وقيعاعا قازاقستاننىڭ سىرتقى ىستەر مينيسترلىگى ارالاسقان، دەپ حابارلايدى قازاقپارات.
ق ر س ءى م- ءنىڭ Telegram-كانالىنداعى اقپاراتقا سايكەس، اسەل دۇيسەنبايەۆا 1984-جىلى 13- قاڭتاردا دۇنيەگە كەلگەن. اتىراۋ وبلىسىنىڭ تۋماسى. 16 جاسىندا تاجىكستاندىق ازاماتپەن دۋشانبەگە اتتانعان. ءبىراق عاشىعى ەلىنە كەلگەن بويدا ونى تاستاپ كەتكەن.
«وسىدان 19 جىل بۇرىن اسەلدىڭ جانۇياسىمەن بايلانىسى ۇزىلگەن بولاتىن. 2000-جىلى 7- ساۋىردە دوستاسىپ جۇرگەن تاجىكستاندىق ازاماتپەن ساراتوۆ-دۋشانبە باعىتىنداعى پويىزبەن اتىراۋدان تاجىكستانعا كەتكەن. قولىندا تۋۋ تۋرالى كۋالىگى عانا بولعان، كەيىن ونى جوعالتىپ الىپتى. دۋشانبە قالاسىنىڭ ۆوكزالىنا كەلگەننەن كەيىن اتالعان تاجىكستاندىق ازامات ونى الداپ، تاستاپ كەتكەن. ۆوكزالدا جۇرگەن كەزىندە جەرگىلىكتى ءبىر ايەلمەن تانىسىپ، سونىڭ ۇيىندە 10 جىل تۇرعان»، - دەلىنگەن س ءى م حابارلاماسىندا.
كەيىن 2011-جىلى وزگە ءبىر تاجىكستاندىقپەن ازاماتتىق نەكەدە تۇرىپ، 2013-جىلى اجىراسىپ كەتكەن، بالالارى بولماعان. وسى كەزگە دەيىن دۋشانبەدەگى ءدامحانالاردىڭ بىرىندە داياشى بولىپ جۇمىس ىستەگەن.
«اسەل، بيىلعى جىلعى قاڭتاردا دۋشانبە قالاسىنا كەلگەن قازاقستاننىڭ ءبىر ازاماتىمەن تانىسىپ، وعان ءوز سۋرەتىن جانە جەكە دەرەكتەرىن بەرگەن. ول ازامات WhatsApp جەلىسى ارقىلى اسەل تۋرالى اقپاراتتى تاراتىپ، ناتيجەسىندە ونى اناسى مۇستاقيما دۇيسەنبايەۆا تانىپ، قازاقستاننىڭ تاجىكستانداعى ەلشىلىگىنە وتىنىشپەن شىققان. ونىمەن قوسا، اسەل تۋرالى بىلگەن اتىراۋلىق دەپۋتات قازاقستان سىرتقى ىستەر ءمينيسترى بەيبىت اتامقۇلوۆقا ونى تابۋعا قولداۋ كورسەتۋ بويىنشا ءوتىنىش جاسادى. ءوز كەزەگىندە، ب. اتامقۇلوۆ ەلىمىزدىڭ دۋشانبەدەگى ەلشىگە تەلەفون شالىپ، اسەلدى ىزدەستىرۋگە تاپسىرما بەردى. ءبىزدىڭ ەلشىلىك ونى تابۋ ءۇشىن تاجىكستاننىڭ قۇزىرلى ورگاندارىنا ساۋال جىبەرگەن بولاتىن»، - دەپ اتاپ وتەدى سىرتقى ساياسات ۆەدومستۆوسىنان.
وسىلايشا، قازاقستاندىق ديپلوماتتار جانە تاجىكستان ىشكى ىستەر مينيسترلىگىنىڭ قىلمىستىق-ىزدەستىرۋ باسقارماسى ءۇي-جايى جوقتاردى قابىلدايتىن ورىنداردى تەكسەرىپ، تىركەۋدە تۇرعان نەمەسە قۇجاتسىز جۇرگەن ادامدار اراسىندا ىزدەستىرۋ جۇمىستارىن جۇرگىزگەن. ءتۇرلى ءدامحانالار، مەيرامحانالار، تۇنگى كلۋبتار دا تەكسەرىلگەن. ءبىراق ىزدەستىرۋ جۇمىستارى ناتيجە بەرمەگەن.
قولدارىندا تەك فوتوسى بار جانە ەسىمىن عانا بىلەتىن ديپلوماتتار ءۇشىن كەلىنشەكتى بىرنەشە ءجۇز مىڭ حالقى بار دۋشانبەدەن ىزدەپ-تابۋ وڭاي بولماعان.
«اسەل جانە ونى تابامىز دەپ ارەكەت جاساعان ەلشىلىك قىزمەتكەرلەرى ءۇشىن تاعدىرشەشتى كۇن بيىلعى جىلدىڭ 19- اقپانى بولدى. سول كۇنى ەلشىلىكتىڭ كونسۋلى ا. بەكبوسىنوۆقا اسەلگە ۇقسايتىن ادامنىڭ بارىن ايتىپ، دۋشانبە قالاسىنىڭ پوليتسيا قىزمەتكەرى تەلەفون سوققان، كەلىپ كەتۋىن سۇراعان. ا. بەكبوسىنوۆ دەرەۋ جەتكەن. الايدا، ول ادام باسقا ەكەنىنە كۋا بولعان. ونى ىزدەپ-تابامىز دەگەن ءۇمىتى ۇزىلۋگە شاق قالعان ا. بەكبوسىنوۆ جۇمىسقا قايتار جولىندا، جولدىڭ شەتىندە تۇرعان اسەلگە ۇقسايتىن ايەلدى بايقاعان. دەرەۋ توقتاپ، قاسىنا بارىپ، قازاقشا «ءسىزدىڭ ەسىمىڭىز اسەل ەمەس پە؟»، - دەپ سۇراعان. ول تۇسىنبەي، تاجىكشە سويلەي باستاعان. ا. بەكبوسىنوۆ ءوزىنىڭ سۇراعىن ورىسشا قايتالاعاننان كەيىن عانا ايەل تاڭدانا: «ءيا، ەسىمىم اسەل» دەپ جاۋاپ بەرگەن.
كونسۋل ونى تۋىستارى ىزدەپ جۇرگەنى تۋرالى ايتىپ، تەلەفونىنداعى اناسىنىڭ ۆيدەوسىن كورسەتكەن. جاس قىز ەسەڭگىرەپ، وتىرا كەتىپ، جارتى ساعاتتاي جىلاعان. كەيىن ولار بىردەن ەلشىلىككە كەلگەن. اسەلدىڭ قولىندا ەشقانداي قۇجات بولماعاندىقتان، كونسۋل اتىراۋ قالالىق ا ح ا ج بولىمىنەن تۋۋ تۋرالى اكتىلىك جازبانىڭ كوشىرمەسىن شۇعىل تۇردە سۇراتتى. سول كوشىرمەنىڭ نەگىزىندە قازاقستانعا قايتىپ ورالۋعا ارنالعان كۋالىك راسىمدەلدى»، - دەدى ۆەدومستۆودان.
ەلشىلىك قىزمەتكەرلەرىنىڭ كورسەتكەن قارجىلاي كومەگىمەن 22- اقپاندا دۋشانبە-الماتى-اتىراۋ باعىتى بويىنشا اۋە بيلەتى ساتىپ الىنىپ، ناتيجەسىندە، اسەل اتىراۋ قالاسىنا امان-ەسەن جەتتى. ول اناسىمەن جانە تۋىستارىمەن 19 جىلدان سوڭ قايتا قاۋىشتى.