اكىمدىك وكىلدەرىنىڭ ايتۋىنشا، ارىستا ءالى دە جارىلعىش زاتتاردان تازالانباعان سەكتورلار مەن كوشەلەر بار. بيلىك جارىلعىش زاتتاردان تازارتۋ جۇمىستارى سەنبىگە دەيىن جالعاساتىنىن جەتكىزدى.
«تۇركىستان وبلىسى مەن شىمكەنت قالاسىندا قۇرىلعان 66 ەۆاكۋاتسيالىق پۋنكتتە 13187 ارىس تۇرعىنى ورنالاستىرىلعان. ونىڭ 7249 ى - شىمكەنتكە، 5938 ءى وبلىسقا بولىنگەن. مەديتسينالىق كومەككە 277 ادام جۇگىنىپ، ونىڭ 74 ءى اۋرۋحاناعا جاتقىزىلعان. قايتىس بولعان ادامدار سانى -3» دەلىنگەن اكىمدىك حابارلاماسىندا.
26- ماۋسىم كەشكە تۇركىستان وبلىسى وتىرار اۋدانى اقجول اۋىلىندا وتكەن باسپا ءسوز جيىنىندا قازاقستان قورعانىس ءمينيسترىنىڭ ورىنباسارى باقىت قۇرمانبايەۆ وسى ۋاقىتقا دەيىن ارىس قالاسىنان 500 دەن استام جارىلعىش زات شىعارىلعانىن حابارلاعان ەدى.
قۇرمانبايەۆتىڭ ايتۋىنشا، اسكەري قويمانىڭ 70 پايىزى جارىلعان. تۇركىستان وبلىسى اكىمى ءومىرزاق شوكەيەۆ قاۋىپ سەيىلمەگەندىكتەن ارىس تۇرعىندارىن قالاعا كىرگىزۋ 28- ماۋسىمعا شەگەرىلگەنىن ايتتى.
24- ماۋسىم كۇنى تاڭەرتەڭ ارىستاعى اسكەري وق-ءدارى قويماسىندا الدىمەن ءورت شىعىپ، كەيىن جارىلىستار بولعان. دەنساۋلىق ساقتاۋ مينيسترلىگىنىڭ دەرەگىنشە، جارىلىستان ءۇش ادام مەرت بولىپ، 160 تان استام ادام زارداپ شەككەن.
قازاقستان ۇكىمەتىنىڭ حابارلاۋىنشا، جارىلىس بولعان كۇنى 39 مىڭ ادام ءوز كۇشىمەن قالانى تاستاپ شىققان، 3500 ادام تۇركىستان وبلىسى اكىمدىگى ۇسىنعان اۆتوبۋستارمەن شىمكەنتكە جەتكەن. تۇركىستان وبلىسى اكىمدىگىنىڭ مالىمدەۋىنشە، قازىر شىمكەنتتە قىرىققا جۋىق، وبلىستىڭ باسقا اۋداندارىندا جيىرماداي ەۆاكۋاتسيالىق پۋنكت جۇمىس ىستەپ جاتىر. تۇركىستان وبلىسى اكىمدىگى 24- ماۋسىمدا ايماقتا توتەنشە جاعداي جاريالادى.
شىمكەنتكە جەتكىزىلىپ، پۋنكتەردى پانالاپ جاتقان ارىس تۇرعىندارى «بيلىك ۇسىنىپ جاتقان كومەك ماردىمسىز» دەپ شاعىندى. ولار كوبىنەسە بيلىك ەمەس، ەرىكتىلەر مەن حالىق كومەكتەسىپ جاتقانىن ايتادى.
شىمكەنت اكىمى عابيدوللا ءابدىراحىموۆ 26- ماۋسىمدا وتكەن باسپا ءسوز ءماسليحاتىندا ارىس تۇرعىندارىنىڭ «بيلىكتەن ماردىمدى كومەك بولماي جاتىر» دەگەن ءسوزىن جوققا شىعاردى. اكىمنىڭ سوزىنشە، قالاداعى بارلىق پۋنكتە ارىس قالاسىنان كەلگەندەرگە قولدان كەلگەنشە ءتيىستى كومەك كورسەتىلىپ جاتىر.
«ازاتتىق»