سەنبى كۇنى ەلوردانىڭ بەيبىتشىلىك كوشەسىندەگى كوپقاباتتى ۇيدەن ءورت شىققان بولاتىن. وقيعا كەزىندە ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى نۇرسۇلتان ىسماعۇلوۆ 3 بالانى قۇتقاردى.
«جاس جىگىتتىڭ سوزىنە قۇلاق تۇرسەك، ول دوستارىمەن بىرگە ساياباقتا سەرۋەندەپ جۇرگەن. سىنعان تەرەزەنىڭ داۋسى مەن ادامداردىڭ ايعايىن ەستىگەن ول دوستارىمەن بىرگە وقيعا ورنىنا جەتتى. ولار كەلگەندە تەرەزەدەن ەر ادام كومەككە شاقىرىپ، «4 بالامدى قۇتقارىڭدارشى» دەپ ايعايلاپ جاتقان. 21 جاستاعى نۇرسۇلتان ەش ويلانباستان ءۇي جانىنداعى دۇكەننىڭ شاتىرى ارقىلى 2-قاباتقا ورمەلەپ شىعىپ، پاتەردىڭ تەرەزەسىن سىندىرعان. وسىلايشا ول ءۇش جەتكىنشەكتى جانىپ جاتقان ۇيدەن الىپ شىقتى. وتاعاسى مەن تاعى ءبىر بالانى سول ساتتە كەلىپ جەتكەن ءورت سوندىرۋشىلەر باسپالداق ارقىلى قۇتقاردى» دەلىنگەن حابارلامادا.
نۇرسۇلتان ىسماعۇلوۆ - قوستاناي وبلىسى ارقالىق قالاسىنىڭ تۋماسى. ەۋرازيا ۇلتتىق ۋنيۆەرسيتەتى اقپارات جانە تەحنولوگيا فاكۋلتەتىنىڭ 2-كۋرسىندا وقيدى.
نۇر-سۇلتان قالالىق توتەنشە جاعدايلار دەپارتامەنتى جاس جىگىتكە باتىلدىعى مەن وجەتتىگى ءۇشىن العىس ايتتى. دەپارتامەنت باسشىلىعى باتىردى ماراپاتتاۋدى ۇيعارىپ وتىر.