بالا تۋۋ كورسەتكىشى مەن ءومىر ءسۇرۋ ۇزاقتىعى، حالىق تابىسى مەن ءومىر ءسۇرۋ دەڭگەيى ءوستى. سونىمەن قاتار، حالىقتىڭ شىعىنى دا ءوستى. وسى جىلدار ىشىندە قازاقستانداعى ماڭىزدى الەۋمەتتىك ازىق- تۇلىك ونىمدەرى باعاسى قالاي وزگەردى - Tengrinews.kz ءتىلشىسى ماتەريالىندا.
ازىق- تۇلىكتىڭ ورتاشا باعاسى تۋرالى اقپاراتتى ۇلتتىق ستاتيستيكا بيۋروسى ۇسىندى. قازاقستاندا ازىق- تۇلىك باعاسىنا 1993 -جىلدان باستاپ، ياعني ەلدە ۇلتتىق ۆاليۋتا تەڭگە ەندى اينالىمعا ەنگەن كەزدەن باستاپ مونيتورينگ جۇرگىزىلىپ كەلەدى.
1993 -جىلى ازىق- تۇلىك قورجىنى 73 تەڭگە 28 تيىن بولعان. ءدال وسى ونىمدەر بۇگىن 11508 تەڭگە تۇرادى.
العاشقى جىلدارى ازىق- تۇلىك باعاسى تەز جانە بىرنەشە ەسە ءوستى. ءونىم نەعۇرلىم ارزان بولسا، سوعۇرلىم قىمباتتاي ءتۇستى. مىسالى، جەتى جىل ىشىندە ايران مەن تۇز 126 جانە 163 ەسە قىمباتتادى. قىمباتشىلىق ءسابىز بەن كۇنباعىس مايىنا از اسەر ەتكەن، ءبىراق ولار 1993 -جىلدان 2000 -جىلعا دەيىن 9,3 جانە 9,9 ەسە وسكەن.
جالپى، تاۋەلسىزدىكتىڭ العاشقى ون جىلىندا ازىق- تۇلىك سەبەتى شامامەن 91 ەسە قىمباتتاعان.
2000 -جىلى ازىق- تۇلىك سەبەتى 1782 تەڭگە بولدى. وسى ۋاقىتتان باستاپ ونىمدەردىڭ قىمباتتاۋ جىلدامدىعى باسەڭدەدى. كەلەسى 10 جىل ىشىندە ونىمدەر ورتاشا ەسەپپەن 2-3 ەسە قىمباتتادى. ەڭ باستىسى، سۇزبە 4 ەسە قىمباتتادى. سونداي- اق، كۇرىش (3,2 ەسە) ، سيىر ەتى، ءسۇت جانە ءسابىز (3,1 ەسە) ەداۋىر قىمباتتاعان ونىمدەر قاتارىندا. جۇمىرتقا مەن تۇز باعاسىنىڭ ءوسۋى باياۋ - 1,8 ەسە.
2010 -جىلدىڭ اياعىنان 2021 -جىلدىڭ قاراشاسىنا دەيىن ەڭ ماڭىزدى تاماق ونىمدەرى ورتاشا ەسەپپەن ەكى ەسە قىمباتتاعان. سارى ماي قىمباتتادى - 3,3 ەسە، سيىر ەتى - ءۇش ەسە. قانت پەن تۇز باعاسى باياۋ وسكەن - ونىمدەر 10 جىل ىشىندە تەك 50 پايىزعا قىمباتتاعان.
ايتا كەتەيىك، ازىق- تۇلىك باعاسى حالىقتىڭ تابىسىنا سايكەس ءوستى. مىسالى، 1993 -جىلى حالىقتىڭ ورتاشا جان باسىنا شاققانداعى اتاۋلى اقشالاي تابىستارى بار بولعانى 529 تەڭگە. 2000 -جىلى ورتاشا جالاقى 6352 تەڭگەگە دەيىن ءوستى، ال 2010 -جىلى قازاقستاندىقتار ورتاشا ەسەپپەن 39 مىڭ تەڭگەدەن اسا تابىس تاپقان.
2020 -جىلعى قورىتىندى بويىنشا حالىقتىڭ ورتا ەسەپپەن جان باسىنا شاققانداعى اتاۋلى اقشالاي تابىسى 116126 تەڭگە بولعان.