بۇل تۋرالى وڭىرلىك كوممۋنيكاتسيالار قىزمەتىندە جۋرناليستەرمەن وتكەن بريفينگتە ايماق باسشىسى ەرمەك مارجىقپايەۆ ايتتى، دەپ حابارلايدى قازاقپارات ءتىلشىسى.
بريفينگتە ايماق باسشىسى ارىس قالاسىنىڭ تۇرعىندارىنا توتەنشە جاعداي ورىن العان كۇننەن بەرى كورسەتىلگەن جانە الداعى ۋاقىتتا كورسەتىلەتىن گۋمانيتارلىق كومەك-قولداۋ تۋرالى ايتىپ بەردى.
«مەملەكەت باسشىسى قاسىم-جومارت توقايەۆتىڭ ارىس قالاسىنا ساپارى بارىسىندا بەرگەن باسىم تاپسىرمالارىنىڭ ءبىرى تۇرعىن ءۇي قورى مەن الەۋمەتتىك نىسانداردى ءبىرىنشى كەزەكتە قالپىنا كەلتىرۋ بولىپ تابىلادى. وسىعان بايلانىستى، ماۋسىمىڭ 27 نەن باستاپ مەنىڭ ورىنباسارىم اسقار مۇرات ۇلى باستاعان جۇمىس توبى ارىس قالاسىنداعى تۇرعىن ۇيلەر مەن ينفراقۇرىلىم نىساندارىن قالپىنا كەلتىرۋ ءۇشىن ارىس قالاسىندا ءجۇر. بۇگىنگى تاڭدا 470 نىساندى تەكسەرۋ جۇرگىزىلۋدە، ونىڭ ىشىندە 205 تۇرعىن ءۇي، 3 الەۋمەتتىك جانە 10 كوممەرتسيالىق نىسان جوندەۋ-قالپىنا كەلتىرۋ جۇمىستارىن جۇرگىزۋدى تالاپ ەتەدى. قازىرگى ۋاقىتتا ۋچاسكەدە 5 كومپانيا جۇمىس ىستەيدى»، - دەدى وبلىس اكىمى.
ايماق باسشىسى ەرمەك مارجىقپايەۆ اتاپ وتكەندەي، بارلىق قاجەتتى قاراجات جەرگىلىكتى بيۋجەتتەن بولىنەتىن بولادى.
ايتا كەتۋ كەرەك، مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، ارىس قالاسىنان 500 دەن استام بالا اقمولا وبلىسىنداعى بالالار لاگەرى مەن ساۋىقتىرۋ ورتالىقتارىندا دەمالاتىن بولادى. قازىرگى كەزدە، 145 بالادان تۇراتىن العاشقى توبى بۋراباي كۋرورتىنداعى «زۆەزدنىي» جانە «سامۇرىق» بالالار لاگەرىندە دەمالىپ جاتىر.