بۇل تۋرالى ورتالىق كوممۋنيكاتسيالار قىزمەتىندەگى بريفينگىدە ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
بريفينگ بارىسىندا باق وكىلدەرى مينيستردەن «جۇمىس بەرۋشىسى جالاقىسىنىڭ 50 پايىزىن عانا تولەپ وتىرعان قىزمەتكەرلەر 42500 تەڭگەگە ءوتىنىم بەرە الا ما؟» دەپ سۇراعان ەدى.
«بۇل 42500 تەڭگە الەۋمەتتىك تولەم جالاقىسىنان ايىرىلعاندارعا عانا بەرىلەدى. سوندىقتان جالاقى مولشەرى تومەندەگەن جاعدايدا الەۋمەتتىك تولەم بەرىلمەيدى. ياعني، بىردە-ءبىر تيىن تولەنبەيتىن اقىسىز دەمالىسقا جىبەرىلگەن جاعدايدا عانا 42500 تەڭگە الۋعا قۇقىعىڭىز بولادى جانە ءوتىنىش بەرە الاسىزدار»، - دەپ جاۋاپ بەردى مينيستر.
سونىمەن قاتار، ول الەۋمەتتىك تولەمدى زاڭسىز العاندار قاراجاتتى قاشان قايتارۋى كەرەكىتىگىن دە اتاپ ءوتتى.
«قاي ۋاقىتتا قايتارعىڭىز كەلسە، سول ۋاقىتتا قايتارا الاسىزدار. ونىڭ مەرزىمى دە، قايتارۋ ءتارتىبى دە جوق. ەگەر ءسىز قاتەلەسكەنىڭىزدى كورىپ تۇرىپ قايتارامىن دەسەڭىز، ونى جاعدايىڭىز كەلگەن كەزدە قايتارىڭىز. قايتارمايمىن دەسەڭىز قايتارمايسىز»، - دەدى ءبىرجان نۇرىمبەتوۆ.
اۆتور: مارلان جيەمباي