باستاۋىش سىنىپ وقۋشىلارى ورتا ەسەپپەن مينۋتىنا 90-150 ءسوز وقۋعا مىندەتتى. ال، 300 سوزدەن ارتىق وقي العان وقۋشى ويلاۋ دەڭگەيى جوعارى ادامداردىڭ قاتارىنا كىرەدى. عالىمداردىڭ پىكىرىنشە داۋىستاپ وقىعانعا قاراعاندا ىشتەن وقۋ ارقىلى ۋاقىتتى ءتيىمدى پايدالانۋعا بولادى. فرانسۋز قولباسشىسى ناپولەون بوناپارت وتە جىلدام وقىعان. مينۋتىنا 2000 ءسوزدى وقۋعا قاۋقارى جەتكەن رەفورماتور الەم ادەبيەتىن ءسۇيىپ وقىعان. ءتىپتى، ۇيقىعا بار- جوعى 4 ساعات قانا ۋاقىتىن بولگەن. قىزىقتىسى، فرانسيانىڭ جالاۋىن كوتەرگەن قولباسشى فرانتسۋز تىلىندە ەركىن سويلەي الماعان. ون جاسىنا دەيىن تەك يتاليان ءتىلىن قولدانعاندىقتان، فرانسۋز ءتىلىن ۇيرەنۋ قيىندىق تۋعىزعان. فرانسۋز يمپەراتورى اتانعان قولباسشىنىڭ بويى 167 س م بولىپتى. كەڭەس ۇكىمەتىنىڭ نەگىزىن قالاعان ۆ. ي. لەنين دە وتە جىلدام وقۋشىلاردىڭ قاتارىندا. كىتاپتىڭ تولىق ءبىر بەتىن وقۋ ءۇشىن نەبارى جارتى مينۋت كەتىرگەن. كوز ارقىلى ەستە ساقتاۋ قابىلەتى مىقتى بولعان.
ال، ستالين كىتاپ وقۋ كەزىندە ۇنەمى قالام، قارانداشتى قولدانعان. وسىلايشا، كەرەك سويلەمدەر مەن وزىنە ۇناعان ءسوز تىركەستەرىنىڭ استىن سىزىپ وتىرۋدى ادەتكە اينالدىرعان. ءوزىنىڭ جەكە كىتاپحاناسىندا ورىس ادەبيەتىنىڭ شىعارمالارىن كوپ جيناعان. اسىرەسە، پۋشكيننىڭ كىتاپتارىن جانە پۋشكيننىڭ ءومىرى جايلى جازىلعان شىعارمالاردى ءسۇيىپ وقىعان. گيتلەر كىتاپتى تاڭداپ وقىعان. ءبىر كىتاپتى وقىماس بۇرىن ءبىرىنشى مازمۇنىن قاراپ، وقۋعا تۇرارلىق كىتاپ بولسا عانا وقۋدى باستاعان. كوبىنە ءبىر شىعارمانى تولىقتاي وقىماي، ەڭ نەگىزگى بولىمدەرىن عانا وقيتىن بولعان. جەكە كىتاپحاناسىنان ادام قۇندىلىقتارى جانە كلاسسيكالىق باعىتتاعى شىعارمالار مۇلدە تابىلماعان ەكەن. ادامي تۇرعىدان قاتىگەز بولۋىنىڭ سەبەبى، مۇمكىن وسىدان بولار. ا ق ش- تىڭ تۇڭعىش پرەزيدەنتى دجوردج ۆاشينگتون داۋىستاپ وقۋدى ۇناتقان. ماڭايىنداعىلاردىڭ وقىعان ءماتىنى جايلى پىكىرىن ءبىلۋ ءۇشىن وسىنداي امالدى قولدانعان. كوبىنە تاڭعى ۋاقىتتا شىعاتىن گازەتتى وقىپ بولعاننان كەيىن، قاسىنداعىلاردان ءوزى وقىعان جاڭالىق راس پا، الدە وتىرىك پە دەپ سۇرايتىن.
دايىنداعان: اسلان قاجيەۆ
Massaget.kz