مەملەكەت باسشىسى ەلىمىز بىرىككەن كورولدىكپەن ەكىجاقتى قارىم-قاتىناستى دامىتۋعا ايرىقشا ءمان بەرەتىنىن اتاپ ءوتتى.
- قازاقستان مەن ۇلى بريتانيانى سىندارلى ساياسي ديالوگ جانە ءتۇرلى دەڭگەيدەگى بەلسەندى قارىم-قاتىناس بايلانىستىرادى. سونىمەن قاتار ىنتىماقتاستىقتى ودان ءارى كەڭەيتە تۇسۋگە الەۋەتىمىز جەتكىلىكتى ەكەنىنە سەنىمدىمىن، - دەدى قاسىم-جومارت توقايەۆ.
پرەزيدەنتتىڭ ايتۋىنشا، بىرىككەن كورولدىك قازاقستاننىڭ نەگىزگى ساۋدا جانە ينۆەستيتسيالىق سەرىكتەستەرىنىڭ ءبىرى سانالادى.
بىلتىر ەكىجاقتى ساۋدا-ساتتىق كولەمى 83 پايىزعا ارتىپ، 1,6 ميلليارد دوللاردان استى. ەلىمىزدە 500 دەن استام بريتانيالىق كومپانيا قىزمەت ەتەدى.
- ساۋدا-ەكونوميكالىق بايلانىستاردى ىلگەرىلەتۋ جاڭا جوبالار مەن ينۆەستيتسيالاردى عانا تالاپ ەتپەيدى، سونىمەن بىرگە حالىقارالىق ورتادا ەڭبەك ەتۋگە قابىلەتتى ادامدار دا قاجەت. ءدال وسى سەبەپتى قازاقستان جاستارىن الەمدى تانىپ-بىلۋگە، دۇنيەتانىمىن كەڭەيتۋگە، كوپ ءتىل ۇيرەنۋگە، ەڭ اۋەلى حالىقارالىق قارىم-قاتىناس قۇرالى سانالاتىن اعىلشىن ءتىلىن مەڭگەرۋگە شاقىرامىن، - دەدى قاسىم-جومارت توقايەۆ.
پرەزيدەنت كەزدەسۋدە ۇلى بريتانيا پرەمەر-ءمينيسترى ەندريۋ بەرنەمگە جىلى لەبىزىن جولداپ، ونى قازاقستانعا ساپارمەن كەلۋگە شاقىردى.
لورد سارۆار ەلىمىزبەن ستراتەگيالىق سەرىكتەستىكتىڭ دايەكتى تۇردە ىلگەرىلەپ كەلە جاتقانىنا كوڭىلى تولاتىنىن جەتكىزدى.
سونداي-اق بريتانيالىق بيزنەس جوبالارعا قولداۋ كورسەتىپ، قازاقستاندا قولايلى ينۆەستيتسيالىق كليمات قالىپتاستىرعانى ءۇشىن پرەزيدەنت قاسىم-جومارت توقايەۆقا العىس ايتتى.
- ەلىڭىزدىڭ قارقىندى دامىپ كەلە جاتقانىن ۇلكەن قىزىعۋشىلىقپەن قاراپ وتىرمىز. حالىقارالىق كۇن تارتىبىندەگى نەگىزگى ماسەلەلەرگە قاتىستى ۇستانىمدارىمىزدىڭ ۇقساستىعىن جوعارى باعالايمىز. ءبىزدى اشىقتىق، سەرىكتەستىك، يننوۆاتسيالار، ءوزارا سەنىم مەن ەركىن ساۋدا بايلانىستىرادى. ستراتەگيالىق سەرىكتەستەرىمىزبەن قارىم-قاتىناستا ىنتىماقتاستىقتىڭ جوعارى دەڭگەيىنە ساي كەلەتىن ناقتى ناتيجەگە قول جەتكىزۋگە نيەتتىمىز. بۇل قاتارعا قازاقستان دا ەنەتىنى ءسوزسىز، - دەدى اناس سارۆار.
مەملەكەت باسشىسى مەن ۇلى بريتانيانىڭ ساۋدا جونىندەگى مەملەكەتتىك ءمينيسترى گۋمانيتارلىق ىقپالداستىقتى نىعايتۋدىڭ، اكادەميالىق الماسۋدى كەڭەيتۋدىڭ جانە بىرلەسكەن ءبىلىم بەرۋ باستامالارىن جۇزەگە اسىرۋدىڭ ماڭىزىنا توقتالدى.
پرەزيدەنت ۇلى بريتانيادا ءبىلىم بەرۋ جانە جاس مامانداردى دايارلاۋ دەڭگەيى وتە جوعارى ەكەنىنە نازار اۋداردى.
بۇدان بولەك، كەزدەسۋگە قاتىسۋشىلار ەنەرگەتيكا، كولىك-لوگيستيكا، سيفرلاندىرۋ جانە جاساندى ينتەللەكت سالالارىنداعى ىنتىماقتاستىقتى جانداندىرۋ پەرسپەكتيۆاسىن قاراستىردى.
بۇعان دەيىن مەملەكەت باسشىسى قازاقستان شاحمات فەدەراتسياسىنىڭ الدىندا تۇرعان باسىم مىندەتتەردى اتاعان بولاتىن.