اقتوبە قالاسىنىڭ كىشكەنتاي تۇرعىنى 4 جىل بويى بالا كۇتۋشىسى مارياننا فوتەكسۋدىڭ تاربيەسىندە بولدى. بۇعان دەيىن حابارلاعانىمىزداي، قالالىق قورعانشىلىق جانە قامقورشىلىق ورگانى ىزدەۋ جاريالاپ، اناسى استانا قالاسىنان تابىلعان بولاتىن.
قازىرگى ۋاقىتتا اناسى اقتوبەگە كەلىپ، قالا اكىمدىگى جانىنداعى كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى كوميسسيا وتىرىسىن، شەشىمىن كۇتىپ وتىر.
«5 جاستاعى قىزدىڭ اناسى كەشە كەلىپ، كەزدەستى. بالانىڭ جاعدايى جاقسى»، - دەدى «ايالا» ومىرلىك قيىن جاعدايداعى بالالاردى قولداۋ ورتالىعىنىڭ ديرەكتورى ومىربەك تەكەشوۆ.
قازىر 5 جاستاعى قىزبەن پسيحولوگتار جۇمىس ىستەپ جاتىر. اناسىمەن ءبىر رەت كەزدەستى، بىردەن تانىدى.
«ءبىز انا مەن بالانى تابىستىرامىز. كۇندەلىكتى باقىلاۋىمىزعا الىندى. بالا جاقسى تاربيەلەنگەن، ونىمەن قارىم-قاتىناس جاساۋ وڭاي. اناسىن تانىدى، ۇمىتپاعان. قازىرگى ۋاقىتتا بالا اناسىنا بارۋدى ويلاپ وتىر»، - دەدى پسيحولوگ نۇرگۇل باسىعارينا.
بالانى 4 جىل بويى باعىپ-قاققان مارياننا فوتەكسۋ دا «ايالا» ومىرلىك قيىن جاعدايداعى بالالاردى قولداۋ ورتالىعىنا كۇندە بارىپ ءجۇر. ول دا 5 جاستاعى قىزدى اسىراپ العىسى كەلەدى. ءبىراق ءبارىن كوميسسيا شەشپەك.
«مەن كۇندە كەلىپ، قىزىمدى كورىپ كەتەمىن. ءتىپتى كۇنىنە ەكى رەت كەلىپ، جانىندا وتىرامىن. بۇگىن بالانى الىپ كەتۋدى جوسپارلاعان ەدىك. ءبىراق اقتوبە قالاسى اكىمدىگى جانىنداعى كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى كوميسسياسىنىڭ وتىرىسى 14-ناۋرىز كۇنى وتەتىن بولدى. بالا بۇل جەردە قالعىسى كەلمەيدى، جىلايدى. مەن 28-اقپاننان بەرى وسى ورتالىققا ءجيى كەلەمىن»، - دەدى مارياننا فوتەكسۋ.
ول قىزدىڭ تۋعان اناسىمەن دە كەزدەسكەن. كوميسسيا شەشىمىنە ەكى جاق تا كەلىسەتىنىن جەتكىزدى.