بيىل جازدا 300 مىڭعا جۋىق بالا لاگەردە تەگىن دەمالادى

نۇر- سۇلتان. قازاقپارات - بالالار قۇقىقتارىن قورعاۋ كوميتەتىنىڭ ءتوراعاسى ەرجان ەرسايىنوۆ بالالاردىڭ جازعى دەمالىسىن ۇيىمداستىرۋعا قانشا قارجى بولىنەتىنىن ايتتى، دەپ حابارلايدى قازاقپارات ءتىلشىسى.

 «حالىقتىڭ الەۋمەتتىك وسال توپتارىنان شىققان بالالاردىڭ جازعى دەمالىسى مەن ساۋىقتىرىلۋىنا قارجىلاي جانە ماتەريالدىق كومەك كورسەتۋگە جەرگىلىكتى بيۋدجەتتەن 3 ميلليارد 873 ميلليون 417 مىڭ تەڭگە ءبولىندى»، - دەيدى كوميتەت ءتوراعاسى.

سونداي- اق، ەرجان ەرسايىنوۆ مۇنداي باسىمدىق وقۋدا ۇزدىك ناتيجە كورسەتكەن وقۋشىلار مەن دارىندى بالالارعا، رەسپۋبليكالىق جانە حالىقارالىق وليمپيادالاردىڭ جەڭىمپازدارىنا دا بەرىلەتىنىن ءسوز ەتتى.

«جالپى، بۇل جازدا تەگىن دەمالىسپەن كوپبالالى نەمەسە تۇرمىسى تومەن وتباسىلاردا تاربيەلەنىپ جاتقان 290 مىڭنان استام بالانى قامتۋ جوسپارلانعان»، - دەدى ەرجان ەرسايىنوۆ.

اۆتور: ەسىمجان ناقتىباي