اتالعان سايلاۋ ۋچاسكەسىنىڭ ءتورايىمى قىمبات ىرگەبايەۆانىڭ سوزىنە قاراعاندا، ۋچاسكەدە 3417-سايلاۋشى تىركەلگەن.
«بۇگىن داۋىس بەرۋشىلەردىڭ جوعارى بەلسەندىگىن كۇتىپ وتىرمىز. وتكەن جولعى سايلاۋ كەزىندە ءبىزدىڭ ۋچاسكەگە كەلگەندەردىڭ قاراسى قالىڭ بولدى. سوڭعى 20 كۇندە تۇرعىنداردىڭ كوبىسى بىزگە حابارلاسىپ، مالىمەت الدى. سونىمەن قاتار اسا قۇرمەتپەن بۇل ۋچاسكەدە ەلباسى نۇرسۇلتان ءابىش ۇلىن كۇتتىك. تۇڭعىش پرەزيدەنت وسىعان دەيىنگى بولعان سايلاۋدا دا وسى ۋچاسكەدە داۋىس بەرگەن بولاتىن»، - دەدى ق. ىرگەبايەۆا.
ونىڭ سوزىنە قاراعاندا، ۋچاسكەگە ساعات 06:00 دەن باستاپ بايقاۋشىلار، ب ا ق وكىلدەرى، پرەزيدەنتتىككە كانديداتتاردىڭ سەنىمدى وكىلدەرى كەلىپ تىركەلدى.
«ساعات 07:00 دەن باستاپ تۇرعىندار داۋىس بەرۋگە كەلىپ جاتىر. ولاردىڭ اراسىندا جاستار دا، ەگدە جاستاعى ادامدار دا بار. سوندىقتان بۇگىن سايلاۋشىلارىمىز كوپتەپ كەلەدى دەگەن ويلامىن. ايتا كەتەيىك، تاڭەرتەڭنەن بەرى بايقاۋشىلار تاراپىنان ەسكەرتۋلەر بولمادى»، - دەدى قىمبات ىرگەبايەۆا.
ەسكە سالا كەتسەك، بۇگىن قازاقستان پرەزيدەنتىن كەزەكتەن تىس سايلاۋ باستالدى.
ق ر پرەزيدەنتىنىڭ كەزەكتەن تىس سايلاۋىندا ەل ىشىندە جانە شەت ەلدەردە 9968 داۋىس بەرۋ ۋچاسكەسى جۇمىس ىستەۋدە. سايلاۋ تۋرالى كونستيتۋتسيالىق زاڭعا سايكەس، داۋىس بەرۋ ۋاقىتى ستاندارتتى (ساعات 7:00-20:00 ارالىعى) بولادى. باتىس قازاقستان، اقتوبە، اتىراۋ، ماڭعىستاۋ، قىزىلوردا وبلىستارىندا ۋاقىت ايىرماشىلىعىنا بايلانىستى سايلاۋ ۋچاسكەلەرى جەرگىلىكتى ۋاقىت بويىنشا ساعات 07:00 دە - نۇر-سۇلتان ۋاقىتى بويىنشا ساعات 08:00 دە اشىلدى.