بۇل تۋرالى «بايتەرەك» ۇلتتىق باسقارۋ حولدينگىنىڭ باسپا ءسوز قىزمەتىنەن حابارلايدى.
باعدارلاماعا سايكەس «بايتەرەك» حولدينگى مەن ونىڭ ەنشىلەس قۇرىلىمى - قازاقستاندىق يپوتەكالىق كومپانيا تەك سالۋ ەمەس، نارىقتا بار دايىن تۇرعىن ءۇيدى ساتىپ الۋ مۇمكىندىگىنە يە بولادى.
دوڭگەلەك ۇستەل قاتىسۋشىلارىنىڭ ايتۋىنشا، «ايماقتاردى دامىتۋ-2020» باعدارلاماسىن ىسكە اسىرۋدىڭ 5 جىلىنىڭ ىشىندە شامامەن 1483 مىڭ شارشى مەتر ارەندالىق باسپانانى سالۋ جوسپارلانىپ وتىر، بۇل ورتاشا ەسەپپەن العاندا 29 مىڭ پاتەردى قۇرايدى.
الەۋمەتتىك ارەندالىق باسپانانى ۇلەستىرۋ كەزىندە باسىمدىق كوپبالالى جانە تولىق ەمەس وتباسىلار، مۇگەدەك بالالارى بار وتباسىلار، جەتىم بالالار مەن اتا- انا قامقورلىعىنسىز قالعان بالالار، ورالماندار، مەملەكەتتىك قىزمەتكەرلەر، اسكەري قىزمەتكەرلەر، ارنايى مەملەكەتتىك ورگاندار مەن بيۋدجەتتىك ۇيىمداردىڭ قىزمەتكەرلەرىنە بەرىلەدى. بۇل رەتتە تۇرعىن ءۇيدىڭ 50 پايىزى 3 جىلدان از ەمەس ۋاقىت نەكەدە بولىپ، بالالارى (بالاسى) بار جەرگىلىكتى اتقارۋشى ورگانداردىڭ اتىنان كەزەكتە تۇرعانداردىڭ اراسىندا ۇلەستىرىلەدى. ەرلى- زايىپتىلاردىڭ جاسى - 35 جاسقا دەيىن. ءبولىنىپ وتىرعان قاراجاتتاردىڭ قايتارىلۋىن قامتاماسىز ەتۋ ماقساتىندا بارلىق ۇمىتكەرلەر ولاردىڭ تولەۋگە قابىلەتتىلىگى ەسكەرىلىپ تاڭدالادى.
باسپانانى «بايتەرەكتىڭ» ەنشىلەس كومپانياسى - قازاقستاندىق يپوتەكالىق كومپانياسى ساتىپ العان جاعدايدا باسىمدىق كەزەكتە تۇرۋشىلاردىڭ كوپ كولەمىن الۋ جانە اي سايىنعى ارەندالىق تولەمدەردى ازايتۋ ماقساتىندا اۋدانى از پاتەرلەرگە بەرىلەدى. وسىلايشا، ساتىپ الىناتىن پاتەرلەردىڭ ىشىندە ءبىر بولمەلى پاتەردىڭ اۋدانى شامامەن 33 شارشى مەتردى، ەكى بولمەلى پاتەردىڭ اۋدانى - 45 شارشى مەتردەن باستاپ، ءۇش بولمەلى پاتەرلەردىڭ اۋدانى - 62 شارشى مەتردەن باستالادى.
استانا جانە الماتى قالالارىندا جوندەۋدەن وتكىزىلگەن پاتەردىڭ 1 شارشى مەترىنىڭ بازالىق باعاسى 185 مىڭ تەڭگەگە دەيىن، قالعان ايماقتاردا - 150 مىڭ تەڭگەگە دەيىن. باسپانانى نارىقتا ساتىپ الۋ جاعدايىندا ءبىر شارشى مەتردىڭ باعاسى استانا جانە الماتى قالالارى ءۇشىن 200 مىڭ تەڭگەگە دەيىنگى سومانى، ال قالعان ايماقتاردا 165 مىڭ تەڭگەگە دەيىنگى سومانى قۇرايدى.
استانا جانە الماتى قالالارىندا اۋدانى 50 شارشى مەتر ەكى بولمەلى پاتەردىڭ ورتاشا اي سايىنعى ارەندالىق تولەمى 56 مىڭ تەڭگەدەن اسپايدى. باسقا ايماقتاردا ارەندالىق تولەمنىڭ سوماسى 47 مىڭ تەڭگەدەن اسپايدى.
جالپى العاندا، 2015 - جىلى باعدارلاماعا سايكەس ارەندالىق باسپانانىڭ 487 مىڭ شارشى مەترىن نەمەسە 9740 پاتەردى سالىپ، ساتىپ الۋ قاجەت.
اۆتور: قانات مامەتقازى ۇلى