اتاۋلى كۇندەر
حالىقارالىق ءبي كۇنى
بۇل مەرەكە يۋنەسكونىڭ شەشىمىمەن 1982-جىلدان باستاپ فرانسۋز بالەتمەيستەرى، ءبي ونەرىنىڭ رەفورماتورى ءارى تەورەتيگى جان جورج نوۆەردىڭ (1727-1810) تۋعان كۇنىنە وراي اتالىپ وتەدى.
حالىقارالىق شۋدان قورعاۋ كۇنى
جىل سايىن ءساۋىردىڭ سوڭعى سارسەنبىسىندە اتاپ وتىلەدى. وعان 1996-جىلى امەريكانىڭ Center for Hearing in Communication ۇيىمى ۇيىتقى بولدى.
حيميالىق قارۋ قولدانۋ قۇرباندارىن ەسكە الۋ كۇنى
جىل سايىن 2005-جىلدان بەرى اتالىپ وتەدى. بۇل كۇندى تاڭداۋ سەبەبى - 1997-جىلعى 29- ساۋىردە حيميالىق قارۋدى ازىرلەۋ، ءوندىرۋ، جيناۋ جانە قولدانۋعا تىيىم سالۋ تۋرالى كونۆەنتسيا كۇشىنە ەندى.
كاسىبي اكىمشىلىك قىزمەتكەرلەر كۇنى
جىل سايىن ءساۋىردىڭ سوڭعى تولىق اپتاسىنىڭ سارسەنبىسىندە تويلانادى. وسى كۇندى كەڭسەلەردىڭ جانە اكىمشىلىك قۇرىلىمداردىڭ بارلىق قىزمەتكەرلەرى - رەسەپشن جۇمىسكەرلەرىنەن باسشىلاردىڭ كومەكشىلەرىنە دەيىن اتاپ وتەدى.
ەستە قالار وقيعالار
1911-جىلى اعىلشىن كاسىپكەرلەرى قازعان دوسسور كەن ورنىنان مۇناي مۇناراسى اتقىلاپ شىقتى. ۇڭعىمادان 30 ساعات بويى مۇناي اتقىلاپ، 16700 پۇت مۇناي الىندى.
1936-جىلى «الماتى اقشامى» گازەتىنىڭ («سوتسياليستىك الماتى») العاشقى ءنومىرى جارىق كوردى. ونىڭ بەتتەرىندە ەكونوميكا، قالا شارۋاشىلىعى، مادەنيەت، مەديتسينا، ءبىلىم بەرۋ جانە تاربيە ماسەلەلەرىنە ارنالعان ماقالالار جاريالاندى.
1940-جىلى قازاق مەملەكەتتىك اكادەميالىق دراما تەاترىندا عابيت مۇسىرەپوۆتىڭ «قوزى كورپەش - بايان سۇلۋ» پەساسىنىڭ پرەمەراسى ءوتتى.
1992-جىلى الماتىدا تۇركيانىڭ قازاقستانداعى ەلشىلىگىنىڭ اشىلۋ سالتاناتى بولدى.
2002-جىلى «قازاقستان رەسپۋبليكاسى پرەزيدەنتى جانىنداعى ۇلتتىق كەڭەستى قۇرۋ تۋرالى» جارلىق شىقتى.
2006-جىلى الماتىدا احمەت جۇبانوۆ مۇراسىن زەرتتەۋگە ارنالعان مەموريالدىق مۇراجاي اشىلدى. اكادەميك احمەت جۇبانوۆ - كاسىبي قازاق مۋزىكاسىنىڭ نەگىزىن سالعان، اسا كورنەكتى كومپوزيتور، ديريجەر، مۋزىكاتانۋشى، ەتنوگراف، ۇستاز جانە قوعام قايراتكەرى.
2011-جىلى ش. ايتماتوۆ پوۆەسىنىڭ جەلىسىمەن رەجيسسەر ارداق ءالىمقۇلوۆتىڭ «قوش بول، گۇلسارى!» فيلمى يرانداعى ءبىرىنشى حالىقارالىق كينوفەستيۆالدىڭ ارنايى جۇلدەسىن جەڭىپ الدى.
2011-جىلى الماتىدا ك س ر و حالىق ءارتىسى، حالىق قاھارمانى، رەجيسسەر ازەربايجان مامبەتوۆكە ارنالعان مەموريالدىق تاقتا اشىلدى. ول قازاق مادەنيەتىنىڭ كورنەكتى قايراتكەرى تۇرعان ۇيگە ورناتىلدى.
2017-جىلى قازاقستاندا العاش رەت سىبايلاس جەمقورلىققا قارسى ءىس-قيمىل تۋرالى ۇلتتىق بايانداما قابىلداندى. قۇجاتتا جەمقورلىققا قارسى كۇرەس سالاسىندا قابىلدانعان زاڭنامالىق شارالارعا جاسالعان شولۋ، قازىر بار پروبلەمالاردى تالداۋ، سونداي-اق ولاردى شەشۋ بويىنشا ۇسىنىستار قامتىلعان.
2017-جىلى بەيجىڭنىڭ شينحۋا ۋنيۆەرسيتەتىندە ازيا ۋنيۆەرسيتەتتەرى اليانسىنىڭ قۇرىلتاي ءسامميتى ءوتتى.
ايتا كەتەيىك، نازاربايەۆ ۋنيۆەرسيتەتى - وسى اليانستىڭ مۇشەسى. وعان قازاقستاندىق ۋنيۆەرسيتەتپەن قاتار تايلاند، گونكونگ، ق ح ر، ءۇندىستان، ساۋد ارابياسى، سينگاپۋر، وڭتۇستىك كورەيا، ب ا ءا، يندونەزيا، مالايزيا، جاپونيادان جالپى 15 جوعارى وقۋ ورنى كىرەدى.
2018-جىلى يتاليانىڭ پەزارو قالاسىندا مەملەكەتتىك «Forte trio» تريوسى جانە «قازاق كونسەرت» مەملەكەتتىك كونسەرت ۇيىمىنىڭ «استانا سازى» فولكلور ءانسامبلى د ج. روسسيني اتىنداعى ⅩⅤ حالىقارالىق مۋزىكا كونكۋرسى اياسىندا «حالىق اندەرى» اتالىمى بويىنشا ءبىرىنشى ورىندى جەڭىپ الدى.
فەستيۆالدا يتاليانىڭ ونەرسۇيەر قاۋىمى قۇرمانعازى، كەتبۇعا، ىقىلاس، د. نۇرپەيىسوۆا، س. تۇرىسبەك سىندى كومپوزيتورلاردىڭ كۇيلەرىن ۇيىپ تىڭدادى. تاڭداۋلى تۋىندىلاردى ا. ورمانبەكوۆ، ن. ياكيايەۆ جانە ا. وماروۆتار قوبىز جانە دومبىرامەن ورىندادى.
حالىقارالىق كونكۋرس قورىتىندىلارى بويىنشا قازاقستاندىق ونەرپازدار د ج. روسسيني اتىنداعى ارناۋلى سىيلىقتىڭ يەگەرلەرى اتاندى.
2019-جىلى قازاقستاندا ەرىكتىلەر قوزعالىسىن دامىتۋ بويىنشا qazvolunteer.kz فۋنكتسيونالدىق ونلاين-پلاتفورماسى ىسكە قوسىلدى. ونىڭ فۋنكتسيونالدىق مۇمكىندىكتەرى ەرىكتىلەرگە جاڭا باستامالاردى ىسكە اسىرۋعا، ءوز قىزمەتى تۋرالى اقپاراتقا اشىق قول جەتكىزۋگە، جوبالاردى، اكسيالاردى جانە ءىس-شارالاردى ۇيىمداستىرۋشىلارعا ەرىكتىلەر مەن ەرىكتىلەر ۇيىمدارىن تابۋعا مۇمكىندىك بەرەدى.
ونلاين-پلاتفورما قولدانۋشىلارى ەرىكتىلەر قىزمەتىنىڭ حالىقارالىق تاجىريبەسى، ەلدەگى ەرىكتىلەر قىزمەتىنىڭ وڭ تاجىريبەسى، وتكىزىلگەن جانە جوسپارلانعان ءىس-شارالار جانە تاعى باسقا اقپاراتتارمەن تانىسا الادى.
2019-جىلى نۇر-سۇلتان قالاسىندا قازاقستان رەسپۋبليكاسىنىڭ تۇڭعىش پرەزيدەنتى - ەلباسى اتىنداعى ۇلتتىق ۋنيۆەرسيتەت بازاسىندا ت م د ەلدەرىنىڭ اسكەري وقۋ ورىندارى قاۋىمداستىعىنىڭ ءبىرىنشى وتىرىسى ءوتتى.
قاۋىمداستىق قازاقستاندىق تاراپتىڭ باستاماسىمەن قۇرىلدى. ونى قۇرۋ اسكەري ءبىلىم بەرۋ سالاسىنداعى ىنتىماقتاستىقتى دامىتۋعا، اسكەري عىلىمي-پەداگوگيكالىق كادرلاردى دايارلاۋ، ولاردى كاسىبي قايتا دايارلاۋ جانە بىلىكتىلىگىن ارتتىرۋ ماسەلەلەرى بويىنشا ءبىزدىڭ جوعارى اسكەري وقۋ ورىندارىنىڭ ءوزارا ءىس-قيمىلىن ۇيلەستىرۋگە مۇمكىندىك بەرەدى.