بيىل كۆاليفيكاتسيالىق سىناققا قاتىسۋعا ارناۋلى جاساقتا كەم دەگەندە 3 جىل قىزمەت ەتكەن 500 اسكەري قىزمەتكەر نيەت ءبىلدىردى. ولاردىڭ 47 ءسى ارى قاراي وتۋگە رۇقسات الدى.
ۇش كەزەڭنەن تۇراتىن كۆاليفيكاتسيالىق سىناقتان ءوتۋ وڭايعا سوققان جوق. جاۋىنگەرلەر فيزيكالىق جانە اتىس دايىندىعى بويىنشا نورماتيۆتەر تاپسىردى.
سوڭعى كۇنى 14 ۇمىتكەر 12 شاقىرىمدىق جەدەل مارشتى باعىندىرۋعا شاقتى. جاۋىنگەرلەر بەلگىلى ءبىر باعىت بويىنشا سۋلى، بالشىقتى جەرلەردەن ءوتتى.
الايدا جەدەل مارشتان 14 ۇمىتكەردىڭ 12 ءسى عانا كەلەسى سىناققا وتكىزىلدى.
ۇمىتكەر اسلانبەك ناكىشيەۆ كۇرەڭ بەرەتتى تاعۋ مارتەبەسىن يەلەنۋ ءۇشىن 6 جىلدان بەرى باعىن سىناپ كەلگەن. بيىل ايى وڭىنان تۋىپ وتىر.
«قيىن بولدى. ءار نورماتيۆتى جوعارى دەڭگەيدە ءوتۋىڭ كەرەك، سوندىقتان ۋايىمداي باستايسىڭ. ءتىپتى قويان- قولتىق ۇرىستىڭ سوڭعى كەزەڭىندە قۇلاپ جاتسام دا، بەرىلمەيمىن دەپ، ورنىمنان تۇرىپ، سوڭىنا دەيىن كۇرەستىم»، - دەيدى اسلانبەك.
بيىل بىلىكتىلىك سىناقتارى جاڭا فورماتتا وتكەنىن اتاپ ءوتۋ كەرەك. ولار پراكتيكالىق نورماتيۆتەردى ورىنداۋ ۋاقىتىن قىسقارتۋ ارقىلى ءبىر ىزگە سالىندى. وسىلايشا بۇگىندە بۇرىنعى 75 شاقىرىم قاشىقتىق 12 شاقىرىمعا قىسقارتىلدى. الايدا تاپسىرىلاتىن نورماتيۆتەر سانى ەكى ەسە ءوستى.
«ءار ادام الدىنا قول جەتكىزگىسى كەلەتىن ماقساتتار قويادى جانە بۇگىن 12 جاۋىنگەر بۇل تاپسىرمانى ورىندادى. الايدا بۇل وتپەي قالعاندار مىندەتتەرىن اتقارا المايدى دەگەن ءسوز ەمەس. بۇل ادامدار كۇن سايىن ىشكى ىستەر، ۇلتتىق قاۋىپسىزدىك ورگاندارىمەن بىرلەسىپ قىلمىسقا قارسى كۇرەس جۇرگىزەدى»، - دەدى ۇلتتىق گۆارديا باس قولباسشىسى گەنەرال-مايور البەرت ماتكارىموۆ.
بۇگىندە قازاقستان رەسپۋبليكاسى ۇلتتىق گۆارديا قاتارىندا كۇرەڭ بەرەتتى تاعۋ قۇقىعىنا يە 150 اسكەري قىزمەتكەر جۇمىس اتقارۋدا.