ەسكە سالا كەتەيىك، 19 -ماۋسىم كۇنى شەكارا قىزمەتىنە قاراستى 2027 اسكەري بولىمىندە پولكوۆنيك سەرگەي سميتسكيح تاياۋدا عانا اسكەر قاتارىنا الىنعان ساربازدى قۇتقارىپ قالعان بولاتىن. وقۋ-جاتتىعۋ كەزىندە ءبىر سارباز ساسقالاقتاپ، قولىنداعى شىعىرشىعىن سۋىرىپ قويعان گراناتاسىن اياعىنىڭ استىنا ءتۇسىرىپ العان. وسىنى بايقاپ ۇلگەرگەن ساباق جەتەكشىسى، 2027 اسكەري ءبولىمى كومانديرىنىڭ تاربيە جونىندەگى ورىنباسارى، پولكوۆنيك سەرگەي سميتسكيح كوز ىلەسپەس جىلدامدىقپەن وكوپ تۇبىندەگى گراناتانى ءىلىپ الىپ، قاۋىپسىز جەرگە لاقتىرىپ جىبەرگەن. ال ءوزى ساربازدى جەرگە قۇلاتىپ، بۇكىل دەنەسىمەن ونى جابا، ۇستىنە قۇلاعان. جارىلعان گراناتانىڭ جارىقشاقتارى وكوپقا دەيىن جەتىپ، پولكوۆنيك ەكى اياعىنان جانە ەكى قولىنىڭ سىرتىنان، سارباز ەكى اياعى مەن سول جاق جاۋىرىنىنان جاراقات الدى.
وفيتسەر ەرلىگى تۋرالى حابار تاراعان سوڭ ىلە-شالا ەل پرەزيدەنتى قاسىم-جومارت توقايەۆ بەيبىت كۇننىڭ باتىرىنا دەگەن قۇرمەتىن جەتكىزىپ، ونىڭ وردەنمەن ماراپاتتالاتىنى تۋرالى مالىمدەگەن. كوپ كۇتتىرمەي پولكوۆنيك سەرگەي ۆيكتوروۆيچ سميتسكيحكە 1- دارەجەلى «ايبىن» وردەنىن بەرۋ تۋرالى جارلىق شىقتى.
بۇگىن قازاقستان رەسپۋبليكاسى ۇ ق ك ءتوراعاسى كارىم ءماسىموۆ الماتى قالاسىندا ورنالاسقان ۇ ق ك ورتالىق ەمحاناسىنا ارنايى بارىپ، جارالى وفيتسەردىڭ كوڭىلىن سۇراپ، وردەندى تاپسىرىپ قايتتى.