بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى. «بالا كۇتىمىنە بايلانىستى دەمالىستا جۇرگەندەردى بولەك ساناتقا بولمەيمىز. ولار دا بارلىق ازاماتتار سياقتى الەۋمەتتىك تولەمگە ءوتىنىش بەرە الادى. ءبىراق، دەكرەتتە جۇرگەن ايەلدەرگە قاتىستى ءبىر ەرەكشەلىك بار. تاعى دا ايتام، ولارعا 1 جىلعا دەيىن بالا كۇتىمىنە بايلانىستى جاردەماقى تولەنەدى. ال بالاسى 1 جاستان اسقاندارعا 42500 تەڭگە الەۋمەتتىك تولەم الۋعا بولادى. ماسەلەن، ءبىر ايەل كومپانيادان 3 جىلعا دەيىن اقىسىز دەمالىستا ءجۇر. وسىعان بايلانىستى ءبىز سىزدەرگە ءوزىن-ءوزى جۇمىسپەن قامتىعاندار رەتىندە ءبىر رەت ءبىرىڭعاي جيىنتىق تولەمىن جاساۋعا رۇقسات بەرەمىز»، - دەدى ول.
ونىڭ ايتۋىنشا، مينيسترلىك دەكرەتتەگى ايەلدىڭ رەسمي نە بەيرەسمي جۇمىس ىستەگەندىگىن دالەلدەي المايدى.
«سوندىقتان بالاسى 1 جاستان اسقان دەكرەتتەگى ايەلدەر ۇيدە تىگىنشىلىكپەن، تاعام ءپىسىرىپ ساتۋمەن اينالىسسا، ءبىراق، ەش جەردە تىركەلمەسە، وندا ب ج ت تولەپ، ءوزىن- ءوزى جۇمىسپەن قامتىعان دەپ بەلگى قويۋ ارقىلى ءوتىنىش بەرە الادى. ءبىز الەۋمەتتىك تولەم تولەيمىز. تەكسەرگەندە 1 جاستان اسقان بالاسىنىڭ بار- جوعىن عانا قارايمىز»، - دەدى مينيستر.
ءبىرجان نۇرىمبەتوۆ بۇدان بولەك، قازىرگى ۋاقىتتا بالا كۇتىمىمەن ۇيدە وتىرعان مەملەكەتتىك قىزمەتتە ىستەيتىن ايەلدەرگە 42500 تەڭگەدەن تولەۋ ماسەلەسى قاراستىرىلىپ جاتقانىن ايتتى.
«توتەنشە جاعدايعا بايلانىستى مەملەكەتتىك ورگانداردىڭ، قىزمەتتەردىڭ جۇمىسى شەكتەلگەن. سوندىقتان بىرىنشىدەن، پرەزيدەنتتىڭ تاپسىرماسى بويىنشا 80، ءتىپتى 100 پايىزعا دەيىن قاشىقتان جۇمىس ىستەپ جاتىر. ەكىنشىدەن، دەكرەتتە وتىرعان انالار ب ج ت تولەي المايدى. سەبەبى مەملەكەتتىك قىزمەتكەرلەر كاسىپكەرلىكپەن اينالىسا المايدى، زاڭمەن تىيىم سالىنعان. مۇنداي جاعدايدا دەكرەتتە وتىرعان مەملەكەتتىك قىزمەتشىلەر قايتادان جۇمىسقا شىعا الاسىزدار. ياعني، مەملەكەتتىك ورگان ءسىزدى قايتادان قاشىقتان جۇمىس ىستەۋگە الىپ، جالاقى تولەسىن. باسقا جاعدايلاردا ءبىز بارلىق مەملەكەتتىك ورگاندارعا «بالا كۇتىمىنە بايلانىستى ۇيدە وتىرعان ايەلدەردىڭ جاعدايىن شەشىڭىزدەر» دەپ حات جولدادىق»، - دەدى مينيستر.