بۇل تۋرالى «قازاقپارات» تىلشىسىنە بەرگەن سۇحباتىندا قازاقستاننىڭ اتاقتى ءالپينيسى، الپينيزم بويىنشا ەڭبەك سىڭىرگەن سپورت شەبەرى، دۇنيەجۇزى بويىنشا بيىكتىگى 8 مىڭ مەتردەن جوعارى بارلىق 14 شىڭدى قوسىمشا وتتەگىنسىز باعىندىرعان الپينيست ماقسۇت جۇمايەۆ ءمالىم ەتتى.
«ۋنيۆەرسيادا تۋىن الەمنىڭ بارلىق جەتى قۇرلىعىنداعى ەڭ بيىك شىڭداردىڭ باسىنا تىگۋ تۋرالى مەنىڭ جەكە باعدارلامام بار. كۇنى بۇگىنگە دەيىن ەۋروپانىڭ ەڭ بيىك شىڭى - ەلبرۋسقا («رۋح ءامىرشىسى»، 5642 مەتر)، سولتۇستىك امەريكانىڭ ەڭ بيىك شىڭى - دەناليگە («ۇلى تاۋ»، 6190 مەتر)، گيمالايداعى دجومولۋنگماعا («جەل ءامىرشىسى»، 8848 مەتر)، افريكاداعى كليماندجاروعا («جارقىن تاۋ»، 5895 مەتر) ۋنيۆەرسيادا تۋىن تىكتىم.
ەندى 2016-جىلى وڭتۇستىك امەريكانىڭ ەڭ بيىك شىڭى - اكونكاگۋاعا («تاس كۇزەتشى»، 6962 مەتر) تىگۋ جوسپارىمدا بار. مۇنى ارينە، وسى قاڭتار نەمەسە اقپان ايلارىندا جاساۋ كەرەك. ءبىراق، ازىرگە دەمەۋشى تاپقانىم جوق. ءبىر شىڭدى باعىندىرۋعا كەم دەگەندە 3 ميلليون تەڭگەدەي قاراجات كەرەك.
جالپى، قالعان ەكى شىڭ - يندونەزياداعى پۋنچاك دجايا («جەڭىس شىڭى»، 5030 مەتر) جانە انتاركتيداداعى ۆينسوندى («امەريكالىق ساياساتكەر كارل ۆينسوننىڭ قۇرمەتىنە اتالعان»، 4892 مەتر) ءبىر جىلدىڭ ىشىندە باعىندىرۋعا بولار ەدى. دەمەۋشى تابىلسا، بولعانى. سوڭعى ەكى شىڭدى ۋنيۆەرسياداعا دەيىن ۇلگەرە الماسام، ەڭ بولماسا «ەكسپو-2017» كورمەسىنە دەيىن قالايدا باعىندىرىپ، ۋنيۆەرسيادا جالاۋىن ورناتۋعا كۇش سالامىن»، - دەدى م. جۇمايەۆ.
ايتا كەتەلىك، 2017-جىلعى قىسقى ۋنيۆەرسيادا ويىندارى الماتى قالاسىندا 28-قاڭتار مەن 8- اقپان ارالىعىندا وتەدى. وعان الەمنىڭ 55 ەلىنەن 2 مىڭنان استام سپورتشى قاتىسادى. ۋنيۆەرسيادا بارىسىندا 3000 ەرىكتى جۇمىلدىرىلادى جانە ۋنيۆەرسياداعا شەت ەلدەردەن قوناق جانە تۋريست رەتىندە 30 مىڭ ادام كەلەدى دەپ جوسپارلانعان.
ال تەلەاۋديتوريا 1 ميلليارد كورەرمەندى قامتيتىن بولادى. جارىستار تۋرالى تەلەحابار الەمنىڭ 80 ەلىنە تاراتىلادى. ۋنيۆەرسيادانىڭ بيۋدجەتى ەكى ەسەگە دەيىن وڭتايلاندىرىلدى جانە ول 17 ميلليارد تەڭگەنى قۇرايدى.
اۆتور: جاپپاربەرگەن ايبوتا