نىسان بيىل قىركۇيەك ايىندا قولدانىسقا بەرىلەدى. مامانداردىڭ ايتۋىنشا، قۇرىلىس جۇمىستارىنا ەل ازاماتتارى تارتىلىپ، وتاندىق ماتەريالدار قولدانىلىپ جاتىر.
قازىر EXPO اۋماعىندا 7 مىڭعا جۋىق ادام قىزۋ جۇمىس ىستەپ جاتىر. 400 دەي تەحنيكا تارتىلعان. قۇرىلىسشىلار ءبىر ءسات تە دەمالماستان، كۇندىز-ءتۇنى 2-3 اۋىسىممەن ەڭبەك ەتۋدە. باستىسى - ولاردىڭ دان استامى قازاقستان ازاماتتارى.
ويرات كاميبايەۆ، «استانا EXPO-2017» قۇرىلىس ديرەكسياسى بولىمشەسى باس ديرەكتوردىڭ ءبىرىنشى ورىنباسارى:
- اعىمداعى جىلدىڭ قىركۇيەك ايىندا بارلىق كورمە نىساندارىنىڭ قۇرىلىسى اياقتالادى دەپ سەنىممەن ايتا الامىن. كورمە نىسانىن سالۋ جۇمىستارى بەلگىلەنگەن مەجەدە اياقتالاتىنىنا ەش كۇمان جوق. كوكتەمدە قۇرىلىسشىلاردىڭ سانى 12 مىڭعا دەيىن جەتەدى دەگەن جوسپار بار.
ال EXPO نىڭ باس نىشانى بولاتىن شار تارىزدەس 8 قاباتتى عيماراتتىڭ قاڭقاسى 1 ايدان كەيىن جاسالىپ بىتەدى. ەلىمىزدە تەڭدەسى جوق ديامەترى 80 مەترلىك بۇل نىسان تىگىنەن جانە كولدەنەڭ بۇگىلەتىن شىنىمەن قاپتالادى. قۇرىلىس جۇمىستارىنا 2 شەتەلدىك، 5 قازاقستاندىق كومپانيا تارتىلعان. قولدانىلعان ماتەريالداردىڭ دەرلىگى دە ەلىمىزدە شىعارىلعان. ماسەلەن بۇگىنگە دەيىن 232 وتاندىق وندىرۋشىدەن 32 ميلليارد تەڭگەدەن اساتىن قارجىعا تاۋار ساتىپ الىندى.
نۇركەن اليەۆ، «استانا EXPO-2017» ۇ ك» دەپارتامەنت ديرەكتورىنىڭ ورىنباسارى:
- ءبىز ەلباسىنىڭ تاپسىرماسىنا ساي وتاندىق ۇلەستى ارتتىرۋ ءۇشىن ەلىمىزدىڭ بارلىق وڭىرىمەن كەلىسىم جاساسىپ، بىرلەسىپ جۇمىس ىستەۋدەمىز. ماسەلەن استانادان قۇم مەن قيىرشىق تاس جانە بەتون ونىمدەرىن الساق، قاراعاندىدان ارماتۋرا سىندى ونىمدەردى جەتكىزەمىز. الداعى ۋاقىتتا دا وتاندىق تاۋار وندىرۋشىلەرمەن بىرلەسكەن جۇمىستى جالعاستىرا بەرەمىز. بۇل ولارعا وزدەرىنىڭ شىعارىپ وتىرعان ونىمدەرىنىڭ كولەمىن ۇلعايتىپ، قوسىمشا جۇمىس ورىندارىن اشۋعا سەپتىگىن تيگىزەدى.
بۇگىندە EXPO عا 64 ەل قاتىساتىنىن راستادى. ال جىلدىڭ ورتاسىنا قاراي بۇل تىزىمدەگى مەملەكەتتەر سانى 100 دەن اسادى دەپ كۇتىلۋدە. مامانداردىڭ ايتۋىنشا، جاھاندىق داعدارىسقا قاراماستان، الەم حالقىنىڭ كورمەگە دەگەن قىزىعۋشىلىعى باسەڭدەمەگەن.
انۋاربەك مۋسين، «استانا-2017» ۇ ك» دەپارتامەنت ديرەكتورىنىڭ ورىنباسارى:
- ءبىز اعىمداعى جىلدىڭ II جارتىجىلدىعىندا، ياعني كۇزدىڭ سوڭىنا دەيىن حالىقارالىق شارا قاتىسۋشىلارى ەلىمىزگە كەلەدى دەپ جوسپارلاپ وتىرمىز. سەبەبى ولار وزدەرىنىڭ پاۆيلوندارىن جاساقتاۋى قاجەت.
ال مەيمانداردى جايعاستىرۋ ءۇشىن 3 جۇلدىزدى قوناق ءۇي سالىنىپ جاتىر. سونداي-اق كورمە كەشەنى جانىنان تۇرعىن ۇيلەر دە بوي كوتەرىلىپ كەلەدى. سونداي-اق EXPO عا بولىنگەن قارجاتتان 78 ميلليارد تەڭگە ۇنەمدەلدى. دەگەنمەن بۇل كورمەنىڭ تاقىرىبىن اشۋعا ەش كەدەرگى كەلتىرمەدى. باستىسى، كەتكەن شىعىن قالاي دەگەنمەن اقتالۋى ءتيىس. سەبەبى كورمە بىتكەننەن كەيىن مۇندا حالىقارالىق قارجى ورتالىعى جۇمىس ىستەيدى.
www.24.kz