نازارلارىڭىزعا وسى حاتتاعى قاعيدالاردىڭ مازمۇنىن ۇسىنامىز.
• وتىرىك ايتپاڭىز «وتىرىكتىڭ قۇيرىعى ءبىر- اق تۇتام» ، ياعني جالعان ءسوزدىڭ قاشان دا ارتى اشىلارى انىق. مۇمكىن ادەيى، مۇمكىن اڭداماي ايتقان وتىرىك ءسوزىڭىز ءبىر- اق ساتتە ابىرويىڭىزدى ايرانداي توگىپ، دارداي اتىڭىزعا كىر كەلتىرۋى مۇمكىن. سول سەبەپتى، جالعان ءسوزدى جاقىن كورمەڭىز. ونىڭ ۇستىنە وتىرىكتى ايتقان سايىن، بۇل ارەكەتتىڭ ادەتكە اينالۋى مۇمكىن.
حابارىڭىز جوق شارۋا جايلى اڭگىمە تۋسا، ارالاسپاڭىز ءوزىڭىز بىلمەيتىن شارۋاعا ارالاسپاڭىز جانە سول توڭىرەكتەگى اڭگىمەگە دە كىرىسپەڭىز. تەك قۇلاعىڭىز ءتۇرۋلى بولسىن، اڭگىمە اراسىندا كەرەك دەپ تاپقان اقپارات بولسا ەستە ساقتاپ قالۋعا تىرىسىڭىز. ايتار بولساڭىز، بۇل اڭگىمەنى كىمنىڭ اۋزىنان ەستىگەنىڭىزدى نەمەسە ءوزىڭىزدىڭ بولجام ەكەنىن ەسكەرتىڭىز. «ايتىلعان ءسوز - اتىلعان وق» . وتىز تىستەن شىققان ءسوزىڭىز وتىز رۋلى ەلگە تاراۋى مۇمكىن. قاتە ايتساڭىز، بىرەۋگە كەسىرى ءتيۋى مۇمكىن ەكەنىن ەستەن شىعارماڭىز.
• از سويلەڭىز بوس ءسوز سويلەۋدەن اۋلاق بولىڭىز. الايدا، مۇلدە سويلەمەي قالۋعا دا بولمايدى. تەك ءار ءسوزىڭىز جۇيەلى، انىق، ناقتى دالەلدەرمەن تولىعىپ تۇرسىن. ءار سوزدەن ىلىك ىزدەپ وتىراتىن ادامدار دا كەزدەسەدى، وسىنداي جانداردىڭ ءسوزىڭىزدى جوققا شىعارۋىنا جول بەرمەڭىز. ياعني، قىسقا ءارى نۇسقا سويلەپ ۇيرەنىڭىز.
• ۇستامدى بولىڭىز پىكىرتالاس ورىن العان جاعدايدا اشۋعا بوي الدىرماڭىز. ءوز- ءوزىڭىزدى قولىڭىزدا ۇستاپ، بايسالدىلىقپەن جاۋاپ قايتارىڭىز. قارسىلاسىڭىزدى ايقايمەن ەمەس، ورىندى ايتىلعان سوزبەن توقتاتۋعا تىرىسىڭىز.
• بىرەۋدىڭ ءسوزىن ۇزبەڭىز بىرەۋ سويلەپ جاتقاندا، ونىڭ اڭگىمەسىن ۇزبەڭىز. تىڭداي ءبىلۋدى ۇيرەنىڭىز. ادام اياقاستى كەلە قالعان ويدى ۇمىتىپ قالماس ءۇشىن، سول ۋاقىتتا ايتىپ تاستاعىسى كەلەدى. ساپ ەتە قالعان ويدى بىردەن ايتۋعا اسىقپاي، اڭگىمە ايتۋشىنىڭ سويلەمىنىڭ سوڭىن كۇتىڭىز، وسى ۋاقىتتا كەلگەن وي دا ءبىر جۇيەگە ءتۇسىپ، دامي تۇسەدى.
• اڭگىمەڭىزدىڭ ماڭىزى بار ما، ءبىرىنشى سونى ويلاپ الىڭىز ايتقىڭىز كەلگەن ءسوزدى جەتكىزبەس بۇرىن، ءبىرىنشى ىشتەي ويلانىپ الىڭىز. اڭگىمەڭىزدىڭ وزىڭىزگە قارسى شىقپاۋىنا كوز جەتكىزىڭىز. تاعى، قانشالىقتى ءسىزدىڭ پايداڭىزعا شەشىلەتىنىنە دە باس قاتىرىڭىز.
• ماقتانباڭىز داڭعوي، اتاققۇمار ادامداردىڭ ورتاسىندا وتىرساڭىز، ولاردىڭ اڭگىمەسىنە قاتتى كوڭىل بولمەي- اق قويىڭىز. ەڭ باستىسى، ولاردىڭ قاسيەتىن وزىڭىزگە جۇقتىرىپ الماڭىز جانە ەستە ساقتاڭىز: ەشقاشان جەكە باسىڭىزدىڭ جەتىستىكتەرىن ايتىپ كوپ ورتاسىندا بىرەۋدەن ارتىق ەكەنىڭىزدى دالەلدەۋدەن اۋلاق بولىڭىز. جەتىستىككە جەتكەنىڭىز راس بولسا، اينالاڭىزداعى ادامدار ءسىزدى ونسىز دا مويىندايدى.
• ورتادا جوق ادامدى جامانداماڭىز «ءوزى جوقتىڭ كوزى جوق» دەپ، قاسىڭدا وتىرماعان ادامدى جامانداۋ سىزگە ابىروي اپەرمەيدى. سىرتتان تون ءپىشىپ، كوزگە تىكە قاراپ ايتا المايتىن اڭگىمە تاراتۋدان اۋلىق بولىڭىز.
• ادامنىڭ كەمشىلىكتەرىن كۇلكى ەتپەڭىز بىرنەشە ادامنىڭ كوزىنشە ادامنىڭ كەمشىلىكتەرىن كەلەكە قىلىپ، سىقىلىقتاپ كۇلمەڭىز. بۇل ارەكەت ادامگەرشىلىككە جاتپايدى. ونىڭ ۇستىنە، بۇل ارەكەتتەن كەيىن باسقا ادامدار ءسىز جايلى جاقسى ويدا بولماسى انىق.
• جاندى جارالايتىن ءسوز ايتپاڭىز بەلگىلى ءبىر ادامعا باعىتتالعان سوزىڭىزدە اۋىرلىق بولماسىن نەمەسە بىرەۋدىڭ جانىن جارالايتىن ءسوزدى ايتۋدان اۋلاق بولىڭىز. بۇل ارەكەت ارقىلى وزىڭىزگە جاۋ تاۋىپ بەرۋىڭىز مۇمكىن. بارىنشا، جۇمساق جاۋاپ بەرۋگە تالپىنىڭىز.
• اشۋلانباڭىز ءسىزدىڭ تاراپقا جاعىمسىز سوزدەر ايتىلسا، بىردەن ايقايعا باسپاڭىز. بۇنداي ساتتە، ۇتىمدى ايتىلعان ءسوز عانا قارسىلاستى توقتاتا الادى. ونىڭ ۇستىنە، ارتىق ەنەرگيا قۇرتىپ، جۇيكەڭىزدى جۇقارتۋدىڭ سىزگە نە كەرەگى بار؟ بايسالدى، ۇتىمدى جاۋاپ بەرۋ ارقىلى ءوزىڭىزدى دانىشپان، سالماقتى ادام رەتىندە كورسەتكەنىڭىز دۇرىس.
Massaget.kz