1920-جىلى قازاق تاريحىنداعى العاشقى اقپارات اگەنتتىگى روستانىڭ ورىنبور-تورعاي بولىمشەسى نەگىزىندە قۇرىلدى. عاسىرلىق تاريحى بار قارا شاڭىراقتىڭ بۇگىنگى يەسى - قازىرگى «قازاقپارات» حالىقارالىق اقپارات اگەنتتىگى» ا ق.
قۇرىلعاننان كەيىن اراعا بەس جىل سالىپ اگەنتتىكتىڭ اتى «قازروست» بولىپ وزگەرتىلگەن ەدى. ال «قازروست» 1937-جىلى «قازتاگ» دەگەن اتپەن قازاق ك س ر مينيسترلەر كەڭەسىنىڭ قاراۋىنا بەرىلدى. ارادا 60 جىل وتكەندە، ياعني، 1997-جىلعى قىركۇيەكتىڭ 10 ندا قازاقستان پرەزيدەنتىنىڭ 3629 №جارلىعىمەن «قازاق اقپارات اگەنتتىگى (ق ا ز ا ا)» رەسپۋبليكالىق قازىنالىق كاسىپورنى بولىپ وزگەرتىلدى. 2002-جىلعى قاراشانىڭ 8 ىندە ق ر ۇكىمەتىنىڭ 1186№ قاۋلىسىنا سايكەس قاز ا ا گ نەگىزىندە «قازاق اقپارات اگەنتتىگى» ۇلتتىق كومپانياسى («قازاقپارات» ۇ ك) قۇرىلدى. 2008-جىلعى شىلدەنىڭ 3 ىندە اگەنتتىك ق ر ۇكىمەتىنىڭ 668№ قاۋلىسىنا سايكەس، «ارنا مەديا» ۇلتتىق اقپاراتتىق حولدينگى» اكسيونەرلىك قوعامىنىڭ قۇرامىنا كىردى.
ال 2012-جىلعى تامىزدان 2014-جىلعا دەيىن «قازاقستان» ر ت ر ك» ا ق قۇرامىندا بولسا، 2014-جىلدىڭ قاڭتارىندا «قازاقپارات» ەلدەگى العاشقى حالىقارالىق اقپارات اگەنتتىگى (ح ا ا) مارتەبەسىنە يە بولىپ، ءوز تاريحىنداعى جاڭا كەزەڭدى باستادى. 2019-جىلدىڭ سوڭىنان باستاپ اگەنتتىك «قازاقپارات» حالىقارالىق اقپارات اگەنتتىگى» اكسيونەرلىك قوعامى بولىپ جاڭاردى.
100-جىلدىق تاريحىنىڭ العاشقى كەزىنەن باستاپ، اگەنتتىك ⅩⅩعاسىرداعى بۇكىل جاڭالىقتاردى تاراتىپ، ەل تاريحىنداعى عاسىرلىق كەزەڭنىڭ اقپاراتتىق اعىمىنىڭ بەل ورتاسىندا بولدى. بارلىق قازاقستاندىق ب ا ق قۇرالدارىنا اقپارات بەرۋمەن بىرگە، اگەنتتىك كەڭەستىك كەزەڭدەگى كوپتەگەن ساياسي قۇجاتتاردىڭ ماڭىزدى اۋدارماسىن ۇسىنىپ، قازاق ءتىلىنىڭ قولدانىس اياسىنىڭ كەڭەيتۋگە ۇلكەن ۇلەس قوستى.
2004-جىلى اگەنتتىك پايدالانۋشىلارىنا جاڭالىقتاردى قازاق تىلىنەن لاتىن قارپىنە اكادەميك ءابدۋالي قايداروۆتىڭ ادىسىمەن كوشىرۋدىڭ جاڭا نۇسقاسىن ۇسىندى. بۇل وسى ءادىستى ءىس جۇزىندە قولدانعان العاشقى اقپارات اگەنتتىگى بولدى. سونىڭ ارقاسىندا كيريلل قارپىن وقي المايتىن شەتەلدەگى قانداستارىمىز تاريحي وتانىندا بولىپ جاتقان وقيعالاردى ءبىلىپ وتىرۋعا مۇمكىندىك العان بولاتىن.
«قازاقپارات» جاڭالىقتارى اگەنتتىكتىڭ www.inform.kz ۆەب-سايتى ارقىلى قازاق، ورىس، اعىلشىن، ارابشا توتە جازۋمەن جانە قىتاي تىلدەرىندە تاراتىلادى. جۋىقتا اگەنتتىك وزبەك تىلىندە دە اقپارات تاراتا باستادى.
«قازاقپارات اگەنتتىگى» مەملەكەتتىك قۇرىلىمداردان – ق ر پرەزيدەنتى اكىمشىلىگىنىڭ، ۇكىمەتتىڭ، پارلامەنتتىڭ، ايماقتىق وكىمەت ورگاندارىنىڭ، ۇلتتىق، قارجىلىق، ونەركاسىپتىك قۇرىلىمداردىڭ قىزمەتى تۋرالى تولىق جانە دالمە-ءدال اقپاراتتار بەرىپ وتىرادى. قازاقستاننىڭ، ورتالىق ازيانىڭ بارلىق ايماقتارىنىڭ جانە الەمدىك قوعامداستىقتىڭ الەۋمەتتىك-ەكونوميكالىق جانە قوعامدىق-ساياسي ءومىرىنىڭ بارلىق سالاسىنان شىنايى جانە ساراپتامالىق اقپاراتتار جەتكىزىلەدى. كورپوراتيۆتىك جانە جەكە كليەنتتەر ءۇشىن اقپاراتتىق كونسالتينگ، جۇرتشىلىقپەن بايلانىس جونىندەگى باعدارلامالار، ساياسي تەحنولوگيالار، ەكونوميكالىق ساراپتامالىق شولۋلار جانە ماركەتينگتىك ۇسىنبالار بويىنشا سەرۆيستىڭ بارلىق ءتۇرى كورسەتىلەدى.
اگەنتتىكتىڭ ورتالىق كەڭسەسى نۇر-سۇلتاندا ورنالاسقان.
قازاقستاندىق ينتەرنەت-رەسۋرستاردىڭ ىشىندە «قازاقپارات» ح ا ا ۇزدىك وندىققا كىرەدى. «قازاقپاراتتىڭ» جاڭالىعىن الەمنىڭ 200 دەن استام ەلى وقىپ وتىر. اسىرەسە، اشىق ءارى تازا ستاتيستيكاعا نەگىزدەلگەن olshem.kz رەيتينگىندە اگەنتتىكتىڭ پوزيتسياسىنىڭ بەكي ءتۇسۋى دە جاقسى كورسەتكىش. سونىمەن بىرگە، اگەنتتىكتىڭ Facebook، موي مير، ۆكونتاكتە، Twitter، ودنوكلاسسنيكي، Google ، Instagram, WeChat الەۋمەتتىك جەلىلەرىندەگى پاراقشالارىندا 200 مىڭنان استام جازىلۋشى بار.
بۇگىنگى كۇنى «قازاقپارات» ح ا ا حالىقارالىق اقپارات اگەنتتىكتەرىنىڭ بەس بىردەي قاۋىمداستىعىنىڭ مۇشەسى. ولار: ازيا جانە تىنىق مۇحيتى ەلدەرىنىڭ - ОANA قاۋىمداستىعى، ت م د ەلدەرىنىڭ - انيا قاۋىمداستىعى، تۇركىتىلدەس ەلدەردىڭ – ت ك ا قاۋىمداستىعى، ەكونوميكالىق ىنتىماقتاستىق ۇيىمىنا مۇشە مەملەكەتتەردىڭ – ە ك و ن ا قاۋىمداستىعى، كاسپي تەڭىزىمەن شەكتەسەتىن ەلدەردىڭ – ا ك س ن ا قاۋىمداستىعى. اگەنتتىك ت ا س س، شينحۋا، يرنا سەكىلدى 43 شەتەلدىك اقپارات اگەنتتىگىمەن تىكەلەي اقپاراتتىق بايلانىس ۇستاپ وتىر. «قازاقپارات» اگەنتتىگىنىڭ اقپاراتىن 100 گە تارتا رەسپۋبليكالىق جانە شەتەلدىك باسىلىمدار پايدالانادى.
اگەنتتىكتىڭ شەتەلدەگى قانداستارمەن دە بايلانىستى رەتكە كەلتىرىلگەن. بىلتىر قازاقستاندا شەتەلدەگى قازاق ءتىلدى ب ا ق- تاردىڭ قاۋىمداستىعىن قۇرۋ باستاماسى كوتەرىلگەن بولاتىن. بۇل جۇمىستى دا «قازاقپارات» ءوز مىندەتىنە الىپ وتىر.
«قازاقپارات» اگەنتتىگىنىڭ قازاقستاننىڭ بارلىق وڭىرلەرىمەن بىرگە الەمنىڭ بىرنەشە ەلىندە مەنشىكتى تىلشىلەرى جۇمىس ىستەيدى. تۇركيا، رەسەي، قىتاي، ب ا ءا، يوردانيا، ازەربايجان، وزبەكستان، قىرعىز رەسپۋبليكاسى جانە تاعى بىرنەشە ەلدەگى تىلشىلىك پۋنكتتەردىڭ ارقاسىندا اگەنتتىك حالىقارالىق جاڭالىقتاردى وقىرمانعا ۋاقتىلى ۇسىنىپ كەلەدى. سونىمەن بىرگە، حالىقارالىق دارەجەدە قازاقستاننىڭ يميدجىن جاقسارتىپ، ەلدى تانىتۋعا ۇلەس قوسۋدا.