قوعامدىق دەنساۋلىقتى قورعاۋ كوميتەتى ءتوراعاسىنىڭ ايتۋىنشا، سوڭعى ءبىر اپتانىڭ ىشىندە رەسپۋبليكا بويىنشا قىزىلشاعا 438 ادام شالدىققان. ولاردىڭ ىشىندە 282 ادام - 14 جاسقا دەيىنگى بالالار. وسىلايشا، قىزىلشامەن اۋىرىپ قالعانداردىڭ 65 پروتسەنتى بالالاردىڭ اراسىندا تىركەلىپ وتىر.
« قىزىلشا بارلىق ايماقتاردا تىركەلدى. استانادا ءبىر اپتانىڭ ىشىندە 99 وقيعا بولدى. وسىعان بايلانىستى اۋرۋحانادا قوسىمشا كەرەۋەتتەر قويىلىپ جاتىر. جالپى، رەسپۋبليكا بويىنشا 186 ادام اۋرۋحانادا ەم- دوم الۋدا. ال استانادا 15 ادام اۋرۋحاناعا ءتۇستى. ولاردىڭ ىشىندە 10 ادام جانساقتاۋ بولىمىندە جاتىر. قايعىلى وقيعالار تىركەلگەن جوق» ، - دەدى ج. بەكشين استانادا وتكەن باسپا ءسوز ءماسليحاتىندا.
ونىڭ سوزىنە قاراعاندا، ءبىر اپتانىڭ ىشىندە قىزىلشامەن اۋىرىپ قالعانداردىڭ باسىم بولىگى اتىراۋ (46) ، جامبىل (24) ، ماڭعىستاۋ (16) ، سولتۇستىك قازاقستان (30) ، پاۆلودار (27) جانە تۇركىستان (41) وبلىستارىندا، استانا (99) جانە شىمكەنت (100) قالالارىندا تىركەلدى. «ەندى، رەسپۋبليكا بويىنشا ورتاشا كورسەتكىش تومەندەپ جاتقان جوق. ال استانا قالاسىندا اسىپ كەتتى» ، - دەپ اتاپ كورسەتتى ج. بەكشين.
باس سانيتار قازاقستاندىقتارعا ۆاكسيناتسيادان وتۋگە كەڭەس بەرىپ وتىر. ق ر دەنساۋلىق ساقتاۋ مينيسترلىگى ۆاكتسينانى ساتىپ الۋعا قوسىمشا 580,9 ميلليون تەڭگە ءبولىپ بەردى. وعان قىزىلشاعا قارسى تاعى 478 مىڭ ۆاكسينا ساتىپ الىنادى. جوسپار بويىنشا 1 - ساۋىردە ۆاكسيناتسيا باستالادى.