«مەملەكەتتىك ورگانداردىڭ مالىمەتىنە سايكەس، بۇگىندە ەلىمىزدە 1178 اۋىل ينتەرنەتپەن قامتىلماعان. جانە 510 اۋىلدا ينتەرنەتتىڭ ساپاسى ناشار. بۇعان قاتىستى مەملەكەت باسشىسى دا ەسكەرتۋ جاساپ، قۇزىرلى ورگاندارعا تاپسىرما بەردى. قازىر ۋاقىتتا وتاندىق نارىقتا Beeline، Tele2، Altel، Kcell سەكىلدى بىرنەشە ۇيالى بايلانىس وپەراتورى بار. اشىق دەرەكتەرگە سايكەس، اتالعان ۇيالى بايلانىس وپەراتورلارىنىڭ كىرىسى 2018 -جىلى 240 ميلليارد تەڭگە، 2019 -جىلى 360 ميلليارد تەڭگە جانە 2020 -جىلى 472 ميلليارد تەڭگەنى قۇراپ وتىر. ودان بولەك، ۇيالى بايلانىس كومپانيالارىنىڭ جەلىنى جاڭعىرتۋ جۇمىسىنا تارتىلعان ينۆەستيتسيانى ەسەپتەڭىز. ينۆەستيتسيانىڭ جىلدىق كولەمى Beeline كومپانياسىندا %27، ال قالعاندارىندا %5,7 دى قۇرايدى»، - دەدى ق ر بايلانىس جانە سيفرلاندىرۋ ۇلتتىق قاۋىمداستىعىنىڭ ۆيتسە-پرەزيدەنتى جانات اسانتايەۆ ەلوردادا وتكەن وتاندىق تەلەكوممۋنيكاتسيا جانە سيفرلاندىرۋ سالاسىنىڭ دامۋ بارىسىنا ارنالعان دوڭگەلەك ۇستەل بارىسىندا.
ونىڭ ايتۋىنشا، اسىرەسە اۋىلدىق جەرلەردەگى ينتەرنەت ساپاسى ەش سىن كوتەرمەيدى.
«ۇيالى بايلانىس وپەراتورلارىنىڭ كىرىسى جوعارى، ءبىراق ساپالى ينتەرنەتپەن قامتي الماي وتىر. اسىرەسە اۋىلدا. وسى ورايدا زاڭناما جاعىن قايتا قاراۋ كەرەك»، - دەيدى ول.
سونداي-اق، سپيكەر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە اتالعان سالا قىزمەتىنە قاتىستى ريەۆيزيا وتكىزۋدى ۇسىندى.