعىپ جاتقان اناڭىزدىڭ داۋىسى نەمەسە اس ۇيدە قۋىرىلىپ جاتقان باۋىرساقتىڭ ءيىسى. بۇلاردى وقيعاعا نەمەسە ارەكەتكە جاتقىزا المايمىز. ءبىراق وسى اسەرلەر وتە ماڭىزدى. ولار بالا جادىندا قانداي دا ءبىر ايماقتى قۇرايدى، سودان كەيىن ول قيىن كەزدە وعان كۇش بەرە الادى. پسيحولوگتار بالا اتا- اناسى جانە بالالىق شاعى تۋرالى ەسىندە قالاتىن باستى 5 نارسەنى ۇسىنىپ وتىر.
1. قاۋىپسىزدىك سەزىمى كەز كەلگەن بالانىڭ جۇرەگىندە ءتۇرلى قورقىنىش بولادى. سونىمەن قاتار، قاۋىپسىزدىكتە بولۋ قاجەتتىلىگى دە بار. مىسالى، بالا قورقىنىشتى تۇستەن كەيىن ونى قۇشاقتاعانىڭىزدى نەمەسە قاراڭعىدا "قۇبىجىقتى" بىرگە قۋىپ جىبەرگەنىڭىزدى ەسىنە ساقتاپ قالادى. الايدا، اشۋلانعان كەزىندە "قۇبىجىققا" اينالاتىن اتا- انا ايقايىن دا ەسىنە ساقتاپ قورقادى. سوندىقتان، پسيحولوگتار بالانىڭ كوزىنشە ۇرىسپاۋعا جانە اشۋىڭىزدى بالادان الماۋعا شاقىرادى. بالا ول كەزدەگى جاعدايدى تۇسىنبەيدى، داۋسىڭىزدىڭ ىرعاعىن عانا ساقتاپ قالادى.
2. اكە- شەشە زەيىنى بالا ماحابباتتى ءسىزدىڭ زەيىنىڭىزبەن ولشەيدى. ول جۇمىسىڭىزدى قويا تۇرىپ، ونىمەن ويناۋعا، بىرگە سەكىرۋگە ازداپ ۋاقىت بولگەنىڭىزدىڭ ءوزىن ەسىنە ساقتاپ قالادى. سوندىقتان، بالامەن سويلەسۋگە، ويناۋعا نەمەسە بىردەڭەنى بىرگە جاساۋعا ۋاقىت ءبولىپ تۇرساڭىز، سوڭىندا سول ساتتەر عانا بالانىڭ ومىرىندەگى ەڭ ماڭىزدى نارسەگە اينالادى.
3. اكە- شەشەسىنىڭ قاتىناسى ماحابباتتىڭ نە ەكەنىن بالا اكە- شەشەسىنىڭ ءبىر- بىرىنە دەگەن قاتىناسىنا قاراپ بىلەدى. سوندىقتان دا كوپ جاعدايدا قىز بالا ءوزىنىڭ اكەسىنە ۇقسايتىن كۇيەۋ بولعانىن قالاسا، ۇل بالا اناسىنا ۇقسايتىن جار ىزدەيدى. جانۇيادا ۇرىس پەن ايقاي كوپ بولعان بالالار كوپ جاعدايدا وتباسى قۇرۋعا قورقادى. سوندىقتان، ءبىر- ءبىرىن جاقسى كورەتىن جانە بەرىك قاتىناستى كورسەتىپ، بالاعا سەنىمدىلىك سەزىمىن سىيلاڭىز.
4. ماقۇلداۋ جانە سىني سوزدەر بالا جۇرەگى پلاستيلين سەكىلدى. ۋاقىت وتە ول پلاستيلين قاتايا تۇسەدى. وندا بالا كەزىندە قالعان ىزدەر ماڭگىلىككە قالادى، ونى وشىرە المايسىز. ءوزىنىڭ ماڭىزدىلىعى، قابىلەتىنىڭ ولشەمى، ءوز دارىنىنا سەنۋى جانە ءوزىن قۇرمەتتەۋى ءسىزدىڭ وعان كىشكەنتاي كەزىندە ايتقان سوزدەرگە تىكەلەي بايلانىستى. اتا- انانىڭ مىندەتى بالانىڭ ارەكەتىن تۇزەپ، تارتىپكە ۇيرەتۋ جانە ولاردىڭ ايتقان سوزدەرى ماحابباتقا، ءپوزيتيۆتى قولداۋعا تولى بولۋى كەرەك.
5. وتباسىلىق ءداستۇر بالالار توسىنسىيلار مەن سىيلىقتاردى ۇناتاتىنى راس. ءبىراق ولار سىزدەر ويلاپ تاپقان داستۇرلەردى قۋانا ەسىنە الىپ وتىرادى. ول اپتانىڭ ءبىر كۇنى ساياباققا شىعۋ، ناۋرىزدا اتقا ءمىنۋ، ءار مەيرامدا دايىندالاتىن قانداي دا ءبىر سالات سياقتى قاراپايىم نارسە بولۋى مۇمكىن.
Massaget.kz