بۇل تۋرالى بۇگىن ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.
ونىڭ سوزىنشە، كانديداتتاردى تىركەۋ اعىمداعى جىلدىڭ 11 - مامىرى كۇنى ساعات 18:00 گە دەيىن جالعاسادى. كانديدات رەتىندە تىركەلۋ ءۇشىن ۇسىنىلعان تۇلعا 2019 -جىلعى 1 -ساۋىردەگى جاعداي بويىنشا ءوزىنىڭ جانە جۇبايىنىڭ كىرىستەرى مەن مۇلىك تۋرالى دەكلاراتسيالار تاپسىرعانى جونىندە مەملەكەتتىك كىرىس ورگانىنىڭ انىقتاماسىن، ءوزىنىڭ دەنساۋلىق جاعدايى تۋرالى مەديتسينالىق قورىتىندىنى تاپسىرۋى قاجەت. تاپسىرىلعان دەكلاراتسيالاردا كانديداتتىڭ كىرىستەرى مەن مۇلكى تۋرالى مالىمەتتەردىڭ راس ەمەستىگى انىقتالعان جاعدايدا ورتالىق سايلاۋ كوميسسياسى كانديداتتى تىركەۋ كۇشىن جويا الادى.
پرەزيدەنتتىككە كانديداتتاردى قولداۋ وبلىستاردىڭ، رەسپۋبليكالىق ماڭىزى بار قالالاردىڭ جانە ەلوردانىڭ كەمىندە 2/3 بولىگىن تەڭ دارەجەدە بىلدىرەتىن سايلاۋشىلاردىڭ كەم دەگەندە 1 پايىزىنىڭ قولدارىن جيناۋمەن راستالادى.
2019 -جىلعى 1 - قاڭتارداعى جاعداي بويىنشا، ق ر و س ك ەلىمىزدە داۋىس بەرۋ قۇقىعى بار 11814019 ازاماتتى سايلاۋشىلار تىزىمىنە قوسقان. وسىلايشا ءاربىر كانديداتتى قولداۋ ءۇشىن 118140 سايلاۋشىنىڭ ءتۇپنۇسقالى قولى جينالۋى ءتيىس. قول جيناۋدى پرەزيدەنتتىككە كانديداتتاردىڭ سەنىم بىلدىرگەن ادامدارى ۇيىمداستىرادى.