پاۆلودار وبلىسى مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساۋلە وسمانوۆا ون كۇندىك شەڭبەرىندە وبلىستىڭ قالالارى مەن اۋداندارىندا ەلىمىزدە تۇراتىن ەتنوس وكىلدەرىنىڭ مادەنيەتىن، تاريحىن جانە تۇرمىسىن ناسيحاتتايتىن 150 دەن استام ءىس-شارا ۇيىمداستىرىلاتىنىن اتاپ ءوتتى.
«باسقارمامىزدىڭ باستاماسىمەن قازاقستان حالقى تىلدەرىنىڭ ХХІرەسپۋبليكالىق فەستيۆالى جانە «رۋحاني جاڭعىرۋ» باعدارلاماسىن ىسكە اسىرۋ شەڭبەرىندە 26- تامىز بەن 5- قىركۇيەك ارالىعى وبلىسىمىزدا «تىلدەر ون كۇندىگى» بولىپ جاريالاندى»، - دەدى ساۋلە وسمانوۆا.
باسقارما باسشىسى ورىنباسارىنىڭ ايتۋىنشا، ون كۇندىكتىڭ ماقساتى - تىلدەردى دامىتۋ، اسىرەسە، جاستار اراسىندا ناسيحات جۇرگىزۋ. «وڭىرىمىزدە مەملەكەتتىك ءتىل بويىنشا ماسەلە بار ەكەنى بارىمىزگە بەلگىلى. سونداي-اق قازىرگى كەزدە لاتىن قارپىنە كوشۋ ءۇردىسى دە ءجۇرىپ جاتىر. وسى باعىتتاردا جۇمىس جاسالادى»، - دەيدى ول.
«قازاق ءتىلى» قوعامى وبلىستىق فيليالىنىڭ ءتوراعاسى سوتسيال ايتەنوۆ ءتىل ماسەلەسىنە قاتىستى پىكىرىن ءبىلدىرىپ، لاتىن قارپىنە ۇيرەتەتىن تەگىن ساباقتار بار ەكەنىن ايتتى.
«بۇگىندە قازاق ءتىلىن بالاباقشادا ۇيرەتۋ كەرەك دەگەن باستاما كوتەرىلۋدە. بالاسىن اكەلگەن اتا-انانىڭ وزدەرى قازاق ءتىلىن بىلمەيدى. تاربيە وتباسىندا باستالادى. سوندىقتان اتا-انالار وزدەرى دە ويلانۋى قاجەت. وعان قوسا، مەملەكەتتىك ءتىلدى بىلمەيتىن قىزمەتكەرلەر دە بار. ولارعا زاڭ جۇزىندە تالاپ قويىلۋ كەرەك. ال، «قازاق ءتىلى» قوعامىنىڭ قالا، اۋداندارداعى بولىمدەرىندە لاتىن قارپى بويىنشا تەگىن ساباق بەرەتىن ەرىكتىلەر بار. تۇرعىندار كەلىپ ۇيرەنۋلەرىنە بولادى»، - دەدى ول.
قازاقستان جازۋشىلار وداعىنىڭ مۇشەسى، اقىن، جۋرناليست شولپان بايعالىنىڭ ايتۋىنشا، ءتىلدى دامىتۋدى الدىمەن مەملەكەتتىك ورگانداردان باستاۋ قاجەتتىگىنە باسا توقتالدى. «قازىر ءتىلدى دامىتۋ ءۇشىن باسقاشا جۇمىس جاساۋ كەرەك. بالاباقشا، مەكتەپتەردە ءتيىستى جۇمىستار ءجۇرىپ جاتىر. جاۋاپتى باسقارما اكىمدىك پەن ورگانداردى مەملەكەتتىك تىلدە سويلەتۋى قاجەت. ءتىپتى، ءتىل باسقارماسىنىڭ وزىندە قىزمەتكەرلەر وزگە تىلدە سويلەپ جاتسا، حالىق قايدا بارماق. سوندىقتان قىزمەتكەرلەردىڭ الدىندا كۇنتىزبە سياقتى اقپاراتتىق دۇنيەلەر قويۋ نەمەسە بايقاۋ وتكىزۋگە دە بولادى. وسى ونكۇندىك اياسىندا 10 كۇن «تەك قازاقشا سويلەيمىز» دەگەن اكسيا ۇيىمداستىرعان ءجون»، - دەدى شولپان بايعالى.
ايتا كەتەيىك، «تىلدەر ونكۇندىگى» 6- قىركۇيەكتە ءتىلدى كەڭىنەن ناسيحاتتاپ، حالىق ساناسىن سەرپىلتۋدى جانە ءار ۇلتتىڭ ەرەكشەلىگى مەن قۇندىلىعىن كورسەتۋدى ماقسات ەتەتىن «ءتىل - رۋحاني جاڭعىرۋ تەتىگى» كونسەرتتىك باعدارلاماسىمەن قورىتىندىلاناتىن بولادى.