بۇل تۋرالى بۇگىن «قازاقستاننىڭ ىشكى تۋريزمىنىڭ رەسۋرستارى، الەۋەتى مەن دامۋ جولدارى» اتتى رەسپۋبليكالىق كونفەرەنتسيا بارىسىندا قازاقپارات تىلشىسىنە سۇحبات بەرگەن «جاسىل ەكونوميكانى» قولداۋ مەن G- Global-دى دامىتۋ كواليتسياسىنىڭ اتقارۋشى ديرەكتورى اسحات سۇلەيمەنوۆ ايتتى.
«الدا كەلە جاتقان ەكسپو-2017 حالىقارالىق كورمەسى اياسىندا ىشكى تۋريزمدى جەكە باعىت رەتىندە دامىتۋ بۇگىندە وتە ماڭىزدى ماسەلە بولىپ وتىر. سونىمەن قاتار، تەك وسى ايتۋلى شارا اياسىندا عانا ەمەس، جالپى ەلىمىزدەگى تۋريزمدى دامىتۋ ەكونوميكاعا ۇلكەن سەرپىن بەرەرى انىق. ەلباسىمىز ءوزىنىڭ «نۇرلى جول» جولداۋىندا ۇلتتىق قوردان قاراجات بولىنۋگە ءتيىس بىرنەشە باعىتتاردى اتاپ وتكەن بولاتىن. سولاردىڭ اراسىندا وسى تۋريزم سالاسى دا بار»، - دەيدى ا. سۇلەيمەنوۆ.
ونىڭ ايتۋىنشا، كواليتسيا ىشكى تۋريزمدى دامىتۋدا بىرنەشە جوبالاردى جۇزەگە اسىرىپ جاتىر.
«سوندىقتان دا ءبىزدىڭ كواليتسيامىز بىرنەشە جوبالاردى بۇگىننەن باستاپ جۇزەگە اسىرۋدا. ماسەلەن، ايتار بولساق، ەكسپو- عا كەلەتىن قوناقتاردى كۇتۋگە ارنالعان اۋىلدىق جەرلەردەگى ۇيلەر. تولىعىراق تۇسىندىرەتىن بولسام، استانادان 25-30 شاقىرىم جەردە ورنالاسقان اۋىلداعى ۇيلەردى قوناقتاردى ورنالاستىرۋعا وڭتايلى ەتىپ جوندەۋدەن وتكىزۋ. ياعني، سانيتارلىق نورمالارعا ساي ەتىپ، جۋىناتىن، تاماق ىشەتىن، جاتاتىن ورىندار ازىرلەۋ. مۇنى ءۇي يەسى ءوزى دە جاساي الادى. بۇل بىرىنشىدەن، كورمەگە كەلگەن تۋريستەرگە استانادان قوناق ۇيلەر جەتىسپەي قالعان جاعدايدا قوسالقى نۇسقا رەتىندە قاراستىرىلادى. ەكىنشىدەن، اۋىلداعى جۇمىسسىز ايەلدەرگە وزدەرىنىڭ كاسىبىن اشۋعا كومەكتەسۋ»، - دەپ ءتۇسىندىردى كواليتسيانىڭ اتقارۋشى ديرەكتورى.
ونىڭ مالىمەتىنشە، جوبا ازىرلەنۋ ۇستىندە. تاڭداپ الىنعان ۇيلەرگە جوندەۋ جۇمىستارىن قارجىلاندىرۋ ماسەلەسى ءالى دە قارالادى.
ايتا كەتەيىك، كونفەرەنتسيانى ق ر ۇلتتىق كاسىپكەرلەر پالاتاسى «جاسىل ەكونوميكانى» قولداۋ مەن G- Global-دى دامىتۋ كواليتسياسىمەن بىرلەسە وتىرىپ، قازاقستانداعى ب ۇ ۇ دامۋ باعدارلاماسىنىڭ قولداۋىمەن وتكىزىپ وتىر.
ءىس- شارانىڭ باستى ماقساتى - ەكسپو-2017 كورمەسىن وتكىزۋ اياسىندا ىشكى تۋريزمنىڭ قارقىندى دامۋى ءۇشىن مەملەكەتتىڭ، بيزنەستىڭ جانە ازاماتتىق قوعامنىڭ الەۋەتىن بىرىكتىرۋ.
اۆتور: ءابۋ- اسقار مەكەش ۇلى