سايلاۋعا جاۋاپكەرشىلىكپەن قارايتىن جاستار «قازاقستان تەمىر جولى» كومپانياسىنىڭ عيماراتىندا ورنالاسقان سايلاۋ ۋچاسكەسىنە باسقا تۇرعىندارمەن بىرگە كەلگەن. داۋىس بەرگەننەن كەيىن ولارعا سىيلىقتار بەرىلدى.
«تۇڭعىش رەت داۋىس بەرۋشىلەر، سونداي-اق 9 -ماۋسىمدا تۋعان كۇنىن تويلايتىن جۇرتقا بۇل ءساتتىڭ ماڭىزدىلىعىن اتاپ ءوتۋ ءۇشىن ەستەلىك سىيلىقتار ازىرلەدىك. ولاردىڭ اراسىندا فۋتبولكا، كەپكا، كىتاپتار سەكىلدى زاتتار بار. سايلاۋ ۋچاسكەسىندە العاش رەت داۋىس بەرەتىن 50-دەن استام جاس تىركەلگەن»، - دەدى № 110 -ۋچاسكەلىك سايلاۋ كوميسسياسىنىڭ ءتوراعاسى دارحان ماتايەۆ.
س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتى اسلان اسقاردىڭ تۋعان كۇنى پرەزيدەنت سايلاۋىنا تۇسپا-تۇس كەلدى. ول بۇگىن وسىنداي ماڭىزدى ءىس-شاراعا العاش رەت قاتىسىپ قانا قويماي، 18 جاسىن تويلايدى.
«ءاربىر پاتريوت ءوز ەلىنىڭ بولاشاعىنا جاۋاپتى. سايلاۋدا العاش رەت داۋىس بەردىم، بۇل مەن ءۇشىن ۇلكەن جاۋاپكەرشىلىك. العا قويعان ماقساتتارىما قول جەتكىزۋ ءۇشىن جارقىن بولاشاعىما الاڭداۋلىمىن. ال ءبىز سەكىلدى العاش رەت داۋىس بەرگەن جاستارعا ارنايى توسىن سىي جاسالدى. مۇنداي سىيلىقتاردى الۋ وتە جاقسى، بۇل ءبارىمىزدىڭ ەسىمىزدە ماڭگى قالادى»، - دەپ اتاپ ءوتتى اسلان اسقار.
قوعامدىق تاماقتانۋ جانە سەرۆيس كوللەدجىنىڭ ستۋدەنتى جاڭگىر نيازبەكوۆ ءوز قۇرداسىنىڭ پىكىرىن تولىق قولدايدى.
«مەن سايلاۋدا العاش رەت داۋىس بەرىپ تۇرمىن. ءاربىر ادام ەلدىڭ بولاشاعى ءۇشىن داۋىس بەرۋى كەرەك»، - دەيدى جاڭگىر نيازبەكوۆ.
جاستار ەلوردانىڭ بارلىق تۇرعىنىن سايلاۋ ۋچاسكەلەرىنە كەلىپ، ازاماتتىق بورىشىن وتەۋگە شاقىردى.
ەستەرىڭىزگە سالا كەتەيىك، سايلاۋ ۋچاسكەلەرى ءوز جۇمىسىن ساعات 20.00-دە اياقتايدى.