- بيىل 12 مىڭنان استام تۇلەك، سونىڭ ىشىندە ەكى مىڭنان اسا «التىن بەلگى» يەگەرى پەداگوگيكا ماماندىعى بويىنشا مەملەكەت گرانتىنا يە بولدى. مۇعالىمدىك جولىن تاڭداعان ستۋدەنتتەردىڭ شاكىرتاقىسى 2,5 ەسە كوبەيدى. جاڭا وقۋ جىلى قارساڭىندا ايماقتاردا 15 مىڭنان استام مۇعالىم جۇمىسقا قابىلداندى. ولاردىڭ جارتىسىنا جۋىعى - جاس ماماندار. بۇل - مەكتەپتەرگە ءبىلىمدى، جىگەرلى، ۇشقىر ويلى مۇعالىمدەردىڭ جاڭا بۋىنى كەلىپ جاتىر دەگەن ءسوز. ۇستازدىققا ەندى قادام باسقان جاس ماماندارعا اعا بۋىن كوپ كومەك كورسەتۋگە ءتيىس. سوندا ولار دا ءوز ءىسىنىڭ ناعىز شەبەرى بولىپ قالىپتاسادى. سونداي-اق كاسىبي ساباقتاستىق ءداستۇرى پايدا بولادى. ءبىز وقۋ-اعارتۋ سالاسىنىڭ كادرلىق الەۋەتىن كۇشەيتە ءتۇسۋىمىز كەرەك. بىلىكتى مۇعالىمدى مىقتى مەملەكەتتىڭ تۇعىرى دەپ ايتساق، ارتىق بولمايدى. بۇل تۇرعىدان العاندا، ەلىمىزدىڭ جوعارى وقۋ ورىندارى ايرىقشا ءرول اتقارادى. سەبەبى ۋنيۆەرسيتەت قابىرعاسىندا بولاشاق ماماننىڭ كاسىبي ءبىلىمى مەن داعدىسى قالىپتاسادى. بۇدان بولەك، ءبىلىم-عىلىم سالاسىنداعى حالىقارالىق ىنتىماقتاستىقتى كۇشەيتۋگە باسا ءمان بەرۋ ماڭىزدى. شەت مەملەكەتتەرگە ساپارلارىم كەزىندە مەن الەمنىڭ وزىق وقۋ ورىندارىمەن بايلانىس ورناتۋ، ىقپالداستىقتى نىعايتۋ ماسەلەسىنە ايرىقشا نازار اۋدارامىن، - دەدى قاسىم-جومارت توقايەۆ.
پرەزيدەنت الدىمىزدا اۋقىمدى مىندەت تۇرعانىنا نازار اۋداردى. بۇل - جاھاندا سيفرلىق وركەنيەت پەن ءبىلىم ەكونوميكاسى سالتانات قۇرعان داۋىردە ءومىر ءسۇرىپ، ونەگەلى ىستەرمەن اينالىساتىن ازاماتتار بۋىنىن تاربيەلەپ شىعارۋ.
- سوندىقتان مەنىڭ تاپسىرماممەن جاساندى ينتەللەكتىنى ورتا ءبىلىم بەرۋ جۇيەسىنە جوسپارلى تۇردە ەنگىزۋ ۇدەرىسى باستالدى. دۇرىس پايدالانا بىلسە، جاڭا تەحنولوگيا مۇعالىمدەردىڭ قىزمەتىن الدەقايدا جەڭىلدەتەدى، ولاردى ارتىق جۇمىستان بوساتاتىن سەنىمدى قۇرالعا اينالادى. تالىمگەرلىككە دەن قويىپ، وقۋشىلارمەن تىكەلەي جۇمىس ىستەۋى ءۇشىن ۇستازداردىڭ ۋاقىتى بولۋعا ءتيىس. بۇل باعىتتا ماڭىزدى قادام جاسالدى. بيىل قىركۇيەك ايىندا وقۋ-اعارتۋ مينيسترلىگى ءبىلىم بەرۋ سالاسىنداعى جاساندى ينتەللەكتىنى قولدانۋ ستاندارتىن بەكىتتى. قالادا نەمەسە شالعاي اۋىلدا ورنالاسقانىنا قاراماستان، ەلىمىزدەگى بارلىق مەكتەپ وزىق ادىستەمە مەن سيفرلىق پلاتفورماعا قول جەتكىزەدى. باستاما جاقسى. جۇمىس دۇرىس باعىتتا ءجۇرىپ جاتىر. حالىقارالىق PISA-2025 زەرتتەۋىنىڭ ناتيجەسى بويىنشا مەكتەپتەرىمىزدىڭ سيفرلىق دايىندىق دەڭگەيى ەكونوميكالىق ىنتىماقتاستىق جانە دامۋ ۇيىمىنا مۇشە مەملەكەتتەردىڭ ورتاشا كورسەتكىشىنەن استى. وقۋشىلاردىڭ كوگنيتيۆتى بەيىمدەلۋ يندەكسى ورتاشادان جوعارىلادى. الايدا بۇل جولدىڭ باسى عانا، توقمەيىلسۋگە سەبەپ ەمەس. الدا اۋقىمدى جۇمىس كۇتىپ تۇر. وسى جەتىستىكپەن توقتاپ قالۋعا بولمايدى، - دەدى مەملەكەت باسشىسى.
ايتا كەتەيىك، مەملەكەت باسشىسى مۇعالىمدەردى كاسىبي مەرەكەسىمەن قۇتتىقتادى.