280 ميلليون پارا العان تالدىقورعان قالاسى ءبىلىم ءبولىمىنىڭ باسشىسى سوتتالدى
تالدىقورعان. KAZINFORM - وسى جىلدىڭ 17-شىلدەسىندە جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى تالدىقورعان قالاسىنىڭ ءبىلىم ءبولىمىنىڭ باسشىسى ج. جولدىحانوۆقا قاتىستى ۇكىم شىعاردى.
سىبايلاس جەمقورلىققا قارسى ءىس- قيمىل اگەنتتىگىنىڭ مالىمەتىنشە، ول بيۋدجەت قاراجاتىن جىمقىرۋ فاكتىلەرىن جاسىرعانى جانە جۇمىستان بوساتپاعانى ءۇشىن وسى ءبولىمنىڭ باس بۋحگالتەرىنەن 280 ميلليون تەڭگە كولەمىندە پارا العانى ءۇشىن كىنالى دەپ تانىلدى. ج. جولدىحانوۆ 11 جىلعا باس بوستاندىعىنان ايىرىلدى جانە ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى. الدىن الۋ شارالارى اياسىندا تىڭداۋلار سوتتالعان ۇجىمنىڭ قاتىسۋىمەن ءوتتى.
280 ميلليون پارا العان تالدىقورعان قالاسى ءبىلىم ءبولىمىنىڭ باسشىسى سوتتالدى
ۇكىم زاڭدى كۇشىنە ەنگەن جوق.
«جەتىسۋ وبلىسىندا سىبايلاس جەمقورلىققا قارسى قىزمەت ۇيىمداسقان قىلمىستىق توپ قۇرۋ جانە وعان بيۋدجەت قاراجاتىن جىمقىرۋ ماقساتىندا قاتىسۋ فاكتىسى بويىنشا تالدىقورعان قالاسىنىڭ ءبىلىم ءبولىمىنىڭ لاۋازىمدى تۇلعالارىنا قاتىستى بۇرىن باستالعان تەرگەۋدى اياقتاعانىن ەسكە سالامىز. تۇراقتى ۇيىمداسقان قىلمىستىق توپ 2020 -جىلدىڭ قاڭتارى مەن 2023 -جىلدىڭ ناۋرىز ارالىعىندا تالدىقورعان قالاسىنىڭ اۋماعىندا قۇقىقبۇزۋشىلىق ءىس- ارەكەتتەرمەن اينالىستى. ولار جۇيەلى تۇردە ءبىلىم بەرۋ سالاسىندا ناقتى جۇمىس ىستەمەگەن جەكە تۇلعالارعا، سونداي-اق وزدەرىنىڭ جەكە شوتتارىنا جالاقى اۋدارۋ ارقىلى بيۋدجەت قاراجاتىن جىمقىردى»، - دەلىنگەن حابارلامادا.
قىلمىستىق ارەكەتتەردىڭ ناتيجەسىندە مەملەكەتكە 4,3 ميلليارد تەڭگە كولەمىندە زالال كەلتىرىلدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.