بۇل ورايدا وڭىردەگى كينولوگتاردىڭ ۇلەسى دە از ەمەس، دەپ حابارلايدى قازاقپارات ءتىلشىسى.
جالپى اعىمداعى جىلدىڭ ون ايىندا ايماقتا زاڭسىز اينالىمنان 2 توننا 708 كەلى ەسىرتكى زاتى تاركىلەنگەن دەسەك، بۇل كورسەتكىش وتكەن جىلدىڭ ەسەپتى مەرزىمىمەن سالىستىرعاندا 70 پايىزعا كوپ. نەگىزى ەلىمىز بويىنشا جامبىل وڭىرىندە ەسىرتكى قىلمىسى ەرەكشە ءجيى تىركەلەدى. بۇل ماسەلە ۇزاق جىلداردان بەرى شەشىمىن تاپپاي كەلەدى. ءتارتىپ ساقشىلارى قانشا جەردەن قىلمىسكەرلەردىڭ جولىن كەسىپ، كەشەندى شارالاردى قولعا العانىمەن ەسىرتكى ساتىپ، جەڭىل جولمەن پايدا تاپقىسى كەلەتىندەر ازايماي تۇر.
ايتا كەتەيىك، ەسىرتكى تاسىمالداۋشىلار ءوز زاڭسىز ارەكەتتەرىن جاۋىپ، جاسىرۋ ءۇشىن ءتۇرلى قۋلىققا باراتىنى ءسوزسىز. بۇل تۇرعىدا ماماندارعا قىزمەتتىك يتتەردىڭ ايتارلىقتاي كومەگى تيۋدە ەكەن.
«زاڭدى بۇزعان قىلمىسكەر نەگە بولسا دا بارادى. سوندىقتان كاسىبي دايىندالعان ءيىسشىل يتتەردىڭ كومەگىنە از جۇگىنبەيمىز. وبلىستا سوڭعى 10 ايدا قىزمەتتىك يتتەردىڭ كومەگىمەن تەك ەسىرتكىگە قاتىستى 140 قا جۋىق قىلمىس انىقتالعان. كينولوگتار يتتەردى ءتىنتۋ، ىزگە ءتۇسۋ، كۇزەتۋگە بەيىمدەپ، امبەباپ ەتىپ باپتاۋعا تىرىسادى»، - دەيدى وبلىستىق ەسىرتكى قىلمىسىنا قارسى ءىس-قيمىل باسقارماسىنىڭ باسشىسى اسحات المەتوۆ.
وڭىردەگى كينولوگتاردىڭ ءبىرى باۋىرجان ءىزباساروۆ بۇل سالاعا 5 جىل بۇرىن كەلگەنىن ايتادى. ونىڭ سەنىمدى سەرىگى - باۆا اتتى بەلگيالىق وۆچاركا ءيتى. ونى ول 8 ايلىق كۇشىك كەزىنەن كۇتىپ، باپتاعان. بيىلدىڭ وزىندە جاس مامان 20 دان استام ارنايى جەدەل شارالارعا قاتىسىپ، ءيىسشىل ءيتتىڭ كومەگىمەن ونداعان قىلمىسكەرلەردى ۇستاپتى.
«بۇل ەسىرتكى بيزنەسىنە قارسى كۇرەس جۇرگىزۋدە ەڭ ناتيجەلى، ءارى ءتيىمدى ءادىس تۇرلەرىنىڭ ءبىرى. مىسالى وسى جاقىندا بولعان نارسە. جۋالى اۋدانىندا ءبىر كولىكتى توقتاتىپ، ىشىنەن قوسىمشا دوڭگەلەككە جاسىرىلعان ماريحۋانا زاتى تابىلدى. ەكى جارىم كەلىدەي. مىسالى سول كوزگە كورىنبەيدى. ال ءيتتىڭ كومەگىمەن ءدال تاپتىق»، - دەيدى ب. ءىزباساروۆ.